Kidisitu kaka wuna bámukhoka ha kitakani
Pholu wakwísa mu luzolu konda ndinga za lengu, kaka Kidisitu wuna bámukhoka ha kitakani, ndangu lukwikilu lwa bawu lwasingama ha ngolu za Tata wetu, ka ha nduka ya muzonzi ku. Mudimu wuna kisi longa wenina waswamana, wuyidikwa konda tangwa kuyandika, amana wuzayakana kaka bu Kitembu kya Tata wetu kisi wusengumuna.
2 1Buna yakwísa kwena benu, baphangi bama, yísamunaku kimbangi kya Tata wetu ni ndinga za khembu keti ni mudimu. 2Mukuma yázenga mu kukonda zaya kima mu kati dya benu, katula lwesi Yesu Kidisitu, yi yandi wuna bámukhoka ha kitakani. 3Amana yakwísa kwena benu mu lebakani, mu bweya, yi ni matekita ma lawu. 4Ndinga zama yi kusamuna kwama byátukaku mu ndinga za lengu za mudimu, kaasi mu kidimbu kya Kitembu Kyatoma yi kya ngolu, 5hanga lukwikilu lwenu lubati singama ha mudimu wa batu ku, kaasi ha ngolu za Tata wetu.
6Betu, thwisi zonza mudimu hana kati dya bambuta — ka mudimu wa tangwa dyadi ku, keti wa bapfumu ba tangwa dyadi, bana bisi hita. 7Kaasi, thwisi zonza mudimu wa Tata wetu, diswekamu dyaswamana, dina Tata wetu kázenga tuka ku luyandiku, kikuma kya khembu yetu. 8Ka mutu ku mu kati dya bapfumu ba tangwa dyadi wázaya dyawu; ho ni bázaya, bádi ku bákhoka Pfumu wa khembu ha kitakani. 9Bwosu bwásonama: «Mana disu dyámonaku, mana kutu dyáyukaku, amana mana mbundu ya mutu yábanzaku — thinu bina Tata wetu káyidika kikuma kya bana bisi muzola.»
10Kaasi Tata wetu wátusengwamina mawu mu nzila ya Kitembu; mukuma Kitembu kyisi zikisa bima byosu, ata madingu ma Tata wetu. 11Nati wuzayi mabanza ma mutu katula lwesi kitembu kyandi meni kyenina mwena yandi? Phila mosi, ka mutu ku wuzayi mabanza ma Tata wetu katula lwesi Kitembu kya Tata wetu. 12Betu, twátambulaku kitembu kya tsi, kaasi Kitembu kina kitukini kwena Tata wetu, hanga tuzaya mana Tata wetu kátuheka mu khatu. 13Thwisi zonza mamana, ka mu ndinga zina mudimu wa kimutu wisi longa ku, kaasi mu zina Kitembu kyisi longa, mu kumenika mambu ma Kitembu kwena batu ba Kitembu. 14Mutu wuna kondi Kitembu, katámbulaku mana matukini kwena Kitembu kya Tata wetu; kwena yandi mana menina ma buzoba, amana kafwaniku kubakisa, mukuma mafwani bakula mu nzila ya Kitembu. 15Mutu wenina wa Kitembu, wisi bakisa mambu moosu, kaasi yandi meni, heku mutu wuna wisi mufundisa. 16Mukuma: «Nati wázaya dibanza dya Tata wetu, ndangu kamulonga?» Kaasi betu, tuvwini dibanza dya Kidisitu.
