1 Kọrinti 3

3 ¹Ẹ̀yin ará, èmi kò lè bá yín sọ̀rọ̀ bí ẹni tí í ṣe ti Ẹ̀mí, bí kò ṣe bí ẹni tí í ṣe ti ara—àwọn ìkókó nínú Kristi. ²Mo fi wàrà fún yín, kì í ṣe oúnjẹ líle, nítorí ẹ kò tí ì múra tán. Àní nísisìyí, ẹ kò tí ì múra tán síbẹ̀. ³Ẹ̀yin ṣì jẹ́ ti ara. Níwọ̀n bí owú àti ìjà ti wà láàrin yín, ẹ kò ha jẹ́ ti ara, tí ẹ sì ń gbé ìgbé-ayé gẹ́gẹ́ bí ìlànà ènìyàn? ⁴Nítorí nígbà tí ẹnìkan bá wí pé, “Èmi tẹ̀lé Paulu,” tí òmíràn sì wí pé, “Èmi tẹ̀lé Apollo,” ẹ kò ha ń hùwà bí ènìyàn lásán?

⁵Kí ha ni Apollo? Kí ni Paulu? Àwọn ìránṣẹ́ tí ẹ gbà gbọ́ láti ipasẹ̀ wọn, olúkúlùkù gẹ́gẹ́ bí Olúwa ti fi fún un. ⁶Èmi gbìn, Apollo bomirin, ṣùgbọ́n Baba wa ni ó mú un dàgbà. ⁷Nítorí náà, ẹni tí ó gbìn kì í ṣe ohunkóhun, bẹ́ẹ̀ ni ẹni tí ó bomirin—bí kò ṣe Baba wa nìkan, ẹni tí ó ń mú un dàgbà. ⁸Ẹni tí ó gbìn àti ẹni tí ó bomirin jẹ́ ọ̀kan; olúkúlùkù yóò sì gba èrè tirẹ̀ gẹ́gẹ́ bí iṣẹ́ àṣekára tirẹ̀. ⁹Nítorí àwa jẹ́ alábàáṣiṣẹ́pọ̀ Baba wa; ẹ̀yin ni oko rẹ̀, ilé rẹ̀.

¹⁰Nípa oore-ọ̀fẹ́ tí Baba wa fún mi, mo fi ìpìlẹ̀ lélẹ̀ bí ọ̀gá ọ̀mọ̀wé akọ́lé, ẹlòmíràn sì ń kọ́ sórí rẹ̀. Ẹ jẹ́ kí olúkúlùkù kíyèsí bí ó ti ń kọ́ sórí rẹ̀. ¹¹Nítorí kò sí ẹni tí ó lè fi ìpìlẹ̀ mìíràn lélẹ̀ yàtọ̀ sí èyí tí a ti fi lélẹ̀, èyí tí í ṣe Jesu Kristi. ¹²Nísisìyí, bí ẹnikẹ́ni bá kọ́lé sórí ìpìlẹ̀ náà pẹ̀lú wúrà, fàdákà, òkúta iyebíye, igi, koríko, tàbí àṣẹ́kù ọkà, ¹³iṣẹ́ olúkúlùkù yóò di mímọ̀ gbangba, nítorí Ọjọ́ náà yóò fi í hàn, nítorí iná yóò ṣí i payá, iná náà gan-an sì yóò dán iṣẹ́ olúkúlùkù wò láti mọ irú rẹ̀. ¹⁴Bí iṣẹ́ tí ẹnikẹ́ni kọ́ bá dúró, òun yóò gba èrè. ¹⁵Bí iṣẹ́ ẹnikẹ́ni bá jóná, òun yóò jìyà òfò—síbẹ̀ a ó gba òun tìkára rẹ̀ là, ṣùgbọ́n gẹ́gẹ́ bí ẹni tí ó la àárín iná kọjá.

¹⁶Ẹ kò ha mọ̀ pé ẹ̀yin ni tẹmpili Baba wa, àti pé Ẹ̀mí Baba wa ń gbé inú yín? ¹⁷Bí ẹnikẹ́ni bá ba tẹmpili Baba wa jẹ́, Baba wa yóò ba òun jẹ́. Nítorí tẹmpili Baba wa jẹ́ mímọ́, ẹ̀yin sì ni tẹmpili náà.

¹⁸Ẹ má ṣe jẹ́ kí ẹnikẹ́ni tan ara rẹ̀ jẹ. Bí ẹnikẹ́ni láàrin yín bá rò pé òun gbọ́n ní ayé yìí, kí ó di òmùgọ̀, kí ó lè di ọlọ́gbọ́n. ¹⁹Nítorí ọgbọ́n ayé yìí jẹ́ òmùgọ̀ lójú Baba wa. Nítorí Ìwé Mímọ́ wí pé, “Ó fi ọgbọ́n àrékérekè wọn mú àwọn ọlọ́gbọ́n,” ²⁰àti pẹ̀lú, “Baba wa mọ èrò àwọn ọlọ́gbọ́n, pé asán ni wọ́n.” ²¹Nítorí náà, ẹ má ṣe jẹ́ kí ẹnikẹ́ni ṣògo nípa ènìyàn. Nítorí ohun gbogbo jẹ́ tiyín, ²²ìbá à ṣe Paulu tàbí Apollo tàbí Kefa, tàbí ayé tàbí ìyè tàbí ikú, tàbí ohun tí ń bẹ nísisìyí tàbí ohun tí ń bọ̀—gbogbo rẹ̀ jẹ́ tiyín, ²³ẹ̀yin sì jẹ́ ti Kristi, Kristi sì jẹ́ ti Baba wa.