Muchiri Kukura muna Baba

VaKorinde vari kuputsana kuva mapoka evateveri — ndinotevera Pauro, ndinotevera Aporo — uye Pauro anoti uhu ucheche. Murimi nomudiriri havazi chinhu; Baba vedu ndivo vanokudza. Zvinovakwa nomumwe nomumwe panheyo imwe chete zvichaonekwa nomoto.

Chitsauko 3.

Hama dzangu, handina kugona kutaura nemi savanhu voMweya, asi savanhu venyama—savacheche muna Kristu. Ndakakupai mukaka, kwete zvokudya zvikukutu, nokuti makanga musati magadzirira. Kunyange zvino muchiri kusagadzirira. Muchiri venyama. Sezvo godo nokukwikwidzana zviri pakati penyu, hamusi venyama here, muchifamba savanhu zvavo? Nokuti kana mumwe achiti, “Ini ndinotevera Pauro,” mumwewo achiti, “Ini ndinotevera Aporo,” hamusi kuita savanhuwo zvavo here?

Ko Aporo chii? Pauro chii? Varanda vamakatenda kubudikidza navo, mumwe nomumwe sokupiwa kwaakaitwa naIshe. Ini ndakadyara, Aporo akadiridza, asi Baba vedu ndivo vakakurisa. Saka anodyara neanodiridza havasi chinhu—asi Baba vedu chete, ivo vanokurisa. Anodyara neanodiridza vakafanana; mumwe nomumwe achapiwa mubayiro wake maererano nebasa rake. Nokuti tiri vashandi pamwe chete naBaba vedu; imi muri munda wavo, chivako chavo.

Nenyasha dzandakapiwa naBaba vedu, ndakateya nheyo somuvaki mukuru akachenjera, mumwe achivaka pamusoro padzo. Mumwe nomumwe ngaachenjerere kuti anovaka sei pamusoro padzo. Nokuti hakuna munhu angagona kuteya dzimwe nheyo kunze kweidzo dzakatoteyiwa, idzo ndiJesu Kristu. Zvino kana munhu achivaka pamusoro penheyo negoridhe, sirivha, matombo anokosha, matanda, uswa, kana mashanga, basa romunhu mumwe nomumwe richaonekwa pachena, nokuti Zuva iro richariratidza, nokuti moto uchariburitsa pachena, uye moto iwoyo uchaedza kuti basa romunhu mumwe nomumwe rakadii. Kana basa raakavaka munhu rikasara riripo, achapiwa mubayiro. Kana basa romunhu rikapiswa, acharasikirwa—asi iye pachake achaponeswa, asi sokunge napakati pomoto.

Hamuzivi here kuti muri temberi yaBaba vedu, uye kuti Mweya waBaba vedu unogara mamuri? Kana munhu akaparadza temberi yaBaba vedu, Baba vedu vachamuparadza. Nokuti temberi yaBaba vedu itsvene, uye temberi iyoyo ndimi.

Ngakurege kuva nomunhu anozvinyengera. Kana munhu pakati penyu achifunga kuti akachenjera munguva ino, ngaave benzi, kuti agova akachenjera. Nokuti uchenjeri hwenyika ino upenzi kuna Baba vedu. Nokuti Rugwaro runoti, “Anobata vakachenjera mumano avo,” uyezve, “Baba vedu vanoziva ndangariro dzavakachenjera, kuti hadzina maturo.” Saka ngakurege kuva nomunhu anozvikudza nokuda kwavanhu. Nokuti zvinhu zvose ndezvenyu, angava Pauro kana Aporo kana Kefasi, kana nyika kana upenyu kana rufu, kana zvazvino kana zvichauya—zvose ndezvenyu, uye imi muri vaKristu, uye Kristu ndowaBaba vedu.