Khali Cross te Morai Diya Khrista
Paul jani-buji kene dangor kotha-bati nakori ahise, khali krus te morise Khrista ke he loi ahise, titia tumikhan laga biswas kotha kowa manuh laga gyan te nohoi, amar Pitri laga takot te thakibo. Tai sikhai diya gyan lukai thaka ase, homoi shuru hobo age te taiyar kori rakhise, aru amar Pitri laga Atma pora dikhai dile he jani pare.
2 1Bhai aru bhoini khan, moi jitia tumikhan logot te ahhise, moi bhal bhal kotha nohoile gyaan pora amar Pitri laga gawahi prachar kora nai. 2Kilemane moi tumikhan majot te Jisu Khrista, aru Cross te morai diya Tar ke chari kene, aru eku najanibole mon te thik korise. 3Aru moi komjori te, bhoi te, aru bisi kapi kene tumikhan logot te ahhise. 4Moi laga kotha aru prachar tu gyaan laga mon jiti luwa kotha pora nohoi, kintu Pobitro Atma aru shakti laga porman te thakise, 5eneka pora tumikhan laga biswas tu manuh laga gyaan uporte nathakibo, kintu amar Pitri laga shakti uporte thakibo.
6Hoilebi amikhan poka manuh khan majot te gyaan kotha koi ase—eitu yug laga gyaan nohoi, aru eitu yug laga raj kora khan laga bhi nohoi, kun khotom hoi ja ase. 7Nohoi, amikhan amar Pitri laga gyaan koi ase, ekta lukai thaka bhed kotha, juntu amar Pitri pora homoi shuru huwa agete amikhan laga mahima nimite thik kori rakhise. 8Eitu yug laga raj kora khan kun bhi eitu jana nai; jodi tarkhan janile, tarkhan mahima laga Prabhu ke Cross te morai nadibole thakise. 9Likha thaka nisena ase: “Juntu suku pora kitia bhi dekha nai, kaan pora huna nai, aru manuh laga mon te bhi aha nai—eitu khan amar Pitri pora Tar ke morom kora khan nimite taiyar kori rakhise.”
10Kintu amar Pitri pora eitu khan Atma dwara amikhan ke dikhai dise; kilemane Atma pora sob jinis, amar Pitri laga gambhir jinis khan bhi, bisari sai. 11Ekjon manuh laga bhitor te thaka tar nijor atma chari kene, kun pora manuh laga bhabona jane? Eneka nisena, amar Pitri laga Atma chari kene, kun bhi amar Pitri laga bhabona najane. 12Amikhan prithibi laga atma pua nai, kintu amar Pitri pora aha Atma pua hoise, eneka pora amar Pitri pora amikhan ke mufot te diya jinis khan amikhan janibo. 13Amikhan eitu koi ase, manuh laga gyaan pora sikhai diya kotha pora nohoi, kintu Atma pora sikhai diya kotha pora, atma laga manuh khan ke atma laga hosa kotha bujai di kene. 14Atma nathaka manuh tu amar Pitri laga Atma pora aha jinis khan grohon nakore; eitu tar nimite murkho kotha ase, aru tar eitu bujibo napare, kilemane eitu atma laga gyaan pora he jani bole pare. 15Atma laga manuh tu sob jinis bisar kore, kintu tar nijor ke kun pora bhi bisar koribo napare. 16Kilemane “kun pora amar Pitri laga mon janise, Tar ke sikhai dibole?” Kintu amikhan logot te Khrista laga mon ase.