1 Kọrinti 4

4 ¹Ẹ wò wá gẹ́gẹ́ bí àwọn ìránṣẹ́ Kristi àti àwọn ìríjú àṣírí Baba wa. ²Síwájú sí i, ohun tí a ń béèrè lọ́wọ́ àwọn ìríjú ni pé kí a rí wọn ní olóòótọ́. ³Ṣùgbọ́n kò jẹ́ nǹkankan fún mi bóyá ẹ̀yin ń dá mi lẹ́jọ́, tàbí ilé ẹjọ́ ènìyàn kankan ń ṣe bẹ́ẹ̀. Èmi kì í tiẹ̀ dá ara mi lẹ́jọ́. ⁴Èmi kò mọ ohunkóhun lòdì sí ara mi, ṣùgbọ́n èyí kò dá mi láre. Ẹni tí ó ń dá mi lẹ́jọ́ ni Olúwa wa Jesu. ⁵Nítorí náà, ẹ má ṣe dájọ́ ṣáájú àkókò rẹ̀, kí Olúwa wa Jesu tó dé. Òun yóò mú ohun tí ó fi pamọ́ nínú òkùnkùn wá sí ìmọ́lẹ̀, yóò sì ṣí èrò ọkàn payá. Nígbà náà ni olúkúlùkù yóò gba ìyìn láti ọ̀dọ̀ Baba wa.

⁶Ẹ̀yin ará, mo ti fi èyí sílò fún ara mi àti Apollo nítorí yín, kí ẹ̀yin lè kọ́ lára wa pé kí ẹ má ré kọjá ohun tí a ti kọ, àti kí ẹ má ṣe gbéraga, láti máa ṣe ojúsàájú ẹnìkan ju òmíràn lọ. ⁷Nítorí ta ni ó sọ ọ́ di ọ̀tọ̀? Kí ni ìwọ ní tí ìwọ kò gbà? Bí ìwọ bá sì gbà á, èéṣe tí ìwọ fi ń ṣògo bí ẹni pé ìwọ kò gbà á?

⁸Ẹ ti ní gbogbo ohun tí ẹ fẹ́ tẹ́lẹ̀! Ẹ ti di ọlọ́rọ̀ tẹ́lẹ̀! Láìsí wa, ẹ ti bẹ̀rẹ̀ sí í jọba—ìbá ṣe pé ẹ̀yin jọba nítòótọ́, kí àwa pẹ̀lú lè bá yín jọba! ⁹Nítorí mo rò pé Baba wa ti fi àwa aposteli hàn gẹ́gẹ́ bí ẹni ìkẹyìn, bí àwọn ènìyàn tí a dájọ́ ikú fún, nítorí àwa ti di ìran fún ayé, fún àwọn áńgẹ́lì, àti fún ènìyàn. ¹⁰Àwa jẹ́ òmùgọ̀ nítorí Kristi, ṣùgbọ́n ẹ̀yin gbọ́n nínú Kristi. Àwa jẹ́ aláìlera, ẹ̀yin ní agbára. A bọ̀wọ̀ fún yín, a sì kẹ́gàn wa. ¹¹Títí di wákàtí yìí, ebi ń pa wá, òǹgbẹ ń gbẹ wá, aṣọ wa sì fàya, a ń lù wá, a kò sì ní ibùgbé. ¹²Àwa ń ṣe làálàá pẹ̀lú ọwọ́ ara wa. Nígbà tí a bá kẹ́gàn wa, àwa a súre; nígbà tí a bá ṣe inúnibíni sí wa, àwa a faradà. ¹³Nígbà tí a bá sọ̀rọ̀ ẹ̀gàn sí wa, àwa a fi ìwà pẹ̀lẹ́ dáhùn. Àwa ti di ìdọ̀tí ayé, àti ẹ̀gbin gbogbo ènìyàn, títí di òní.

¹⁴Èmi kò kọ nǹkan wọ̀nyí láti dójútì yín, bí kò ṣe láti kìlọ̀ fún yín gẹ́gẹ́ bí àwọn ọmọ mi olùfẹ́. ¹⁵Bí ó tilẹ̀ jẹ́ pé ẹ ní ẹgbẹ̀rún atọ́nà nínú Kristi, ẹ kò ní baba púpọ̀—èmi ni mo bí yín nínú Kristi Jesu nípasẹ̀ ìhìnrere. ^a a v15 Paulu kò dìípò Baba wa; ó jẹ́ ohun èlò ènìyàn tí Baba wa fi ń bí àwọn ọmọ rẹ̀ sínú ìdílé. Ìhìnrere fúnra rẹ̀ ni ó ń ṣe ìbímọ náà. ¹⁶Nítorí náà, mo rọ̀ yín, ẹ máa ṣe àfarawé mi. ¹⁷Ìdí nìyí tí mo fi rán Timoteu sí yín, ọmọ mi olùfẹ́, olóòótọ́ nínú Olúwa—òun yóò rán yín létí ọ̀nà mi nínú Kristi Jesu, gẹ́gẹ́ bí mo ti ń kọ́ni níbi gbogbo, ní gbogbo ìjọ. ¹⁸Àwọn kan ń gbéraga, bí ẹni pé èmi kì yóò wá sọ́dọ̀ yín. ¹⁹Ṣùgbọ́n èmi yóò wá sọ́dọ̀ yín láìpẹ́, bí Olúwa wa Jesu bá fẹ́, èmi yóò sì wádìí kì í ṣe ọ̀rọ̀ àwọn agbéraga wọ̀nyí, bí kò ṣe agbára wọn. ²⁰Nítorí ìjọba Baba wa kì í ṣe ní ti ọ̀rọ̀ bí kò ṣe ní ti agbára. ²¹Kí ni ẹ fẹ́? Kí èmi fi ọ̀pá wá, àbí pẹ̀lú ìfẹ́ nínú ẹ̀mí ìwà pẹ̀lẹ́?