Ortinwet ne Eesyoi Koriir
Mi murenet ne ru ak osotyotap kwandanyi, ago menotik okweek churateet. Ki le Paulo nyol koriir okweek, ak koname chiini eutap Setani si kesar kabuusennyi. Nyol koisto mermereek che kiririik; koriibisyos che mi oriit ko poisyeng'wong', ago Kwandanyo ne irwookyin che mi saang'.
5 1Kemwaei iman agobo koipkei eng' kwenung'ung', koipkei ne ma konyoor agot eng' pichooto che ma ngen Kwanda: mi mureno ne tinyei osotyo ne po kwandanyi. 2Ago oik okweek che menotik! Tos manyalu koriir okweek, si koiste chii ne kayai niito eng' kwenung'ung'? 3Amu agot ma ami eng' poorto ago ami eng' kabuusennyu, kaarwookyi iman chii ne kayai niito, ko uu ye ami. 4Ye oyumgei eng' kainetap Kiptaiyenyo Jeso, ami kabuusennyu, kobooto kimnateetap Kiptaiyenyo Jeso, 5onde chiini eng' eutap Setani si kong'em poorto, si kesar kabuusennyi eng' peetuutap Kiptaiyenyo Jeso.
6Ma myee paornateet ne oyae okweek. Tos ma ongen ale mermereek che tutigin yaei peek tugul? 7Oiste mermereek che kiririik, si oik peek che leel, ko uu ye omi che ma kinde mermereek. Amu kageeny Kristo, aarwennyo ne po paska. 8Keyai anyun igoorto, ma kobooto mermereek che kiririik, mermereegap mali ak yaityet, ago kobooto magatiinik che ma kinde mermereek che po atepto ak imanit.
9Kaasirwok eng' parwaanyu ale matonamgei ak piik che soksei. 10Ma amwae tugul piik che soksei che po ng'wonyuni, anan che tinyei kasetap myat ak pooniik, anan che saaei kanamonik; amu nda nyolu omang'une ng'wony. 11Ago asire nguno ale matonamgei ak chii age tugul ne kuurei ineegei tupchennyo anan chepkamet, ago ko soksei, anan ne tinyei kasetap myat, anan ne saaei kanamonik, anan ne po chemererosyek, anan kabogit, anan poonindet. Matoam agot kobooto chii ne uu nooto. 12Amune anyun airwookyin che mi saang'ap kaniset? Tos manyalu orwookyin okweek che mi oriit? 13Irwookyin Kwandanyo che mi saang'. “Oiste chii ne kiptengegit eng' kwenung'ung'.”