Aruila Avāli Rarsangching
Corinth mibingna ngaranghai — ei Paulwui ngāraimi, ei Apollos-wui ngāraimi — kala Paulna chi naoshinaowui kharing da hangkhui. Thangmi kala tara yangthui mi khi khala maleiya; ithumwui Avāna maman makhraokhui. Kharakhatna khamashung kharakhatli sākhala meina maphongra.
3 1Ivānaobing, ina nathumli manglārinwui mibing thāda mahāngrarthuwa, kha phasā khavai mibing thāda, Khristali angangnaobing thāda hānga. 2Ina nathumli seina̱ mi, zāt khamarar maningmana, kaja nathum makuprangsai. Aruila nathum makupmana. 3Nathum aruila phasā khavaina. Nathumwui lungli yuikashi kala mikpaishāt leilakha, okathuiwui ningphanin eina kharing kasā nathum phasā khavai maningmalā? 4Mi akhana "Iya Paulli shura" da hāngda, khangateina "Iya Apollosli shura" da hāng tharan, nathum mikumo thāda sā maningmalā?
5Chithākha Apollos hi khina? Paul hi khina? Mi kachiva̱li Prohona khami athishurda, athum hi raobingna, kala athumwui mangā eina nathum shitsanghaowa. 6Ina vāsang, Apollosna tara̱ chaimi, kha ithumwui Avāna rarsang ngasaka. 7Chieina kavāsangla, tara̱ kachaimela khikha maningmana, kha rarsang ngasakmi ithumwui Avā maningla khipākha maningmana. 8Kavāsang kala tara̱ kachaime hi akhana; mi kachiva̱na kachichāwui ot chiwui vang kachichāwui sāman samphangra. 9Kaja ithum hi ithumwui Avāwui otsakrumabingna; nathum hi awui lam kala awui shimna.
10Ithumwui Avāna ili khami lukhamashan chiwui eina, ina thangmei shim kasaa akha thāda shimphunga heitai, kala khangateina chiwuitungli sākā. Mi kachiva̱na chiwuitungli kathada sārakhala kaji ning ngasharlu. 11Kaja arui heitai kahai shimphunga chiya Jishu Khristana; chiwui eina khangatei shimphunga khipānakha heitai matheirarmana. 12Ara kachikathāna shimphunga chiwuitungli sinā, lupāsā, aman kasak ngalungbing, thing, seizāt, lah lanji eina sāhaiakha, 13mi kachiva̱wui ot chi tharzā ngasakra, kaja Zimiksho china chi chitheira, chiya meina chi chithei khavai vangna; kala mei chithāda mi kachiva̱wui ot kachikathā ngasārakhala da chāng tamyangra. 14Kachikathāna sākā kahai ot chi leichingakha, ana sāman samphangra. 15Kachikathāwui ot chi meina chuitāakha, ana kashimān samphangra. Kha mei ngaruivā kahai thāda a khalatta hi huikhuira.
16Nathum hi ithumwui Avāwui khorumshimna kala ithumwui Avāwui Manglā chi nathumwui wuklungli lei da nathum matheimalā? 17Kachikathāna ithumwui Avāwui khorumshim sāshimānakha, ithumwui Avāna ali sāshimānra. Kaja ithumwui Avāwui khorumshim hi katharana, kala nathum chi khorumshimna.
18Khipānakha a khalatta machipat ngasakalu. Kachikathā nathumwui ngachaili mi akhana mithot hili a thangkhamana da phaningakha, a mangkhama̱ sāhaoranu, chieina a thangkhama ngasāhaora. 19Kaja okathui hiwui thangkhamei hi ithumwui Avāwui miktāli mangkhama̱na. Kaja hithada kapihaida lei, "Ana thangkhamabingli athumwui awor chili manngasaka," 20kala hāngluishita, "Ithumwui Avāna thangkhamabingwui kaphaning thei, chiya aremana." 21Chieina khipānakha mibingwui vang malangsoaranu. Kaja ot saikora nathumwuina, 22Paulla, Apollos la, Peterla, okathuila, kharingla, kathila, shokta khalei otla, shokki kaji otla, saikora nathumwuina, 23kala nathum Khristawuina, kala Khrista ithumwui Avāwuina.
