1 Wakorintho 5

5 ¹Kwa kweli inaripotiwa kwamba kuna uasherati miongoni mwenu—uasherati wa aina isiyopatikana hata miongoni mwa wale wasiomjua Baba: mtu amemtwaa mke wa baba yake. ²Nanyi mnajivuna! Je, hamkupaswa kuomboleza badala yake, ili yule aliyefanya jambo hili aondolewe miongoni mwenu? ³Kwa maana ingawa sipo kwa mwili lakini nipo kwa roho, tayari nimekwisha kumhukumu yule aliyefanya jambo hili, kana kwamba nipo. ⁴Mkutanikapo katika jina la Bwana wetu Yesu, roho yangu ikiwepo, pamoja na nguvu za Bwana wetu Yesu, ⁵mkabidhini mtu huyu kwa Shetani ili mwili uangamizwe, ili roho yake iokolewe katika siku ya Bwana wetu Yesu.

⁶Kujivuna kwenu si kwema. Je, hamjui kwamba chachu kidogo huchachua donge zima la unga? ⁷Ondoeni chachu ya zamani, ili mpate kuwa donge jipya—kama vile mlivyo bila chachu. Kwa maana Kristo, mwana-kondoo wetu wa Pasaka, amekwisha kutolewa dhabihu. ⁸Basi na tuiadhimishe sikukuu, si kwa chachu ya zamani, chachu ya nia mbaya na uovu, bali kwa mkate usiotiwa chachu wa unyofu na kweli.

⁹Niliwaandikia katika barua yangu msichangamane na watu waasherati. ¹⁰Sikumaanisha kamwe waasherati wa ulimwengu huu, au wenye tamaa na wanyang'anyi, au waabudu sanamu—kwa maana ingekuwa hivyo, ingewapasa kuutoka ulimwengu. ¹¹Lakini sasa nawaandikia msichangamane na mtu yeyote anayejiita ndugu lakini ni mwasherati, au mwenye tamaa, au mwabudu sanamu, au mchongezi, au mlevi, au mnyang'anyi. Mtu wa namna hiyo msile chakula naye hata kidogo. ¹²Kwani ni juu yangu kuwahukumu wale walio nje ya kanisa? Je, si juu yenu kuwahukumu wale walio ndani? ¹³Baba yetu huwahukumu wale walio nje. "Mwondoeni yule mwovu miongoni mwenu."