1 Kọrinti 5

5 ¹Àgbèrè wà níti gidi láàrin yín—irú èyí tí a kò tilẹ̀ rí láàrin àwọn tí kò mọ Baba pàápàá: ọkùnrin kan ní aya baba rẹ̀. ²Ẹ sì ń gbéra ga! Kàkà bẹ́ẹ̀, ṣé kò yẹ kí ẹ ti ṣọ̀fọ̀, kí a lè mú ẹni tí ó ṣe èyí kúrò láàrin yín? ³Nítorí bí ó tilẹ̀ jẹ́ pé mi kò sí níhìn-ín ní ara ṣùgbọ́n mo wà ní ẹ̀mí, mo ti ṣèdájọ́ ẹni tí ó ṣe èyí tẹ́lẹ̀, bí ẹni pé mo wà níhìn-ín. ⁴Nígbà tí ẹ bá péjọ ní orúkọ Olúwa wa Jesu, tí ẹ̀mí mi sì wà níbẹ̀, pẹ̀lú agbára Olúwa wa Jesu, ⁵ẹ fi ọkùnrin yìí lé Satani lọ́wọ́ láti pa ara run, kí a lè gba ẹ̀mí rẹ̀ là ní ọjọ́ Olúwa wa Jesu.

⁶Ìfọ́nnu yín kò dára. Ṣé ẹ kò mọ̀ pé ìwúkàrà díẹ̀ ní ń mú gbogbo ìyẹ̀fun wú? ⁷Ẹ mú ìwúkàrà àtijọ́ kúrò, kí ẹ lè jẹ́ ìyẹ̀fun tuntun—gẹ́gẹ́ bí ẹ ti wà láìní ìwúkàrà. Nítorí a ti fi Kristi, ọ̀dọ́-àgùntàn Ìrékọjá wa, rúbọ. ⁸Nítorí náà, ẹ jẹ́ kí a ṣe àjọyọ̀ náà, kì í ṣe pẹ̀lú ìwúkàrà àtijọ́, ìwúkàrà àrankàn àti ìwà búburú, ṣùgbọ́n pẹ̀lú àkàrà aláìní-ìwúkàrà ti òtítọ́-inú àti òdodo.

⁹Mo kọ̀wé sí yín nínú lẹ́tà mi pé kí ẹ má bá àwọn alágbèrè kẹ́gbẹ́. ¹⁰Kì í ṣe gbogbogbò àwọn alágbèrè ti ayé yìí ni mo ní lọ́kàn, tàbí àwọn wọ̀bìà àti àwọn oníjìbìtì, tàbí àwọn abọ̀rìṣà—nítorí bí bẹ́ẹ̀ ni, ẹ ìbá ní láti kúrò nínú ayé. ¹¹Ṣùgbọ́n ohun tí mò ń kọ sí yín ni pé kí ẹ má bá ẹnikẹ́ni tí ó ń pe ara rẹ̀ ní arákùnrin tàbí arábìnrin ṣùgbọ́n tí ó jẹ́ alágbèrè, tàbí wọ̀bìà, tàbí abọ̀rìṣà, tàbí abánijẹ́, tàbí ọ̀mùtí, tàbí oníjìbìtì, kẹ́gbẹ́. Ẹ kò gbọ́dọ̀ tilẹ̀ bá irú ẹni bẹ́ẹ̀ jẹun. ¹²Kí ni ó dé tí èmi ó fi ṣe ìdájọ́ àwọn tí ó wà lóde ìjọ? Ṣé kì í ṣe àwọn tí ó wà nínú ni ó yẹ kí ẹ ṣèdájọ́? ¹³Baba wa ni yóò ṣe ìdájọ́ àwọn tí ó wà lóde. “Ẹ lé ẹni búburú náà kúrò láàrin yín.”