1 ቆሮንቶስ 4

4 ¹ሰዎች እኛን የክርስቶስ አገልጋዮችና የአባታችን ምሥጢራት መጋቢዎች አድርገው ይቍጠሩን። ²ከዚህም በላይ፣ ከመጋቢዎች የሚፈለገው ታማኞች ሆነው እንዲገኙ ነው። ³ነገር ግን እናንተ ብትፈርዱብኝ ወይም ማንኛውም የሰው ፍርድ ቤት ቢፈርድብኝ ለእኔ ብዙም ግድ የለኝም፤ ራሴን እንኳ አልፈርድም። ⁴ራሴን የሚከስ ምንም ነገር አላውቅም፤ ይህ ግን ንጹሕ አያደርገኝም። የሚፈርድብኝ ጌታችን ኢየሱስ ነው። ⁵ስለዚህ ጊዜው ሳይደርስ፣ ጌታችን ኢየሱስ ሳይመጣ አትፍረዱ። እርሱ በጨለማ የተሰወረውን ወደ ብርሃን ያወጣል፤ የልቦችንም ሐሳብ ይገልጣል። በዚያን ጊዜ እያንዳንዱ ከአባታችን ምስጋናን ይቀበላል።

⁶ወንድሞችና እኅቶች ሆይ፣ ከተጻፈው አልፋችሁ እንዳትሄዱ፣ አንዱን ከሌላው በማስበለጥም እንዳትታበዩ ከእኛ እንድትማሩ ስለ እናንተ ይህን በራሴና በአጵሎስ ላይ አድርጌዋለሁ። ⁷አንተን ከሌላው የሚለይህ ማን ነው? ያልተቀበልኸውስ ያለህ ምን አለ? ከተቀበልህ ታዲያ እንዳልተቀበልህ የምትመካው ለምንድን ነው?

⁸አሁኑኑ የምትፈልጉትን ሁሉ አግኝታችኋል! አሁኑኑ ባለጠጎች ሆናችኋል! ያለ እኛ መንገሥ ጀምራችኋል፤ በእውነት ብትነግሡ ኖሮ እኛም ከእናንተ ጋራ በነገሥን ነበር! ⁹እኔ እንደማስበው አባታችን እኛን ሐዋርያትን ለሞት እንደ ተፈረደባቸው ሰዎች አድርጎ ከሁሉ በኋላ አሳይቶናል፤ ለዓለም፣ ለመላእክትና ለሰዎች ትርኢት ሆነናልና። ¹⁰እኛ ስለ ክርስቶስ ሰነፎች ነን፤ እናንተ ግን በክርስቶስ ጥበበኞች ናችሁ። እኛ ደካሞች ነን፤ እናንተ ብርቱዎች ናችሁ። እናንተ የተከበራችሁ ናችሁ፤ እኛ ግን የተናቅን ነን። ¹¹እስከዚህ ሰዓት ድረስ እንራባለን፣ እንጠማለን፣ የተቦጫጨቀ ልብስ እንለብሳለን፣ እንደበደባለን፣ መኖሪያ ቤትም የለንም። ¹²በገዛ እጃችን ደክመን እንሠራለን። ሲሰድቡን እንባርካለን፤ ሲያሳድዱን እንታገሣለን። ¹³ስማችን ሲጠፋ በገርነት እንመልሳለን። እስከ ዛሬ ድረስ የዓለም ጥራጊ፣ የሁሉም ጉድፍ ሆነናል።

¹⁴ይህን የምጽፍላችሁ ላሳፍራችሁ ሳይሆን እንደ ተወደዳችሁ ልጆቼ ልመክራችሁ ነው። ¹⁵በክርስቶስ አእላፍ አሳዳጊዎች ቢኖሯችሁም፣ ብዙ አባቶች የሏችሁም፤ እኔ በወንጌል አማካይነት በክርስቶስ ኢየሱስ ወለድኋችሁ። ^a a v15 ጳውሎስ አባታችንን አይተካም፤ ነገር ግን አባታችን ልጆቹን ወደ ቤተ ሰቡ የሚወልድበት የሰው መሣሪያ ሆኖ ያገለግላል። የሚወልደው ወንጌሉ ራሱ ነው። ¹⁶ስለዚህ እኔን እንድትመስሉ እለምናችኋለሁ። ¹⁷ስለዚህ በጌታ የተወደደውንና ታማኙን ልጄን ጢሞቴዎስን ወደ እናንተ ላክሁ፤ እርሱ በየስፍራው በሁሉም ቤተ ክርስቲያን እንደማስተምረው በክርስቶስ ኢየሱስ ያለውን መንገዴን ያስታውሳችኋል። ¹⁸ወደ እናንተ የማልመጣ መስሏቸው አንዳንዶች ተኵራርተዋል። ¹⁹ነገር ግን ጌታችን ኢየሱስ ቢፈቅድ ፈጥኜ ወደ እናንተ እመጣለሁ፤ የእነዚህንም ትዕቢተኞች ንግግራቸውን ሳይሆን ኀይላቸውን እመረምራለሁ። ²⁰የአባታችን መንግሥት በኀይል እንጂ በንግግር አይደለምና። ²¹ምን ትፈልጋላችሁ? በበትር ልምጣባችሁ ወይስ በፍቅርና በገርነት መንፈስ?