Di Pipo Wey Dey Look After Di Papa Im Hidden Tins
Di Corinthians dey judge dia apostles like say dem be people wey dey rate performers. Paul talk say di only judgement wey matter na di praise wey our Papa go give when di Lord return, e point to im own hunger, beating and how e no get house, and e remind dem say na im born dem for di gospel, so e dey write as papa.
4 1Make una take us as servants of Christ and di pipo wey dey look after di hidden tins of our Papa. 2Wetin dem dey demand from di pipo wey dey look after tins be say dem must to dey faithful. 3But e no be big tin to me whether una judge me, or whether any human court judge me. I no even dey judge my own self. 4I no sabi anytin against my own self, but dat one no mean say I clean. Na our Oga Jesus be di One wey dey judge me. 5So make una no judge before di time reach, before our Oga Jesus go come. E go bring wetin hide for inside darkness come light, and E go show wetin dey inside pipo heart. Den each person go get praise from our Papa.
6My brothers and sisters, I don take dis tin apply am to my own self and Apollos because of una, so dat una fit learn from us no to go pass wetin dem write, and make una no dey blow big-head, dey carry one person put anoda one for ground. 7Because who make you different? Wetin you get wey you no receive? And if you receive am, why you dey brag as if say you no receive am?
8Una don already get all wetin una want! Una don already rich! Una don begin rule without us—I for wish say una really dey rule, so dat we too fit rule together with una! 9Because I dey tink say our Papa put us wey be apostles for last position, like men wey dem don judge say make dem die, because we don turn tin wey di whole world, angels, and pipo dey look. 10We be fools because of Christ, but una be wise pipo for inside Christ. We weak, una strong. Dem dey honor una, dem dey shame us. 11Reach dis very hour we dey hungry, thirst dey catch us, our cloth dey tear-tear, dem dey beat us, and we no get house. 12We dey work hard with our own hand. When dem insult us, we dey bless; when dem persecute us, we dey endure am. 13When dem carry bad name give us, we dey answer soft-soft. Reach today, we don turn di world im rubbish, di dirty wey everybody dey throway.
14I no dey write dis tin to shame una, but to warn una as my pikin dem wey I love well-well. 15Even if una get thousand-thousand teachers for inside Christ, una no get plenty papa—na me born una for inside Christ Jesus through di gospel. a a v15 Paul no dey take di place of our Papa; na instrument for hand wey our Papa dey use born im pikin dem enter di family. Na di gospel imself dey do di born. 16So, I dey beg una, make una follow my example. 17Na because of dis I send Timothy come meet una, my dear pikin wey dey faithful for inside di Lord—e go remind una about my ways for inside Christ Jesus, just as I dey teach for everywhere, for every church. 18Some pipo don dey blow big-head, as if say I no dey come meet una. 19But I go come meet una soon, if our Oga Jesus gree, and I go find out—no be di mouth-talk of dis big-head pipo, but di power wey dem get. 20Because di kingdom of our Papa no be matter of mouth-talk, na matter of power. 21Wetin una want? Make I come with cane, or with love and gentle-gentle spirit?
