1 Wakorintho 4

4 ¹Tuhesabuni sisi kuwa watumishi wa Kristo na mawakili wa siri za Baba yetu. ²Zaidi ya hayo, hutakiwa kwa mawakili kwamba waonekane kuwa waaminifu. ³Lakini kwangu mimi si kitu kama mkinihukumu ninyi, au mahakama yoyote ya wanadamu. Wala mimi sijihukumu mwenyewe. ⁴Sijui neno lolote juu yangu, lakini hilo halinihesabii haki. Anayenihukumu ni Bwana wetu Yesu. ⁵Basi msihukumu kabla ya wakati, kabla Bwana wetu Yesu hajaja. Yeye atayaleta nuruni yaliyofichwa gizani, na kuidhihirisha mikusudi ya mioyo. Ndipo kila mmoja atakapopokea sifa kutoka kwa Baba yetu.

⁶Ndugu zangu, nimeyafanya haya kwangu mimi na Apolo kwa ajili yenu, ili mpate kujifunza kutoka kwetu msivuke yaliyoandikwa, wala msijivune, mkimpendelea mmoja kuliko mwingine. ⁷Kwa maana ni nani anayekutofautisha na wengine? Nawe una nini usichokipokea? Na ikiwa ulikipokea, kwa nini unajivuna kana kwamba hukukipokea?

⁸Tayari mmekwisha kushiba yote mnayoyataka! Tayari mmekwisha kuwa matajiri! Bila sisi mmeanza kutawala—laiti kweli mngetawala, ili na sisi tupate kutawala pamoja nanyi! ⁹Kwa maana nadhani Baba yetu ametuweka sisi mitume kuwa wa mwisho, kama watu waliohukumiwa kufa, kwa kuwa tumefanywa kuwa tamasha kwa ulimwengu, kwa malaika, na kwa wanadamu. ¹⁰Sisi ni wapumbavu kwa ajili ya Kristo, bali ninyi mna hekima katika Kristo. Sisi tu dhaifu, ninyi mna nguvu. Ninyi mnaheshimiwa, sisi tunadharauliwa. ¹¹Hata saa hii tunaona njaa, na kiu, tuko uchi, tunapigwa, na hatuna makao. ¹²Tunajitaabisha kwa kufanya kazi kwa mikono yetu wenyewe. Tukitukanwa, twabariki; tukiteswa, twastahimili. ¹³Tukisingiziwa, twajibu kwa upole. Tumekuwa kama takataka za ulimwengu, uchafu wa watu wote, hata leo hii.

¹⁴Siyaandiki haya ili kuwaaibisha, bali kuwaonya kama watoto wangu wapendwa. ¹⁵Ingawa mna waalimu wasiohesabika katika Kristo, hamna baba wengi—mimi niliwazaa katika Kristo Yesu kwa njia ya injili. ^a a v15 Paulo hamchukui nafasi ya Baba yetu; anatumika kama chombo cha kibinadamu ambacho kwa njia yake Baba yetu huwazaa watoto wake katika jamaa. Injili yenyewe ndiyo izaayo. ¹⁶Kwa hiyo nawasihi, iweni wafuasi wa mfano wangu. ¹⁷Kwa sababu hiyo nilimtuma kwenu Timotheo, mwanangu mpendwa na mwaminifu katika Bwana—yeye atawakumbusha njia zangu katika Kristo Yesu, kama nifundishavyo kila mahali, katika kila kanisa. ¹⁸Baadhi yenu wamejivuna, kana kwamba sitakuja kwenu. ¹⁹Lakini nitakuja kwenu upesi, Bwana wetu Yesu akipenda, nami nitajua si maneno ya hawa waliojivuna, bali nguvu zao. ²⁰Kwa maana ufalme wa Baba yetu si wa maneno bali wa nguvu. ²¹Mnataka nini? Je, nije kwenu na fimbo, au kwa upendo na roho ya upole?