1 Wakorintho 3

3 ¹Ndugu zangu, sikuweza kusema nanyi kama watu wa Roho, bali kama watu wa mwili—watoto wachanga katika Kristo. ²Naliwanywesha maziwa, si chakula kigumu, kwa maana mlikuwa hamjaweza kukipokea. Naam, hata sasa hamjaweza, ³kwa maana bado ninyi ni watu wa mwili. Kwa kuwa palipo na wivu na ugomvi kati yenu, je! ninyi si watu wa mwili, mnaoenenda kwa kawaida ya wanadamu? ⁴Kwa maana mmoja asemapo, "Mimi ni wa Paulo," na mwingine, "Mimi ni wa Apolo," je! ninyi si wanadamu tu?

⁵Basi Apolo ni nani? Na Paulo ni nani? Ni watumishi ambao kwao mliamini, kila mmoja kama Bwana alivyompa. ⁶Mimi nalipanda, Apolo alitia maji, bali Baba yetu ndiye aliyekuza. ⁷Basi, apandaye si kitu, wala atiaye maji, bali Baba yetu akuzaye. ⁸Apandaye na atiaye maji ni wamoja; na kila mmoja atapata thawabu yake mwenyewe kwa kadiri ya taabu yake mwenyewe. ⁹Maana sisi tu wafanya kazi pamoja na Baba yetu; ninyi ni shamba lake, ni jengo lake.

¹⁰Kwa kadiri ya neema ya Baba yetu niliyopewa, kama mkuu wa wajenzi mwenye hekima naliweka msingi, na mwingine anajenga juu yake. Lakini kila mtu na aangalie jinsi anavyojenga juu yake. ¹¹Kwa maana msingi mwingine hakuna mtu awezaye kuuweka isipokuwa ule uliokwisha kuwekwa, yaani, Yesu Kristo. ¹²Lakini kama mtu akijenga juu ya msingi huo dhahabu, au fedha, au mawe ya thamani, au miti, au majani, au manyasi, ¹³kila mtu kazi yake itakuwa dhahiri; maana ile Siku itaidhihirisha, kwa sababu moto ndio uifunuao, na moto uleule utaijaribu kazi ya kila mtu, ni ya namna gani. ¹⁴Kazi ya mtu aliyoijenga ikidumu, atapata thawabu. ¹⁵Kazi ya mtu ikiteketea, atapata hasara; ila yeye mwenyewe ataokolewa, lakini ni kama kwa kupitia motoni.

¹⁶Hamjui ya kuwa ninyi ni hekalu la Baba yetu, na ya kuwa Roho wa Baba yetu anakaa ndani yenu? ¹⁷Mtu akiliharibu hekalu la Baba yetu, Baba yetu atamharibu mtu huyo. Kwa maana hekalu la Baba yetu ni takatifu, ambalo ni ninyi.

¹⁸Mtu asijidanganye mwenyewe. Kama mtu ye yote miongoni mwenu akijiona kuwa ni mwenye hekima katika dunia hii, na awe mpumbavu, ili apate kuwa na hekima. ¹⁹Kwa maana hekima ya dunia hii ni upumbavu mbele za Baba yetu. Kwa maana imeandikwa, "Yeye ndiye awanasaye wenye hekima katika hila yao," ²⁰na tena, "Baba yetu anayajua mawazo ya wenye hekima, ya kuwa ni ubatili." ²¹Basi mtu asijisifu kwa wanadamu. Kwa maana vitu vyote ni vyenu; ²²ikiwa Paulo, au Apolo, au Kefa, au dunia, au uzima, au mauti, au vilivyopo, au vitakavyokuwapo—vyote ni vyenu, ²³nanyi ni wa Kristo, na Kristo ni wa Baba yetu.