Cross pi Bakhai Thangnu Christa Khatcha
Paul na batak takka chong kungnu makka, cross pi bakhai thangnu Christa ting pui langna hung rwe, hagana bani balumsat ga chong kabiapa om kutthiam lang bi makka ani Pa om nat lang bi ong lang nge. Maanna hiak thangnu ningting ga sinnuwe, kama bakaan to ta mak basaan daan thang damnu, khatle ani Pa om Katha na pi mu thang beida ting theinu ye.
2 1Unao rwan ga, eina nani khou hung kaan bi, chong kungnu mak tabe ningting toga ani Pa om sake ding kasam make. 2Balangbe nani lak pina Jisu Christa, khatle cross pi bakhai thangnu Maan ting makka, pa-aam khatchale thei lang make diga ei asung han rwe. 3Atiga eina ason toga, kachiga khatle rakanga kathokka nani khou hung rwe. 4Achong le kasam tonu le ningting om munthiam sanu chong lang bi makka, atiyeda Katha Bathiangnu khatle nat om batake lang bi hanne, 5dinuba nani balumsanu ga misa om ningting lang bi makka, atiyeda ani Pa om nat lang bi han lang nge.
6Anina mipu phanu bing pek la ningting ding rinnuwe; haga heiba bakaan om ningting makka, thita dam dingnu heiba bakaan om bapuba rwan om ningting le make. 7Atiyeda anina ani Pa om ningting, dinuba bakaan dam mak baleina ani lwat lang ani Pa na ka thang thangnu inkam thang ongnu inthim chong ding rinnuwe. 8Heiba bakaan om bapuba rwan pakhatchana le ha ding thei make; banina thei damme dabe, lwat om Pukraangba ding cross pi bakhai thang mak ngaake. 9Bahiak thangnu nung suiga: “Mik pakhatchana le mu maknu, kana pakhatchana le ngai maknu, khatle misa sung bi le hung tang maknu thinu bing ding Maan ding kriangnu bing lang ani Pa na daan thang dam rwe.”
10Atiyeda ani Pa na Katha paan bina ha bing ding ani khou pi indao thang rwe; balangbe Katha na thinu bingza, ani Pa om kathuknu bing le zong ongme. 11Misa sung bi ongnu baom katha ting makka, misa om sung baning ding tuna theinu ngambo? Hadanga, ani Pa om Katha ting makka, ani Pa om sung baning ding pakhatchana le thei make. 12Anina talei ram om katha lousu make, atiyeda ani Pa khouna Katha ding lousu rwe; dinuba ani Pa na ani khou thangga pi thang damnu bing ding anina thei lang nge. 13Anina heiya, misa om ningting na bachu thangnu chongna make, atiyeda Katha na bachu thangnu chongna, katha om mi bing khou katha om thinu bing ding rin bachak thangga rinnuwe. 14Katha maknu misa gana ani Pa om Katha khou naa hungnu bing ding lou make; ha bing ga bating lang bi kapangnuwe, khatle maanna ha bing ding thei ngam make, balangbe ha bing ding ga katha om kakoi baze theinuna khatchale thei ngamnuwe. 15Katha om mi gana thinu bingza kakoi baze theinu ngamme, atiyeda bating ga pakhatcha om chongsem thwei bi le amnu make. 16Balangbe, “Maan ding bachu thang lang ani Pa om sung ding tuna theinu ngambo?” Atiyeda ani khou Christa om sung amme.