1 ቆሮንቶስ 3

3 ¹ወንድሞችና እኅቶች ሆይ፤ እንደ መንፈሳውያን ልናገራችሁ አልቻልኩም፤ ነገር ግን እንደ ሥጋውያን፣ በክርስቶስም እንደ ሕፃናት ተናገርኋችሁ። ²ገና ዝግጁ ስላልነበራችሁ፣ ጠንካራ ምግብ ሳይሆን ወተት ሰጠኋችሁ። አሁንም ቢሆን ገና ዝግጁ አይደላችሁም። ³ገና ሥጋውያን ናችሁ። ቅናትና ክርክር በመካከላችሁ ስላለ፣ ሥጋውያን ሆናችሁ በሰው ልማድ የምትኖሩ አይደላችሁምን? ⁴አንዱ፣ “እኔ የጳውሎስ ነኝ፣” ሌላውም፣ “እኔ የአጵሎስ ነኝ፣” ሲል፣ እንደ ተራ ሰዎች የምትሆኑ አይደላችሁምን?

⁵እንግዲህ አጵሎስ ምንድን ነው? ጳውሎስስ ምንድን ነው? ጌታ ለእያንዳንዳቸው እንደ ሰጣቸው፣ በእነርሱ በኩል ያመናችሁባቸው አገልጋዮች ናቸው። ⁶እኔ ተከልሁ፤ አጵሎስ አጠጣ፤ ነገር ግን ያሳደገው አባታችን ነው። ⁷ስለዚህ የሚተክለውም ሆነ የሚያጠጣው ምንም አይደለም፤ ዋናው የሚያሳድገው አባታችን ነው። ⁸የሚተክለውና የሚያጠጣው አንድ ናቸው፤ እያንዳንዱም እንደ ራሱ ድካም የራሱን ዋጋ ይቀበላል። ⁹እኛ የአባታችን አብረው ሠራተኞች ነንና፤ እናንተም የእርሱ እርሻ፣ የእርሱ ሕንፃ ናችሁ።

¹⁰አባታችን በሰጠኝ ጸጋ መሠረት፣ እንደ ጥበበኛ ዋና ግንበኛ መሠረት ጣልሁ፤ ሌላውም በእርሱ ላይ ይገነባል። እያንዳንዱ በእርሱ ላይ እንዴት እንደሚገነባ ይጠንቀቅ። ¹¹ከተጣለው መሠረት በቀር ማንም ሌላ መሠረት ሊጥል አይችልምና፤ ይህም ኢየሱስ ክርስቶስ ነው። ¹²ማንም በዚህ መሠረት ላይ በወርቅ፣ በብር፣ በከበሩ ድንጋዮች፣ በእንጨት፣ በሣር ወይም በገለባ ቢገነባ፣ ¹³የእያንዳንዱ ሥራ ይገለጣል፤ ቀኑ ይገልጠዋልና፤ እሳት ይፋ ያደርገዋልና፤ ያም እሳት የእያንዳንዱ ሥራ ምን እንደ ሆነ ይፈትነዋል። ¹⁴ማንም የገነባው ሥራ ጸንቶ ቢቆም፣ ዋጋ ይቀበላል። ¹⁵የማንም ሥራ ቢቃጠል፣ ጉዳት ይደርስበታል፤ እርሱ ራሱ ግን ይድናል፣ ነገር ግን በእሳት ውስጥ እንደ ማለፍ ያህል ብቻ ነው።

¹⁶የአባታችን ቤተ መቅደስ እንደ ሆናችሁ፣ የአባታችንም መንፈስ በእናንተ ውስጥ እንደሚኖር አታውቁምን? ¹⁷ማንም የአባታችንን ቤተ መቅደስ ቢያፈርስ፣ አባታችን እርሱን ያፈርሰዋል። የአባታችን ቤተ መቅደስ ቅዱስ ነውና፤ ያም ቤተ መቅደስ እናንተ ናችሁ።

¹⁸ማንም ራሱን አያታልል። ከእናንተ መካከል ማንም በዚህ ዘመን ጥበበኛ የሆነ ቢመስለው፣ ጥበበኛ ይሆን ዘንድ ሞኝ ይሁን። ¹⁹የዚህ ዓለም ጥበብ በአባታችን ዘንድ ሞኝነት ነውና። መጽሐፍ፣ “ጥበበኞችን በተንኰላቸው ይይዛቸዋል፣” ይላልና፤ ²⁰ደግሞም፣ “አባታችን የጥበበኞችን አሳብ ከንቱ እንደ ሆነ ያውቃል፣” ይላል። ²¹ስለዚህ ማንም በሰዎች አይመካ። ሁሉ ነገር የእናንተ ነውና፤ ²²ጳውሎስ ቢሆን፣ አጵሎስ ቢሆን፣ ኬፋ ቢሆን፣ ዓለም ቢሆን፣ ሕይወት ቢሆን፣ ሞት ቢሆን፣ የአሁኑ ቢሆን፣ የሚመጣው ቢሆን ሁሉ የእናንተ ነው፤ ²³እናንተም የክርስቶስ ናችሁ፤ ክርስቶስም የአባታችን ነው።