1ይ ቆሮንቶስ 2 FHB Father's Heart Bible™

2 ¹ኣቱም ኣሕዋተይ፥ ኣነ ናባኻትኩም ምስ መፃእኹ፥ ነቲ ምስክርነት ኣቦና ብዝተማዕረገ ቃላት ወይ ብጥበብ ኣይሰበኽኩኹምን። ²ኣነ ኣብ ማእኸልኩም ብዘይ ኢየሱስ ክርስቶስ፥ ንሱ ኸዓ እቲ ዝተሰቕለ፥ ካልእ ሓደኳ ኸይፈልጥ ወሲነ ነይረ እየሞ። ³ኣነ ኸዓ ናባኻትኩም ብድኻምን ብፍርሓትን ብብዙሕ ራዕድን መፃእኹ። ⁴ቃለይን ስብከተይን ብመሳጢ ቃላት ጥበብ ዘይኮነ፥ ብምስክር መንፈስ ቅዱስን ብሓይልን ደኣ ነበረ፤ ⁵እዙይ ድማ እምነትኩም ኣብ ጥበብ ሰብ ዘይኮነ፥ ኣብ ሓይሊ ኣቦና ምእንቲ ኽትምርኰስ እዩ።

⁶ንሕና ግና ኣብ ማእኸል እቶም ፍፁማት ጥበብ ንዛረብ ኢና፤ እዚኣ ግና ናይዝ ዘመን እዙይ ጥበብ፥ ወይ ናይ ኣሕሉቕ እዝ ዘመን እዙይ፥ ናይ እቶም ዝሰዓሩ ዘለዉ ኣይኮነትን። ⁷ጥበብ ኣቦና ደኣ ኢና እንዛረብ፤ ንሳ ኸዓ እታ ኣቦና ቕድሚ ዘመናት ምጅማሩ ንኽብርና ዝመደባ፥ እታ ተሰዊራ ዝነበረት ምስጢር እያ። ⁸ካብ ኣሕሉቕ እዝ ዘመን እዙይ ሓደኳ ኣይፈለጦን፤ እንተ ዝፈልጥዎ ነይሮም፥ ንጐይታ ክብሪ ኣይምሰቐልዎን ነይሮም። ⁹ከምቲ ዝተፅሓፈ፦ “እቲ ዓይኒ ዘይረአዮ፥ እዝኒ ዘይሰምዖ፥ ኣብ ልቢ ሰብ ዘይተሓሰበ፥ ኣቦና ነቶም ዘፍቅርዎ ዘዳለዎ ነገር እዙይ እዩ።”

¹⁰ኣቦና ግና ብመንፈሱ ገሊፁልና እዩ፤ እቲ መንፈስ ንዅሉ ይምርምር እዩ እሞ፥ ዕምቈት ኣቦና እኳ ይምርምር። ¹¹ብዘይ እቲ ኣብ ውሽጡ ዘሎ መንፈሱ፥ ሓሳባት ሰብ መን ይፈልጦ? ከምኡ ድማ ብዘይ መንፈስ ኣቦና፥ ሓሳባት ኣቦና ዝፈልጥ ሓደኳ የለን። ¹²ንሕና ነቲ መንፈስ ዓለም ዘይኮነ፥ ነቲ ኻብ ኣቦና ዝኾነ መንፈስ ደኣ ተቐቢልና፤ እዙይ ድማ እቲ ኣቦና ብልግሲ ዝሃበና ምእንቲ ኽንፈልጥ እዩ። ¹³እዙይ ድማ ጥበብ ሰብ ብዝምህሮ ቃላት ዘይኮነ፥ መንፈስ ብዝምህሮ ቃላት ደኣ ኢና እንዛረቦ፤ ንመንፈሳውያን ሰባት መንፈሳዊ ነገር እናገለፅናሎም። ¹⁴እቲ መንፈስ ዘይብሉ ሰብ፥ ነቲ ኻብ መንፈስ ኣቦና ዝመፅእ ኣይቅበሎን፤ ንእኡ ዕሽነት እዩ እሞ፤ ብመንፈስ ምስትውዓል ስለ ዝፍለጥ ከዓ ክርድኦ ኣይኽእልን እዩ። ¹⁵እቲ መንፈሳዊ ሰብ ግና ንዅሉ የስተውዕል፤ ባዕሉ ግና ብሓደ እኳ ኣይፍረድን። ¹⁶ከመይሲ፦ “ንሓሳብ ኣቦና ፈሊጡ ዝምህሮ መን ኣሎ?” ንሕና ግና ሓሳብ ክርስቶስ ኣለና።