Har Yanzu Kuna Girma cikin Uba

Korantiyawa suna rarrabuwa zuwa ƙungiyoyin magoya baya — ni na Bulus ne, ni na Afolos ne — Bulus kuwa ya ce wannan jarirantaka ce. Mai shuka da mai ban ruwa ba kome ba ne; Ubanmu ne yake sa abubuwa su yi girma. Abin da kowane mutum ya gina a kan tushe ɗaya wuta za ta bayyana shi.

Babi na 3.

'Yan'uwa, ban iya yi muku magana kamar mutanen Ruhu ba, sai dai kamar mutane na jiki, jarirai cikin Almasihu. Na ba ku madara, ba abinci mai ƙarfi ba, domin ba ku riga kun shirya ba. Har yanzu kuma ba ku shirya ba. Har yanzu kuna na jiki. Da yake akwai kishi da gardama a tsakaninku, ashe, ba na jiki kuke ba, kuna rayuwa bisa ga ma'aunin mutane? Gama sa'ad da wani ya ce, “Ni mabiyin Bulus ne,” wani kuma ya ce, “Ni mabiyin Afollos ne,” ashe, ba kamar mutane kurum kuke yi ba?

To, mene ne Afollos? Mene ne kuma Bulus? Bayi ne, waɗanda ta wurinsu kuka gaskata, kowanne kamar yadda Ubangiji ya ba shi. Ni na shuka, Afollos ya yi banruwa, amma Ubanmu shi ya sa ya yi girma. Saboda haka ko mai shuka ko mai banruwa ba kome ba ne, sai dai Ubanmu, wanda yake sa shi yă yi girma. Mai shuka da mai banruwa ɗaya ne, kuma kowanne zai sami sakamakonsa bisa ga aikin da ya yi. Gama mu abokan aikin Ubanmu ne, ku kuwa gonarsa ce, ginarsa ce.

Bisa ga alherin da Ubanmu ya ba ni, na kafa harsashi kamar gwanin maginin da yake da hikima, wani kuma yana gini a kansa. Sai dai kowa yă lura da yadda yake gini a kansa. Gama ba wanda zai iya kafa wani harsashi dabam da wanda aka riga aka kafa, wato Yesu Almasihu. To, in wani yana gini a kan wannan harsashi da zinariya, ko azurfa, ko duwatsu masu daraja, ko itace, ko ciyawa, ko tattaka, aikin kowa zai bayyana a fili, gama Ranan nan za ta tona shi, domin wuta ce za ta bayyana shi, wannan wuta kuma za ta gwada irin aikin kowa. In aikin da wani ya gina ya tsaya, zai sami sakamako. In aikin wani ya ƙone, zai yi hasara, shi kansa kuwa zai tsira, sai dai kamar wanda ya ratsa cikin wuta.

Ashe, ba ku sani ba cewa ku haikalin Ubanmu ne, Ruhun Ubanmu kuma yana zaune a cikinku? In wani ya rushe haikalin Ubanmu, Ubanmu zai hallaka shi. Gama haikalin Ubanmu mai tsarki ne, haikalin nan kuwa ku ne.

Kada kowa yă ruɗi kansa. In wani a cikinku yana ganin shi mai hikima ne a wannan zamani, sai yă zama wawa, domin yă zama mai hikima. Gama hikimar wannan duniya wauta ce a gaban Ubanmu. Gama Nassi ya ce, “Yakan kama masu hikima cikin makircinsu,” kuma, “Ubanmu ya san tunanin masu hikima, cewa a banza suke.” Saboda haka kada kowa yă yi fariya game da mutane. Gama kome naku ne, ko Bulus, ko Afollos, ko Kefas, ko duniya, ko rai, ko mutuwa, ko na yanzu, ko na nan gaba, duka naku ne, ku kuwa na Almasihu ne, Almasihu kuma na Ubanmu ne.