1 Corinto 4

4 ¹Isipa kami nga mga alagad ni Cristo ug mga piniyalan sa mga misteryo sa atong Amahan. ²Dugang pa, gikinahanglan sa mga piniyalan nga makita sila nga matinud-anon. ³Apan diyutay ra kaayo kini nga butang kanako kon hukman ba ako ninyo, o sa bisan unsang hukmanan sa tawo. Dili ko gani hukman ang akong kaugalingon. ⁴Wala akoy nahibaloang sala batok sa akong kaugalingon, apan dili kana makapahawas kanako. Ang naghukom kanako mao ang atong Ginoong Jesus. ⁵Busa ayaw paghukom sa dili pa ang panahon, sa dili pa moabot ang atong Ginoong Jesus. Dad-on niya sa kahayag ang mga butang nga tinago diha sa kangitngit ug ipadayag ang mga katuyoan sa mga kasingkasing. Unya ang matag usa makadawat ug pagdayeg gikan sa atong Amahan.

⁶Mga igsoon, gipahiangay ko kini sa akong kaugalingon ug kang Apollos tungod kaninyo, aron makakat-on kamo gikan kanamo nga dili molapas sa unsay nahisulat, ug dili magmapahitas-on, nga mopabor sa usa batok sa uban. ⁷Kay kinsa man ang naghimo kaninyong lahi? Unsa may anaa kaninyo nga wala ninyo madawat? Kon nadawat ninyo kini, nganong manghambog man kamo nga daw wala?

⁸Nabatonan na ninyo ang tanan ninyong gitinguha! Nahimo na kamong dato! Kon wala kami naghari na kamo—maayo pa unta kon naghari gayod kamo, aron makahari usab kami uban kaninyo! ⁹Kay sa akong hunahuna gipasundayag kami sa atong Amahan nga mga apostol ingon nga kataposan, sama sa mga tawo nga gihukman sa kamatayon, kay nahimo kaming talan-awon sa kalibotan, sa mga anghel, ug sa mga tawo. ¹⁰Mga buang-buang kami tungod ni Cristo, apan kamo maalamon diha ni Cristo. Kami mga maluya, kamo mga kusgan. Kamo gipasidunggan, kami gipakaulawan. ¹¹Hangtod niining taknaa gigutom kami, giuhaw, nagkagidlay, gibunalan, ug walay puloy-anan. ¹²Naghago kami pag-ayo pinaagi sa among kaugalingong mga kamot. Sa dihang gibiaybiay kami, nanalangin kami; sa dihang gilutos kami, naglahutay kami. ¹³Sa dihang gibutangbutangan kami, malumo kaming mitubag. Nahimo kaming sagbot sa kalibotan, ang hugaw sa tanan, hangtod niining adlawa.

¹⁴Wala ko kini gisulat aron pakaulawan kamo, kondili aron pasidan-an kamo ingon nga akong hinigugmang mga anak. ¹⁵Bisan tuod aduna kamoy dili maihap nga mga magtutudlo diha ni Cristo, wala kamoy daghang mga amahan—ako ang nahimong amahan ninyo diha ni Cristo Jesus pinaagi sa maayong balita. ^a a v15 Wala ni Pablo pulihi ang atong Amahan; nag-alagad lamang siya ingon nga tawhanong galamiton nga pinaagi kaniya ang atong Amahan nagpahimugso sa iyang mga anak ngadto sa pamilya. Ang maayong balita mismo mao ang nagpahimugso. ¹⁶Busa giawhag ko kamo, panig-ingon kamo kanako. ¹⁷Mao kana nga gipadala ko kaninyo si Timoteo, ang akong hinigugma ug matinud-anong anak diha sa Ginoo—pahinumdoman niya kamo sa akong mga pamaagi diha ni Cristo Jesus, sumala sa akong gipanudlo bisan asa, sa matag iglesia. ¹⁸Ang pipila nagmapahitas-on, nga daw dili ako moanha kaninyo. ¹⁹Apan moanha ako kaninyo sa dili madugay, kon buot sa atong Ginoong Jesus, ug akong masayran dili ang sinultihan niining mga mapahitas-ong tawo, kondili ang ilang gahom. ²⁰Kay ang gingharian sa atong Amahan dili anaa sa sinultihan kondili sa gahom. ²¹Unsa may inyong gusto? Moanha ba ako nga may bunal, o uban sa gugma diha sa espiritu sa kalumo?