Anyakutsalakana a Pinthu Pyakubisika pya Baba
Akorinto asatonga apostolo awo ninga akupasa mbali anayeza akucita maseweso. Paulo alonga kuti ciyeruzo cokha cinafunika ndi kusimbwa na Baba wathu pinadzabwerera Mbuya, apangiza njala yace, kumenywa kwace na kusaya nyumba, mbaakumbusa kuti iye adaabala mu mphangwa zadidi, natenepa asalemba ninga baba.
4 1Mutione ife ninga atumiki a Kirixtu na anyakutsalakana a pinthu pyakubisika pya Baba wathu. 2Pontho, pinafunika kuna anyakutsalakana kuti agumanike akukhulupirika. 3Mbwenye kuna Ine ndi cinthu cakucepa khala munanditonga imwe, peno nyakutonga unango wa anthu. Nee kunditonga ndekhene tayu. 4Ine nkhabe kudziwa cinthu cakuipa cakulanga ekhene, mbwenye pyenepi nkhabe kundicitisa kukhala wakusowa mulando tayu. Ule anaonditonga Ine ndi Mbuya wathu Yezu. 5Na tenepo lekani kutonga mbudzati kukwana n'dzidzi, mbadzati kubwera Mbuya wathu Yezu. Iye anadzabweresa ceza pa pinthu pyakubisika n'cidima, mbapangiza pinafuna mitima ya anthu. Penepo m'bodzi na m'bodzi anadzatambira kusimbwa kuna Baba wathu.
6Abale, pinthu pyenepi ndapiphatisira kuna Ine na Apolo thangwi ya imwe, toera mupfundze kuna ife kukhonda kupita padzulu pa pidalembwa, pontho toera mukhonde kudzikuza mbamufuna m'bodzi kupita unango. 7Thangwi mbani anakucitisani kukhala wakusiyana? Ndi cinthu canji cili na imwe cidakhonda imwe kutambira? Mungakhala mwacitambira, thangwi yanji musadzikuza ninga nee mwacitambira tayu?
8Kale-kene imwe muli na pyonsene pinafuna imwe! Kale mwakhala anyakupfuma! Imwe mwatoma kutonga mwakusowa ife—mbenga mwene mukhatonga ndimomwene, toera na ife tikhatonga pabodzi na imwe! 9Thangwi ndisanyerezera kuti Baba wathu atipangiza ife apostolo pakumalisa, ninga anthu adatongwa kuti afe, thangwi takhala cinthu cakuonekera kuna dziko, kuna aanju, na kuna anthu. 10Ife ndife apswiru thangwi ya Kirixtu, mbwenye imwe ndimwe anyandzeru mwa Kirixtu. Ife ndife akufewa, imwe ndimwe akuwanga. Imwe ndimwe akulemedzwa, ife ndife akupwazwa. 11Mpaka ndzidzi uno tisabva njala na nyota, tisabvala nguwo zakung'ambika, tisamenywa, pontho tiribe nyumba. 12Tisaphata basa mwakuwanga na manja athu ene. Angatixinga, ife tisapasa nkhombo; angatitambuza, ife tisapirira. 13Angatilonga mwakuipa, tisatawira mwakupfatsa. Takhala ninga pyakutaika pya dziko, ninga pinyalala pya anthu onsene, mpaka lero.
14Ine nkhabe kulemba pyenepi toera kukupasani manyadzo tayu, mbwenye toera kukucenjezani ninga ana anga akufunika. 15Maseze imwe muli na atsogoleri azinji mwa Kirixtu, nkhabe kukhala na ababa azinji tayu—Ine ndakubalani mwa Kirixtu Yezu kubulukira mu Mphangwa Zadidi. a a v15 Paulu nkhabe kukhala m'mbuto mwa Baba wathu tayu; iye ndi citsogwa ca umunthu cidaphatisira Baba wathu toera kubala anace mu banja. Mphangwa Zadidi zokhene ndizo zisacita kubala. 16Na tenepo ndisakudembeterani, khalani anyakutewezera Ine. 17Ndicho cifukwa ndakutumizirani Timoti, mwananga wakufunika na wakukhulupirika mwa Mbuya—iye anadzakukumbusani njira zanga mwa Kirixtu Yezu, ninga munapfundzisa Ine konsene-konsene, mu mpingo onsene. 18Anango asadzikuza, ninga kuti Ine nkhabe kubwera kuna imwe. 19Mbwenye Ine ndinadzabwera mwakucimbiza kuna imwe, Mbuya wathu Yezu angafuna, toera kudziwa, tayu malongero a anthu anewa akudzikuza, mbwenye mphambvu yawo. 20Thangwi Umambo wa Baba wathu nkhabe kukhala pya malongero tayu, mbwenye pya mphambvu. 21Musafuna ninji? Ndibwere na nthonga, peno na kufuna mu nzimu wakupfatsa?
