1 Corinthnao 1

1 ¹Ithumwui Avāwui ningkachāng athishurda Khrista Jishuwui paokazata sākhavai hokhui kahai Paul, kala ithumwui ichinā Sosthenes inina, ²Corinthli khalei ithumwui Avāwui churchli, Khrista Jishuli kathara sāngasak kahaia, kathara mi sākhavai hokhui kahaia, kala apam kachiva̱li ithumwui Proho Jishu Khristawui ming kahona mi saikorali ngasoda kagapina. A hi athumwui kala ithumwui Prohona. ³Ithumwui Avā kala Proho Jishu Khristana nathumli lukhamashan kala chingri kahai miranu.

Ithumwui Avāwui Lukhamashanwui vang Ningkashi

⁴Khrista Jishuli ithumwui Avāna nathumli mihai lukhamashanwui vang ina nathumwui vang atam kachida iwui Avāli ningshi, ⁵kaja ali nathum khamatui saikora kala theithangkhamei saikorali apong kachiva̱li shāngsang ngasaka, ⁶Khristawui pongli shākhi chi nathumwui ngachaili ngatarda ngasak kahai thada, ⁷chithada ithumwui Proho Jishu Khrista rāsamphanghon chi khangaraina ngarailakha nathumna lemmet katei mavātmara, ⁸ana nathumli khanao eina tangda ngatar ngasakra, chithada ithumwui Proho Jishu Khristawui zimiksholi nathum shāt makā ngasakra. ⁹Ithumwui Avā chisin kahaina; awui Anaomayara, ithumwui Proho Jishu Khristali ngasokhami lungli nathumli hora china.

Shimkhur chi Akhamāng Sāphalungra

¹⁰Ivānaobing, ithumwui Proho Jishu Khristawui ming eina ina nathumli pongai: nathum saikora mayā ngaroklu; nathumwui ngachaili ngakai khangarok maleiranu, kha ningphanin akha kala sākhangai akha eina nathum akhamāng ngasaklu. ¹¹Kaja ivānaobing, nathumwui ngachaili kakharar lei kaji Chloewui mibingna ili hāngchithei kahaina. ¹²Chithada nathum kachiva̱na hānga, "Ina Paulwuina," "Ina Apolloswuina," "Ina Peterwuina," "Ina Khristawuina." ¹³Khrista ngakai ngarok sāhairala? Paulli nathumwui vang krushli shaoshān kahairala? Lah nathumli Paulwui mingli ra̱hikmilā? ¹⁴Ina Crispus eina Gaius maningla nathum khipākha mara̱hikmi kaji ithumwui Avāli ningshi. ¹⁵Chiwui vang nathum iwui mingli ra̱hika da khipānakha mahāngpaimana. ¹⁶Ina Stephanaswui shimkhurlila ra̱hikmihaira; chili lāngda, mi khangatei akhali ra̱hikmi jilala ina matheimana. ¹⁷Khristana ili ra̱hikmi khavai machihovamana, kha paokaphā hāshok khavaina. Khristawui krush chi awui pangshap makāna malei khavai, ina mikumowui thangkhamei tui eina maningla hāshoka.

Krushwui Pangshap

¹⁸Krushwui pao chi shimānhaokida khaleibingli mangkhama̱na, kha huikhuida khalei ithumli chi ithumwui Avāwui pangshapna.

¹⁹Kaja hithada kapihaida lei: Thangkhameibingwui thangkhamei ina sāshimānhaora, kala theishingkakhuibingwui ningthei ina horra.

²⁰Thangkhamei mi khali leida? Kathema mi khali leida? Okathui hiwui ngayāt mi khali leida? Ithumwui Avāna okathuiwui thangkhamei chi mangkhama̱ sāngasakhaira maningmala? ²¹Kaja ithumwui Avāwui thangkhameili okathuina awui khalattawui thangkhamei eina ali matheimana, chiwui vang eina ithumna hākashok kaji mangkhama̱ mangā eina shitkasangbingli huikhui khavai chi awui kaphaningna. ²²Kaja Jihudibingna machutkakhui kapo kala Greekbingna thangkhamei phā, ²³kha ithumna krushli shaokathat kahai Khristali hāshoka; chi Jihudibingli phei ngaphok khavaina kala Gentilebingli mangkhama̱na, ²⁴kha hokakhui kahaibingli, Jihudibing eina Greekbing khaninili, Khrista chi ithumwui Avāwui pangshap kala ithumwui Avāwui thangkhameina. ²⁵Kaja ithumwui Avāwui mangkhama̱ chi mibingli thangmeimei, kala ithumwui Avāwui khangazan chi mibingli pangmei.

²⁶Ivānaobing, nathumwui hokakhui chi phaninglu: mikumowui ningphanin eina thangkhamei kachungkha maleimana, kapinga kachungkha maleimana, khangam-kharei kapharā kachungkha maleimana. ²⁷Kha ithumwui Avāna thangkhameibingli khayak khavai okathuiwui mangkhama̱bing chi kapangkhui, kala kapangabingli khayak khavai ithumwui Avāna okathuiwui khangazanbing chi kapangkhui, ²⁸kala khikha leikasā otbing chi masākhai khavai, okathuiwui kateo kala yangkharing kahai otbing, khikha maleikasā otbing chi ithumwui Avāna kapangkhui, ²⁹chithākha ithumwui Avāwui mangāli kachikathana langsopaishina. ³⁰Awui eina nathum Khrista Jishuli lei. A ithumwui Avāwui eina ithumwui thangkhamei, ithumwui khamashung khangarong kala kathar kala ngatangkhami ngasāhaowa, ^a a v30 Khristali, Avāna ithumli kannā ot saikora mi—Khrista akhalatta ithumwui thangkhamei, ithumwui khamashung khangarong, ithumwui kathar, kala ithumwui ngatangkhami ngasāhaowa. Khani chi mi akhana. ³¹chithākha, hithada kapihaida lei, "Lāngsokhangai china Prohowui vang lāngsoranu."