1 Mga Corinto 3

3 ¹Mga kapatid, hindi ko kayo makausap bilang mga taong makaespiritu, kundi bilang mga taong makalaman—mga sanggol kay Cristo. ²Gatas ang ibinigay ko sa inyo, hindi matigas na pagkain, sapagkat hindi pa kayo handa. Kahit ngayon ay hindi pa rin kayo handa. ³Makalaman pa rin kayo. Yamang may inggitan at alitan sa inyo, hindi ba kayo makalaman, na namumuhay ayon sa panukat ng tao? ⁴Sapagkat kapag ang isa ay nagsasabing, “Kay Pablo ako sumusunod,” at ang isa naman, “Kay Apolos ako,” hindi ba kayo kumikilos na parang mga taong pangkaraniwan lamang?

⁵Ano nga si Apolos? Ano si Pablo? Mga lingkod na sa pamamagitan nila ay sumampalataya kayo, bawat isa ayon sa ipinagkaloob sa kanya ng Panginoon. ⁶Ako ang nagtanim, si Apolos ang nagdilig, ngunit ang ating Ama ang nagpalago. ⁷Kaya't wala ni ang nagtatanim ni ang nagdidilig—kundi ang ating Ama lamang, na siyang nagpapalago. ⁸Iisa ang nagtatanim at ang nagdidilig; tatanggapin ng bawat isa ang sariling gantimpala ayon sa sariling pagpapagal. ⁹Sapagkat kami ay mga kamanggagawa ng ating Ama; kayo ang kanyang bukid, ang kanyang gusali.

¹⁰Sa biyayang ibinigay sa akin ng ating Ama, naglagay ako ng pundasyon gaya ng isang matalinong punong tagapagtayo, at may iba namang nagtatayo rito. Ngunit mag-ingat ang bawat isa kung paano siya magtatayo rito. ¹¹Sapagkat walang sinumang makapaglalagay ng ibang pundasyon maliban sa naunang nailagay na, na si Jesu-Cristo. ¹²Kung ang sinuman ay magtatayo sa ibabaw ng pundasyon ng ginto, pilak, mamahaling bato, kahoy, dayami, o pinaggapasan, ¹³ang gawa ng bawat isa ay mahahayag, sapagkat ilalantad ito ng Araw na iyon, dahil inihahayag ito ng apoy, at susubukin ng gayunding apoy kung ano ang uri ng gawa ng bawat isa. ¹⁴Kung ang gawang itinayo ng sinuman ay manatili, tatanggap siya ng gantimpala. ¹⁵Kung ang gawa ng sinuman ay masunog, magdaranas siya ng kawalan—ngunit siya mismo ay maliligtas, subalit tulad lamang ng isang lumusot sa apoy.

¹⁶Hindi ba ninyo alam na kayo ay templo ng ating Ama, at ang Espiritu ng ating Ama ay nananahan sa inyo? ¹⁷Kung sisirain ng sinuman ang templo ng ating Ama, sisirain siya ng ating Ama. Sapagkat banal ang templo ng ating Ama, at ang templong iyon ay kayo.

¹⁸Huwag dayain ninuman ang kanyang sarili. Kung sinuman sa inyo ay nag-aakalang siya'y marunong sa kapanahunang ito, magpakamangmang siya, upang siya'y maging marunong. ¹⁹Sapagkat ang karunungan ng sanlibutang ito ay kamangmangan sa harap ng ating Ama. Sapagkat sinasabi ng Kasulatan, “Hinuhuli niya ang marurunong sa kanilang katusuhan,” ²⁰at muli, “Nalalaman ng ating Ama ang mga iniisip ng marurunong, na ang mga ito ay walang kabuluhan.” ²¹Kaya't huwag ipagmalaki ninuman ang mga tao. Sapagkat ang lahat ng bagay ay sa inyo, ²²maging si Pablo o si Apolos o si Cefas, o ang sanlibutan o ang buhay o ang kamatayan, o ang kasalukuyan o ang darating—ang lahat ay sa inyo, ²³at kayo ay kay Cristo, at si Cristo ay sa ating Ama.