1 കൊരിന്ത്യർ 2 FHB Father's Heart Bible™

2 ¹സഹോദരീസഹോദരന്മാരേ, ഞാൻ നിങ്ങളുടെ അടുക്കൽ വന്നപ്പോൾ, വാക്ചാതുര്യത്തോടെയോ ജ്ഞാനത്തോടെയോ അല്ല നമ്മുടെ പിതാവിന്റെ സാക്ഷ്യം ഞാൻ ഘോഷിച്ചത്. ²എന്തെന്നാൽ, ക്രൂശിക്കപ്പെട്ടവനായ യേശുക്രിസ്തുവിനെയല്ലാതെ മറ്റൊന്നും നിങ്ങളുടെ ഇടയിൽ അറിയാതിരിക്കുവാൻ ഞാൻ നിശ്ചയിച്ചിരുന്നു. ³ബലഹീനതയോടും ഭയത്തോടും വളരെ വിറയലോടുംകൂടി ഞാൻ നിങ്ങളുടെ അടുക്കൽ വന്നു. ⁴എന്റെ വചനവും പ്രസംഗവും ജ്ഞാനത്തിന്റെ വശീകരണവാക്കുകളെയല്ല, പരിശുദ്ധാത്മാവിന്റെയും ശക്തിയുടെയും തെളിവിനെയാണ് ആശ്രയിച്ചത്, ⁵നിങ്ങളുടെ വിശ്വാസം മാനുഷികജ്ഞാനത്തിലല്ല, നമ്മുടെ പിതാവിന്റെ ശക്തിയിൽ ആശ്രയിച്ചിരിക്കേണ്ടതിന്.

⁶പക്വതയുള്ളവരുടെ ഇടയിൽ ഞങ്ങൾ ജ്ഞാനം സംസാരിക്കുന്നു—ഈ യുഗത്തിന്റെ ജ്ഞാനമല്ല, നശിച്ചുപോകുന്ന ഈ യുഗത്തിന്റെ അധിപതികളുടെ ജ്ഞാനവുമല്ല. ⁷ഇല്ല, നമ്മുടെ പിതാവിന്റെ ജ്ഞാനമാണ് ഞങ്ങൾ സംസാരിക്കുന്നത്; നമ്മുടെ മഹത്ത്വത്തിനായി കാലം ആരംഭിക്കുന്നതിനുമുമ്പ് നമ്മുടെ പിതാവ് നിയമിച്ച, മറഞ്ഞിരുന്ന രഹസ്യമത്രേ അത്. ⁸ഈ യുഗത്തിന്റെ അധിപതികളിൽ ആരും അത് അറിഞ്ഞില്ല; അറിഞ്ഞിരുന്നെങ്കിൽ, അവർ മഹത്ത്വത്തിന്റെ കർത്താവിനെ ക്രൂശിക്കുകയില്ലായിരുന്നു. ⁹എഴുതിയിരിക്കുന്നതുപോലെ: “ഒരു കണ്ണും കണ്ടിട്ടില്ലാത്തതും ഒരു ചെവിയും കേട്ടിട്ടില്ലാത്തതും ഒരു മനുഷ്യഹൃദയവും നിരൂപിച്ചിട്ടില്ലാത്തതുമായവ—അവിടുത്തെ സ്നേഹിക്കുന്നവർക്കുവേണ്ടി നമ്മുടെ പിതാവ് ഒരുക്കിയിരിക്കുന്നു.”

¹⁰എന്നാൽ നമ്മുടെ പിതാവ് ആത്മാവിലൂടെ അവ നമുക്ക് വെളിപ്പെടുത്തി; എന്തെന്നാൽ ആത്മാവ് സകലവും, നമ്മുടെ പിതാവിന്റെ ആഴങ്ങൾപോലും, പരിശോധിക്കുന്നു. ¹¹ഒരു മനുഷ്യന്റെ ഉള്ളിലുള്ള തന്റെ ആത്മാവല്ലാതെ അവന്റെ വിചാരങ്ങൾ ആർ അറിയുന്നു? അങ്ങനെതന്നെ, നമ്മുടെ പിതാവിന്റെ ആത്മാവല്ലാതെ നമ്മുടെ പിതാവിന്റെ വിചാരങ്ങൾ ആരും അറിയുന്നില്ല. ¹²നമ്മുടെ പിതാവ് നമുക്ക് സൗജന്യമായി നല്കിയത് നാം അറിയേണ്ടതിന്, ലോകത്തിന്റെ ആത്മാവിനെയല്ല, നമ്മുടെ പിതാവിൽനിന്നുള്ള ആത്മാവിനെയാണ് നാം പ്രാപിച്ചത്. ¹³മാനുഷികജ്ഞാനം പഠിപ്പിക്കുന്ന വാക്കുകളിലല്ല, ആത്മാവ് പഠിപ്പിക്കുന്ന വാക്കുകളിൽ ഇത് ഞങ്ങൾ സംസാരിക്കുന്നു; ആത്മീയകാര്യങ്ങൾ ആത്മീയമനുഷ്യർക്ക് വിവരിച്ചുകൊടുക്കുന്നു. ¹⁴ആത്മാവില്ലാത്ത മനുഷ്യൻ നമ്മുടെ പിതാവിന്റെ ആത്മാവിൽനിന്നു വരുന്നതു സ്വീകരിക്കുന്നില്ല; അത് അവന് ഭോഷത്തമായിരിക്കുന്നു, ആത്മീയവിവേചനം ആവശ്യമായതിനാൽ അവന് അതു ഗ്രഹിക്കുവാൻ കഴിയുകയുമില്ല. ¹⁵ആത്മീയനായ മനുഷ്യൻ സകലവും വിവേചിക്കുന്നു, എന്നാൽ അവനോ ആരുടെയും വിധിക്കു വിധേയനല്ല. ¹⁶എന്തെന്നാൽ, “നമ്മുടെ പിതാവിന്റെ മനസ്സ് അറിഞ്ഞ്, അവിടുത്തെ ഉപദേശിക്കുവാൻ ആർക്കു കഴിഞ്ഞിരിക്കുന്നു?” എന്നാൽ ഞങ്ങൾക്കോ ക്രിസ്തുവിന്റെ മനസ്സുണ്ട്.