Mi eng' bukuit

1 Korintoek 4 FHB Father's Heart Bible™

Kiistoi 15% eng' kiy ne iale korook →
Bukuit

Riibiigap Maonateetap Kwanda

Irwookyin Korintoik kayooktoinikwak ko uu che rwookyin piik che poisyei. Kole Paulo kirwooget ne po iman ko loosunet ne po Kwandanyo ye konyo Kiptaiyat, koboorun rituannyi, pireet, ak ole ma tinyei koot, ak koporchin kole ki ek kwandanywa eng' logoiywek, nooto sirchini ko uu kwanda.

Sura 4.

Obwaat echeek kole keek otwogigap Kristo ak riibiigap maonateetap Kwandanyo. Ne siirei nooto, kanyolji riibiik kole konyoor icheek eng' imanit. Ago kiy ne ming'in eng' anee ngot irwookyin okweek, anan ngot irwookyin kirwoogutyet age tugul ne po piik. Agot anee ko ma arwookyini aneegei. Mangen kiy age tugul ne ayae ne ya, ago ma ityinii anee nooto. Ne irwookyin anee ko Kiptaiyennyo Jeso. Nooto anyun, amirwookyin kotomo koit sait, kotomo konyo Kiptaiyennyo Jeso. Itoreti ineendet saang' tuguuk che wendotin eng' ngelelnateet ak koboorchi magutigap mugulelwek. Yeityo konyoor chii age tugul loosunet eng' Kwandanyo.

Che kitupche, kaayai tuguuchu eng' anee ak Apolo agobo okweek, si oneetkei eng' echeek mat osiir ne kisir, ak mat omenotok, oiye agenge kosiir age. Amu ng'oo ne yaei oterchigei ak alak? Kiy ne itinye ne ma iinyoor? Ngot iinyoor, amu nee ichougei ko uu ye ma iinyoor?

Kaotinyei tugul che omache! Kaoek mogoreek! Kaotau olaitorne ma kobooto echeek—nganda olaitorne iman, si kelaitorne agacheek kobooto okweek! Amu abwaat ale koboorun Kwandanyo echeek kiyooktoi eng' let, ko uu piik che kagirwookyi komeet, amu kageek echeek kiy ne igeeri ng'wony, ak angeet, ak piik. Keek echeek che perber agobo Kristo, ago okweek ko utaatiin eng' Kristo. Keek echeek nyalulyotin, ago okweek ko kiimeen. Konyitotiin okweek, ago teweerech echeek. Agoi saini ko keamei rubeet, ak melelda, ak kelaach ngoroik che oosen, ak kipirech, ak mimoten kot. Keboisyee komaiyo eng' euneguk che keek. Ye kilgolech, keberuuri; ye kiusech, kemuitoe. Ye kilembech, kewolji eng' tala. Kageek echeek ko uu sarat ne po ng'wony, ak uu teroochigap piik tugul, agoi ra.

Ma asir tuguuchu si arongwok okweek, ago asir si iteechok okweek ko uu lagoguk che achame. Agot otinye konetik che ma iitoksei eng' Kristo, ma otinye kwaaniik che chaang'—amu anee ne ki asichok eng' Kristo Jeso eng' logoiywek che myach. a a v15 Ma inde Paulo ineegei oltaap Kwandanyo; poisyei ineendet ko uu kiboitetap piik ne isichei Kwandanyo lagokyik koek piigap kaanyi. Logoiywek che myach icheeget ne yaei sigeet. Nooto anyun asoomok, oigei ko uu anee. Nooto ne ki aiyoogwok Timoteo, lakweennyu ne achame ak ne imanit eng' Kiptaiyat—kobwaatwok ortinwekyuk che po Kristo Jeso, ko uu ye aneetei komoswek tugul, eng' kaniset age tugul. Kaochoogitu alak, ko uu ngot ma anyoonjok. Ago anyoonjok chogune, ngot komach Kiptaiyennyo Jeso, ak anai ma ng'aleegap pichu che menotik, ago kimnateennywa. Amu laitornatetap Kwandanyo ma ki po ng'aleek, ago ki po kimnateet. Omache nee? Anyoonjok ak kirokto, anan ak chamyet eng' sabeetap tala?