Pitri laga Lukai Thaka Kotha Khan laga Cholawa Khan

Corinth laga manuh khan tai khan laga apostle khan ke khel dikhai diya manuh ke number diya nisena bisar kori ase. Paul koi, Probhu wapas aha homoi amar Pitri laga tarif he kaam laga bisar ase; tai nijor laga bhuk, mar khaya aru ghor nathaka ke dikhai, aru yaad koridiye susamachar te tai he tumikhan laga baba hoise, etu karone tai ekjon baba nisena likhe.

Adhyay 4.

Amikhan ke Khrista laga noukar aru amar Pitri laga lukai thaka kotha khan laga cholawa bhabi lobi. Aru etu bhi, cholawa khan biswasi ase koi kene pabole lage. Kintu tumikhan pora moi ke bisar korile bhi, nohole manuh laga adalot pora korile bhi, moi karne eku dangor nohoi. Moi nijor ke bhi bisar nakore. Moi nijor laga biruddhe eku najane, kintu etu pora moi ke sapha nabonai. Moi ke bisar kora Jon tu amar Prabhu Jisu ase. Etu nimite, homoi naha age te, amar Prabhu Jisu naha age te, kunke bhi bisar nakoribi. Tar pora andhar te lukai thaka khan ujala te anibo aru mon laga bhabona khan dikhai dibo. Tetiya ekjon ekjon amar Pitri pora prosansa pabo.

Bhai aru bhoini khan, moi etu kotha tumikhan karne nijor ke aru Apollos ke loi kene koise, titia tumikhan amikhan pora sikhibo pare, likha thaka pora bahar te najabole, aru ekjon ke dusra ekjon pora bisi bhal pai kene phutani nakoribole. Kilemane kun pora tumi ke alag bonai? Tumi ki rakhise ji tumi grohon kora nai? Jodi tumi etu paise, tene korile kele phutani kore jineka tumi pa-a nai?

Tumikhan ki itcha kore sob paikena ahise! Tumikhan dhoni hoi jaise! Amikhan ke chari kene tumikhan raj koribole shuru korise—jodi hosa pora tumikhan raj korile, titia amikhan bhi tumikhan logot raj koribo paribo! Kilemane moi bhabe amar Pitri pora amikhan pasoni khan ke hekh te dikhai dise, moribole dosi thaka manuh khan nisena, kilemane amikhan prithibi, sorgodoot khan, aru manuh khan karne ekta sa-bole jinis hoi jaise. Amikhan Khrista karne murkho ase, kintu tumikhan Khrista te gyani ase. Amikhan komjur ase, tumikhan takot ase. Tumikhan ke sonman diye, amikhan ke bisarna kore. Etiya tak amikhan bhuk te, pyaas te, phata kapra pindhi kene, mar khai kene, aru ghor nathaka hoi kene thake. Amikhan nijor laga hath pora digdar pora kaam kore. Bisarna paikena, amikhan asirbad diye; dukh di kene satai dile, amikhan dhorjo kore. Biya kotha koile, amikhan norom pora jawab diye. Amikhan prithibi laga kura, sob laga maila hoi jaise, aji tak.

Moi etu tumikhan ke sorom dibole likha nohoi, kintu moi laga morom thaka bacha khan nisena tumikhan ke hoshiar koribole likhi ase. Jodibi tumikhan Khrista te ginti koribo napara guru khan rakhe, tumikhan bisi pitri nathake—moi susamachar pora Khrista Jisu te tumikhan ke jonom dise. ^a Etu nimite, moi tumikhan ke binti kore, moi ke nokol koribole. Etu karne moi tumikhan logot Timothy ke pathaise, Prabhu te moi laga morom thaka, biswasi bacha—tai tumikhan ke Khrista Jisu te moi laga rasta khan monte rakhi dibo, jineka moi sob jaga te, sob mondoli te sikhai. Kunba manuh phutani kore, jineka moi tumikhan logot naha nisena. Kintu moi joldi tumikhan logot ahibo, jodi amar Prabhu Jisu itcha kore, aru etu phutani kora manuh khan laga kotha nohoi, kintu tarkhan laga takot ke jani lobo. Kilemane amar Pitri laga rajyo tu kotha laga kaam nohoi kintu takot laga ase. Tumikhan ki itcha kore? Moi ekta lathi loi kene ahibo, nohole morom aru norom atma loi kene ahibo?