Wala Kondi si Cristo nga Ginlansang sa Krus

Si Pablo tuyo nga nagkadto nga wala sing makahibulong nga pagpamulong, kundi si Cristo lamang nga gintigbaong, agod ang pagtuo nila indi sa kahanas sang manugwali kundi sa gahum sang aton Amay. Ang kaalam nga ginatudlo niya natago, hinanda antes pa magsugod ang tion, kag mahibaluan lamang kon ipahayag sang Espiritu sang aton Amay.

Kapitulo 2.

Sang nagkari ako sa inyo, mga kauturan, wala ko ginbantala ang pagpamatuud sang aton Amay paagi sa matahum nga mga pulong ukon kaalam. Kay ginpat-od ko nga wala ako sing iban nga pagahibaluon sa tunga ninyo luwas kay Jesu-Cristo, kag sia nga ginlansang sa krus. Kag nagkari ako sa inyo nga may kaluyahon, may kahadlok, kag may daku nga pagkurog. Wala magsandig ang akon mensahe kag pagwali sa makapahaylo nga mga pulong sang kaalam, kondi sa pamatuud sang Espiritu Santo kag sang gahum, agud nga ang inyo pagtuo indi magsandig sa kaalam sang tawo kondi sa gahum sang aton Amay.

Nagahambal gid kami sing kaalam sa tunga sang mga hamtong—indi kaalam sang sini nga panahon, ukon sang mga pangulo sang sini nga panahon, nga nagakadula. Indi, kondi ginahambal namon ang kaalam sang aton Amay, isa ka natago nga misteryo nga gintalana sang aton Amay antes pa nagsugod ang panahon, para sa aton himaya. Wala sing isa sa mga pangulo sang sini nga panahon nga nakahibalo sini; kay kon nahibaluan pa nila, wala kuntani nila ginlansang sa krus ang Ginoo sang himaya. Subong sang nasulat, “Ang wala makita sang mata, wala mabatian sang dulunggan, kag wala mahunahuna sang tagipusuon sang tawo—ini nga mga butang ang ginhanda sang aton Amay para sa mga nagahigugma sa iya.”

Apang ginpahayag ini sang aton Amay sa aton paagi sa Espiritu; kay ginausisa sang Espiritu ang tanan nga butang, bisan pa ang kadalumon sang aton Amay. Sin-o bala ang nakahibalo sang mga hunahuna sang isa ka tawo kondi ang iya kaugalingon nga espiritu nga yara sa iya? Subong man, wala sing nakahibalo sang mga hunahuna sang aton Amay kondi ang Espiritu sang aton Amay. Indi ang espiritu sang kalibutan ang aton nabaton, kondi ang Espiritu nga halin sa aton Amay, agud nga mahibaluan naton ang mga butang nga ginhatag sa aton sing hilway sang aton Amay. Ginahambal namon ini, indi sa mga pulong nga ginatudlo sang kaalam sang tawo kondi sa mga pulong nga ginatudlo sang Espiritu, nga nagapaathag sang espirituhanon nga mga kamatooran sa mga tawo nga espirituhanon. Ang tawo nga wala sing Espiritu indi magbaton sang mga butang nga halin sa Espiritu sang aton Amay; kabuang ini para sa iya, kag indi niya ini mahangpan, kay ginahantup ini sa espirituhanon nga paagi. Ginahantup sang tawo nga espirituhanon ang tanan nga butang, apang sia mismo indi sakop sang paghukom sang bisan sin-o. Kay, “Sin-o bala ang nakahibalo sang hunahuna sang aton Amay, agud matudloan niya sia?” Apang may hunahuna kita ni Cristo.