Bakebi ya Mansweki ya Tata
Bantu ya Kolinto ke fundisa bantumwa ya bawu bonso bantu ke tangisa bayimbidi. Polo tubaka ti nzengolo mosi kaka yina kele na mfunu ni lukumu ya Tata ya beto ntangu Mfumu ke vutuka, yandi songaka nzala ya yandi mosi, babula mpe kukondwa nzo, mpe yibusaka bawu ti yandi butaka bawu na Nsangu ya Mbote, na yina yandi ke sonika bonso tata.
4 1Beno tala beto mutindu bisadi ya Klisto mpe bankebi ya mansweki ya Tata ya beto. 2Dyaka, bankebi fwana ti bawu monikina bantu ya kukwikama. 3Kasi yawu kele dyambu ya fyoti na munu kana beno ke fundisa munu, to kana bantu ya nkaka ke fundisa munu. Mu ke fundisa nkutu munu mosi ve. 4Mu me zaba ata dyambu mosi ve yina ke funda munu, kasi yawu ke semba munu ve. Muntu yina ke fundisa munu ni Mfumu ya beto Yesu. 5Na yina, beno fundisa ve na ntwala ya ntangu, na ntwala Mfumu ya beto Yesu ke kwiza. Yandi ke basisa na nsemo mambu yina kele ya kubumbana na mpimpa, mpe ke monisa mabanza ya bantima. Na ntangu yina, konso muntu ke baka lukumu na sika ya Tata ya beto.
6Bampangi, mu me tula mambu yayi na munu mosi ti na Apolosi samu na beno, samu ti beno longoka na beto na kuluta ve mambu yina ba me sonika, mpe na kuvwanda ve bantu ya lunangu, na kuzola muntu mosi kuluta ya nkaka. 7Samu nani ke sala nge muntu ya kuswaswana? Yinki kima nge kele na yawu yina nge bakaka ve? Kana nge bakaka yawu, samu na yinki nge ke sala yinwa bonso nge bakaka yawu ve?
8Beno me vwanda na bima nyonso yina beno ke zola! Beno me kuma bamvwama! Beno me banda kuyala kukondwa beto, kana ya tsyelika beno vwandaka kuyala, samu ti beto mpe beto yala kintwadi na beno! 9Samu mu ke banza ti Tata ya beto me tula beto bantumwa na nsuka, mutindu bantu yina ba me zengila kitumbu ya lufwa. Samu beto me kuma kima ya kutala na meso ya yinza, ya bambazi, mpe ya bantu. 10Beto kele bizoba samu na Klisto, kasi beno kele bantu ya ndwenga na kati ya Klisto. Beto kele bantu ya kulemba, kasi beno kele ya ngolo. Beno kele bantu ya lukumu, kasi beto kele bantu ya kukonda lukumu. 11Tii na ntangu yayi, beto kele na nsatu, na mpwila ya maza, na bilele ya kubeba, bantu ke bula beto, mpe beto kele ve na banzo ya kuvwanda. 12Beto ke sala kisalu ya ngolo na maboko ya beto mosi. Ntangu bantu ke finga beto, beto ke sakumuna bawu; ntangu bawu ke talisa beto mpasi, beto ke vibidila. 13Ntangu bantu ke finga beto, beto ke vutula na malembe. Beto me kuma mvindu ya yinza, bosoto ya bantu nyonso, tii bubu yayi.
14Mu ke sonika mambu yayi ve samu na kupesa beno nsoni, kasi samu na kukebisa beno mutindu bana ya munu ya luzolo. 15Ata beno kele na bantwadisi mingi yina ba lenda tanga ve na kati ya Klisto, beno kele ve na batata mingi. Ni munu butaka beno na kati ya Yesu-Klisto na nzila ya Nsangu ya Mbote. a a v15 Polo ke baka kisika ya Tata ya beto ve; yandi kele kaka kisadilu ya kimuntu yina na nzila ya yandi Tata ya beto ke butaka bana ya yandi na kati ya dibuta. Nsangu ya Mbote yawu mosi ni yawu ke butaka. 16Na yina, mu ke bondila beno, beno landa mbandu ya munu. 17Ni yawu yina mu fidisaka Timote na beno, mwana ya munu ya luzolo mpe ya kukwikama na kati ya Mfumu. Yandi ke bambula beno moyo na banzila ya munu na kati ya Yesu-Klisto, bonso mu ke longaka na bisika nyonso, na konso dibuundu. 18Bantu ya nkaka me fuluka na lunangu, bonso nde mu ke kwiza na beno ve. 19Kasi mu ke kwiza na beno na nswalu, kana Mfumu ya beto Yesu zola yawu, ebuna mu ke zaba ve mambu yina bantu yayi ya lunangu ke tubaka, kasi ngolo ya bawu. 20Samu Kimfumu ya Tata ya beto kele dyambu ya kutuba ve, kasi dyambu ya ngolo. 21Beno ke zola yinki? Mu kwiza na nti ya kubula, to na luzolo mpe na mpeve ya malembe?