هغه کورنۍ چې د ماتم نه انکار کوى
يو سړی د خپل پلار له ښځې سره اوسي او کليسا په خپل زغم وياړي. پولوس وايي هغوی بايد ماتم کړی وای، او هغه شيطان ته وسپاري ترڅو د هغه روح وژغورل شي. زوړ خمير بايد لرې شي؛ د دننه خلکو قضاوت د هغوی کار دی، زموږ پلار د بهر خلکو قضاوت کوي.
5 1رښتيا خبره دا ده چې ستاسو په مينځ کښې د زنا خبره اورېدے شى، بلکې داسې زنا چې د هغه خلقو په مينځ کښې هم نشته چې پلار نۀ پېژنى، چې يو سړے د خپل پلار د ښځې سره اوسېږى. 2او تاسو بيا هم لويى کوئ! ايا تاسو ته خو ماتم په کار وو، دې دپاره چې دا کار کوونکے ستاسو د مينځ نه لرې شى؟ 3ځکه چې زۀ که د بدن په لحاظ لرې يم خو په روح کښې حاضر يم، او ما دا کار کوونکے دغسې حُکم کړو لکه چې حاضر يم. 4کله چې تاسو زمونږ د مالِک عيسىٰ په نوم راغونډ شئ، او زما روح هم حاضر وى، او زمونږ د مالِک عيسىٰ قُدرت ستاسو سره وى، 5نو دا سړے شيطان ته حواله کړئ، چې د جسم تباهى وشى، دې دپاره چې د هغۀ روح زمونږ د مالِک عيسىٰ په ورځ خلاصون ومومى.
6ستاسو لويى ښۀ نۀ ده. ايا تاسو ته دا نۀ ده معلومه چې لږ خمير ټوله ګوندے پړسوى؟ 7زوړ خمير لرې کړئ، دې دپاره چې تاسو نوے ګوندے شئ، لکه چې تاسو بېخميره يئ. ځکه چې زمونږ د فسح ګډورے، يعنې مسيح، قربان کړے شوے دے. 8نو راځئ چې دا اختر ومنو، نۀ د زوړ خمير سره، نۀ د کينې او بدۍ د خمير سره، بلکې د سپېڅلتيا او حق د بېخميره ډوډۍ سره.
9ما تاسو ته په خپل خط کښې وليکل چې د زناکارو خلقو سره ملګرتيا مۀ کوئ، 10خو زما مطلب دا نۀ وو چې د دې دُنيا د ټولو زناکارو، يا د لالچيانو او د دوکهبازانو، يا د بتانو د عبادت کوونکو نه، ځکه کۀ داسې وى نو تاسو له به دا دُنيا پرېښودل په کار وى. 11خو اوس زۀ تاسو ته دا ليکم چې کۀ څوک ځان ورور يا خور بولى خو زناکار، يا لالچى، يا د بت عبادت کوونکے، يا بدګويه، يا شرابى، يا دوکهباز وى، نو د داسې سړى سره ملګرتيا مۀ کوئ، بلکې د هغۀ سره ډوډۍ هم مۀ خورئ. 12زۀ ولې د هغه خلقو حُکم وکړم چې د کليسا نه بهر دى؟ ايا تاسو ته د هغه خلقو حُکم کول په کار نۀ دى چې دننه دى؟ 13زمونږ پلار د هغه خلقو حُکم کوى چې بهر دى. ”هغه بدکار سړے د خپل مينځ نه وباسئ.“
