Krushli Shaoshān Kahai Khrista Maningla
Paulna hangkhavai kasāthar kha eina mashokmana, Christ sipatonli kathi kha maman kaphok hangkhui, awui kasakwui shitsanphāli ithumwui Avāwui sakti eina sākhavai, mi kahangwui ngasama eina masākhavai. Ana tamchithei khala ngasama chi kaphok lei, kazing kasāsa mangāli sāthanghaira, kala ithumwui Avāwui Manglāna maphongda eina maman theikhui.
2 1Ivānaongarā, ina nathumli kharā tharan ithumwui Avāwui shākhi chi tui kahakmahā lah thangkhamei eina mahāshokmana. 2Kaja ina nathumwui ngachaili Jishu Khrista kala krushli shaoshān kahai a maningla khikha matheikharar da ina ningtithaowa. 3Kala ina nathumli khangazan eina, khangachee eina kala kathirriri tarākha eina rai. 4Iwui paokaphā kala hāshok chi thangkhamei suikaphanep tui eina machigatmana, kha Manglā Kathara kala pangshapwui theishingkakhui eina chigata. 5Chiwui vang eina nathumwui shitkasang chi miwui thangkhameili machihamla, kha ithumwui Avāwui pangshapli chigatphalungra.
6Ithumna khararnaobingwui ngachaili thangkhamei tui hānga. Kha chi mithot hiwui thangkhamei maningmana, shimānhaora khalei mithot hiwui khamungabingwui thangkhameila maningmana. 7Kha ithumna ithumwui Avāwui thangkhamei, atam masāranglakhawui eina ithumwui Avāna ithumwui tekhamateiwui vang ngarānping kahai ngathumda leikahai kathuka tui chi hānga. 8Mithot hiwui khamungabing khipānakha chi matheimana; athumna theisāsi kaje, tekhamatei Proholi krushli mashaoshānmara. 9Hithada kapihaida lei: "Mik akhala matheikasa, khanā akhala mashākahai, kala miwui ning akhala maphaningkasa, ot saikora hi ithumwui Avāna ali leishibingwui vang ngarān kahaina."
10Kha ithumwui Avāna Manglāwui mangā eina ithumli chi theingasakhaira; kaja Manglāna ot saikora, ithumwui Avāwui kathuka ngathumbingla tangda chāng yanga. 11Miwui kaphaning chi awuili khalei awui manglā maningla khipāna theikhala? Chi tākam eina, ithumwui Avāwui Manglā maningla khipānakha ithumwui Avāwui kaphaning matheimana. 12Ithumwui Avāna ithumli aremali mikahai chi theikhavai, ithumna okathuiwui manglā masamphangmana, kha ithumwui Avāwui eina kharā Manglā chi samphanga. 13Manglārinwui mibingli manglāwui tui hāngchitheida, ithumna hi miwui thangkhameina tamchithei tui eina maningla kha Manglāna tamchithei tui eina hānga. 14Manglā makatheia mi chi ithumwui Avāwui Manglāwui eina kharā chi makhuimana; chi awui vanga mangkhama̱na, kala chi ana matheikhuishaprarmana, kaja chi manglāwui theishap eina maningla matheirarmana. 15Manglārinwui mi chiya ot saikora theisera, kha a khalatta chiya khipākhana bichar masārarmana. 16Kaja "ali tamchithei khavai ithumwui Avāwui ning chi khipāna theikhala?" Kha ithumli Khristawui ning lei.
