Bulus Ya Rubuta wa Korintiyawa

Bulus ya yi magana game da rarrabuwa, rashin tsari, da ruɗani na ɗabi'a a cikin wata sabuwar ikilisiya mai fama—ya kuma ba ikilisiya babi mafi girma game da ƙauna.

Babi na 1.

Bulus, wanda aka kira yă zama manzon Almasihu Yesu bisa ga nufin Ubanmu, da Sostenes ɗan'uwanmu, zuwa ga ikkilisiyar Ubanmu da take a Korinti: waɗanda aka tsarkake cikin Almasihu Yesu, waɗanda aka kira su zama masu tsarki, tare da dukan waɗanda suke a ko'ina suna kiran sunan Ubangijinmu Yesu Almasihu—Ubangijinsu da kuma namu. Alheri gare ku da salama daga Ubanmu da Ubangiji Yesu Almasihu.

Godiya saboda Alherin Ubanmu

Kullum ina gode wa Ubana saboda ku, saboda alherin da Ubanmu ya ba ku cikin Almasihu Yesu, gama a cikinsa aka wadatar da ku ta kowace hanya, cikin dukan magana da dukan sani, kamar yadda aka tabbatar da shaida game da Almasihu a cikinku, har ba ku rasa wata baiwa ba yayinda kuke marmarin jiran bayyanar Ubangijinmu Yesu Almasihu, shi ne kuma zai riƙe ku da ƙarfi har ƙarshe, marasa aibi a ranar Ubangijinmu Yesu Almasihu. Ubanmu mai aminci ne, shi ne wanda ta wurinsa aka kira ku zuwa zumunci mai zurfi da Ɗansa, Yesu Almasihu Ubangijinmu.

Dole Iyali su Zama Ɗaya

'Yan'uwa, ina roƙonku, da sunan Ubangijinmu Yesu Almasihu: ku duka ku yarda da juna; kada tsattsaguwa ta raba ku, sai dai ku zama ɗaya cikin tunani ɗaya da nufi ɗaya. Gama mutanen Kulowi sun sanar da ni, 'yan'uwana, cewa akwai gardama a tsakaninku. Abin da nake nufi ke nan, kowannenku yana cewa, “Ni na Bulus ne,” “Ni na Afolos ne,” “Ni na Kefas ne,” “Ni na Almasihu ne.” An rarraba Almasihu ne? Ko an gicciye Bulus saboda ku ne? Ko kuma an yi muku baftisma da sunan Bulus ne? Ina gode wa Ubanmu da ban yi wa kowannenku baftisma ba sai Kirisfus da Gayus, domin kada wani yă ce an yi muku baftisma da sunana. Na kuma yi wa iyalin Istifanas baftisma; banda haka, ban sani ko na yi wa wani dabam baftisma ba. Almasihu bai aiko ni in yi baftisma ba, sai dai in yi wa'azin bishara—ba da kalmomin hikimar mutum ba, domin kada gicciyen Almasihu yă rasa ikonsa.

Ikon Gicciye

Saƙon gicciye wauta ne ga waɗanda suke hallaka, amma a gare mu da ake ceto, ikon Ubanmu ne.

Gama a rubuce yake cewa, Zan hallaka hikimar masu hikima, in kuma kawar da fahimtar masu basira.

Ina mai hikima? Ina malami? Ina mai gardama na wannan zamani? Ashe, Ubanmu bai mai da hikimar duniya wauta ba? Gama tun da yake, cikin hikimar Ubanmu, duniya ba ta san shi ta wurin hikimarta ba, ya ga dama yă ceci masu bi ta wurin wautar abin da muke wa'azi. Gama Yahudawa suna neman alamu, Hellenawa kuma suna neman hikima, amma mu muna shelar Almasihu gicciyayye—dutsen tuntuɓe ga Yahudawa, wauta kuma ga Al'ummai, amma ga waɗanda aka kira, Yahudawa da Hellenawa, Almasihu shi ne ikon Ubanmu da kuma hikimar Ubanmu. Gama wautar Ubanmu ta fi mutane hikima, raunin Ubanmu kuma ya fi mutane ƙarfi.

'Yan'uwa, ku lura da kiranku: ba da yawa ne masu hikima bisa ga awon mutane ba, ba da yawa masu iko ba, ba da yawa haifaffu cikin daraja ba. Amma Ubanmu ya zaɓi wawayen duniya domin yă kunyata masu hikima, Ubanmu kuma ya zaɓi raunanan duniya domin yă kunyata masu ƙarfi, Ubanmu kuma ya zaɓi abubuwan ƙasƙanci da abin rena na duniya—abubuwan da ba a ɗauka a bakin kome—domin yă soke abubuwan da ake ɗauka suna da amfani, domin kada wani yă yi fahariya a gaban Ubanmu. Daga wurinsa ne kuke cikin Almasihu Yesu, wanda ya zama hikimarmu daga wurin Ubanmu—adalcinmu da tsarkinmu da fansarmu, ^a domin, kamar yadda yake a rubuce, “Bari mai yin fahariya, yă yi fahariya cikin Ubangiji.”