1 Kọrinti 2

2 ¹Nígbà tí mo wá sọ́dọ̀ yín, ẹ̀yin ará, èmi kò fi ọ̀rọ̀ ọ̀ṣọ́ tàbí ọgbọ́n kéde ẹ̀rí Baba wa. ²Nítorí mo pinnu láti má mọ ohunkóhun láàrin yín bí kò ṣe Jesu Kristi, àti òun tí a kàn mọ́ àgbélébùú. ³Mo sì wá sọ́dọ̀ yín ní àìlera, ní ìbẹ̀rù, àti pẹ̀lú ìwárìrì púpọ̀. ⁴Ọ̀rọ̀ mi àti ìwàásù mi kò gbékarí ọ̀rọ̀ ìyíni-lọ́kàn-padà ti ọgbọ́n, bí kò ṣe lé ìfihàn Ẹ̀mí Mímọ́ àti ti agbára, ⁵kí ìgbàgbọ́ yín má bàa gbékarí ọgbọ́n ènìyàn bí kò ṣe agbára Baba wa.

⁶Àwa a máa sọ ọgbọ́n láàrin àwọn tí ó dàgbà ní ẹ̀mí—kì í ṣe ọgbọ́n ayé yìí, tàbí ti àwọn alákòóso ayé yìí, tí ń parẹ́ lọ. ⁷Bẹ́ẹ̀ kọ́, àwa ń sọ ọgbọ́n Baba wa, àṣírí tí ó pamọ́ tí Baba wa ti yàn tẹ́lẹ̀ ṣáájú kí ayé tó bẹ̀rẹ̀, fún ògo wa. ⁸Kò sí ẹnìkan nínú àwọn alákòóso ayé yìí tí ó mọ̀ ọ́n; ìbá ṣe pé wọ́n mọ̀ ọ́n, wọn kì bá tí kan Olúwa ògo mọ́ àgbélébùú. ⁹Gẹ́gẹ́ bí a ti kọ ọ́ pé: “Ohun tí ojú kankan kò tí ì rí, tí etí kankan kò tí ì gbọ́, tí kò sì wọ ọkàn ènìyàn kankan rí—nǹkan wọ̀nyí ni Baba wa ti pèsè sílẹ̀ fún àwọn tí ó fẹ́ràn rẹ̀.”

¹⁰Ṣùgbọ́n Baba wa ti fi wọ́n hàn fún wa nípasẹ̀ Ẹ̀mí; nítorí Ẹ̀mí ń wádìí ohun gbogbo, àní ìjìnlẹ̀ Baba wa. ¹¹Ta ni ó mọ èrò inú ènìyàn bí kò ṣe ẹ̀mí ara rẹ̀ tí ń bẹ nínú rẹ̀? Bẹ́ẹ̀ gẹ́gẹ́ ni, kò sí ẹni tí ó mọ èrò Baba wa bí kò ṣe Ẹ̀mí Baba wa. ¹²Àwa kò gba ẹ̀mí ayé, bí kò ṣe Ẹ̀mí tí ó ti ọ̀dọ̀ Baba wa wá, kí àwa lè mọ ohun tí Baba wa fi fún wa lọ́fẹ̀ẹ́. ¹³Èyí ni àwa ń sọ, kì í ṣe ní ọ̀rọ̀ tí ọgbọ́n ènìyàn ń kọ́ni ṣùgbọ́n tí Ẹ̀mí ń kọ́ni, ní ṣíṣàlàyé òtítọ́ tẹ̀mí fún àwọn ènìyàn tẹ̀mí. ¹⁴Ẹni tí kò ní Ẹ̀mí kì í gba ohun tí ó ti ọ̀dọ̀ Ẹ̀mí Baba wa wá; òmùgọ̀ ni ó jẹ́ lójú rẹ̀, kò sì lè mọ̀ ọ́n, nítorí pé nípasẹ̀ òye tẹ̀mí ni a fi ń fòye mọ̀ ọ́n. ¹⁵Ẹni tí ó jẹ́ ti ẹ̀mí ń fòye mọ ohun gbogbo, ṣùgbọ́n òun fúnra rẹ̀ kò sí lábẹ́ ìdájọ́ ẹnikẹ́ni. ¹⁶Nítorí “ta ni ó ti mọ èrò inú Baba wa, láti kọ́ ọ ní ẹ̀kọ́?” Ṣùgbọ́n àwa ní èrò inú Kristi.