Peiseia Thüngbü Khrista Limanje Aikei Aying

Paulei maangsangko hemaibü ngüh ayingko loukei, amon Jisu Khrista peiseia thüngbü ong hao to limanje aieikei, khünei haoeneibü mailem songdakbou cheeibü songsihona ayingko, seneibü Bou aukaba phokulabü shanga. Haoeikei lenbü songsihon kho huphang ki, kaodak akhangjinei teten janenbü, hoba seneibü Bou Soushouei kho tetsilaje ong ngelabü.

Chapter 2.

Jaisinasi shuong, ngo kan jungto loujinei, ngei hemaibü ngüh ayingsi songsihonei seneibü Bou aukabü aphinthonkei. Aishanga kan amon Jisu Khrista hoba peiseia thüngbü hao to limanje aieikei angela ngei maangsangko kikei. Hoba ngo hau akiko, hatko hoba yongko lühjilühko kan jungto loukei. Ngeibü ngüh hoba ngekbü kho songsihonei suletan ngüha aying, lausikei Soushou Saopobü hoba haueibü tetsida danko kikei, khoei kaneibü mailem kho müteibü songsihona aki, lausikei seneibü Bou haua kikei.

Künei penbü shuong amon songsihon lenda; kho ho meten songsihon aying, ayingsi ho meten dankhümla kibü songdakbü shuongeibü songsihon aying. Lausikei künei seneibü Bou songsihon, kho huan phoan kibü hangsilam che lenda, laobou seneibü soneikangbü shanga kaodak akhangjinei seneibü Bouei teten janenbü kikei. Ho meten songdakbü shuong aoeikei kho angekei; haoenei ngea tegüje, soneikangbü Bunyubou to peiseia athüngbü. Ho doakei, “Nyekei aühüpbü, nouei aditbü, hoba müteibü maangpona aütbü shuong, habü shuong seneibü Bouei hao to sanoubü shuong shanga lamlekei.”

Lausikei seneibü Bouei Soushou danko kho shuong sen la tang khittikei; aishanga Soushouei ajanjan pendou, haü seneibü Bou yungnyukei lamda. Müt cheeibü thounoubü to haoeibü maanga kibü soushou to limanje aoei ngeda? Kho tegü seneibü Bou Soushou to limanje aoeikei seneibü Bou thounoubü angeda. Künei kaodak soushou asungletkei, lausikei seneibü Bou ka kibü Soushou sungletkei; khoei seneibü Bouei sen la amakhetko kubü shuong senei ngelabü. Künei khübü lenda; kho müteibü songsihonei leilutibü ngüha aying, lausikei Soushouei leilutibü ngüha, soushou shangabü thinei soushou shuong to suletan lenda. Soushou aki müt kho seneibü Bou Soushou ka loubü shuong asungletda; kho hao shanga ngoubü ki, hoba haoei kho aditenda, aishanga kho soushou danko shenenla khambü ki. Soushoubü müt kho ajanjan pendou shenenla thükda, lausikei himshuong kho aoeibü matjema aki. Aishanga, “Aoei seneibü Bou maangpon ngeakei, hao to leilutila?” Lausikei sen to Khrista maangpon kia.