1 KwabaseKhorinte 3

3 ¹Bazalwane, angikwazanga ukukhuluma kini njengabantu baboMoya, kodwa njengabantu benyama—izingane kuKhristu. ²Nganinika ubisi, hhayi ukudla okuqinileyo, ngokuba naningakakulungeli. Ngisho namanje anikakulungeli. ³Nisengabenyama. Njengoba umhawu nokubanga kukhona phakathi kwenu, anisibo yini abenyama, niphila ngokwemithetho yabantu? ⁴Ngokuba lapho omunye ethi, “Ngilandela uPawulu,” omunye athi, “Ngilandela u-Apholo,” anenzi yini njengabantu nje?

⁵Pho uyini u-Apholo? Uyini uPawulu? Yizinceku enakholwa ngazo, yilowo nalowo njengokuba iNkosi yamnika. ⁶Mina ngatshala, u-Apholo wanisela, kodwa uBaba wethu wakukhulisa. ⁷Ngakho otshalayo akalutho noniselayo akalutho—nguBaba wethu kuphela, okhulisayo. ⁸Otshalayo noniselayo bamunye; yilowo nalowo uyakwamukela umvuzo wakhe ngokomsebenzi wakhe. ⁹Ngokuba siyizisebenzi zikaBaba wethu; nina niyinsimu yakhe, niyisakhiwo sakhe.

¹⁰Ngomusa uBaba wethu anginika wona, ngabeka isisekelo njengomakhi oyingcweti ohlakaniphileyo, omunye wakhela phezu kwaso. Yilowo nalowo makaqaphele indlela akhela ngayo phezu kwaso. ¹¹Ngokuba akekho ongabeka esinye isisekelo ngaphandle kwaleso esesibekiwe, esinguJesu Khristu. ¹²Manje uma umuntu akha phezu kwesisekelo ngegolide, isiliva, amatshe anenani, izinkuni, utshani, noma amabibi, ¹³umsebenzi walowo nalowo uyakubonakala, ngokuba uSuku luyakuwembula, ngoba umlilo uyawuveza, nalowo mlilo uyakuwuhlola ukuthi umsebenzi walowo nalowo unjani. ¹⁴Uma umsebenzi lowo umuntu awakhileyo uhlala ukhona, uyakwamukela umvuzo. ¹⁵Uma umsebenzi womuntu usha, uyakulahlekelwa—kodwa yena uqobo uyakusindiswa, kodwa kungathi udabula emlilweni.

¹⁶Anazi yini ukuthi niyithempeli likaBaba wethu, nokuthi uMoya kaBaba wethu uhlala kini? ¹⁷Uma umuntu echitha ithempeli likaBaba wethu, uBaba wethu uyakumchitha. Ngokuba ithempeli likaBaba wethu lingcwele, nalelo thempeli yinina.

¹⁸Makungabi khona ozikhohlisayo. Uma umuntu phakathi kwenu ecabanga ukuthi uhlakaniphile kulesi sikhathi, makabe yisiwula, ukuze ahlakaniphe. ¹⁹Ngokuba ukuhlakanipha kwaleli zwe kuwubuwula kuBaba wethu. Ngokuba umBhalo uthi, “Ubamba abahlakaniphileyo ebuqilini babo,” ²⁰futhi, “UBaba wethu uyazazi izinkumbulo zabahlakaniphileyo, ukuthi ziyize.” ²¹Ngakho makungabi khona oziqhayisa ngabantu. Ngokuba zonke izinto zingezenu, ²²kungaba uPawulu noma u-Apholo noma uKhefase, noma izwe noma ukuphila noma ukufa, noma okukhona manje noma okuzayo—konke kungokwenu, ²³nina ningabakaKhristu, uKhristu ungokaBaba wethu.