Ndị nlekọta ihe omimi Nna anyị

Ndị Kọrịnt na-ekpe ndị ozi ha ikpe dịka ndị nkwado na-atụle ndị na-eme ihe ngosi. Pọl kwuru na naanị mkpebi bara uru bụ otuto Nna anyị mgbe Onyenwe anyị ga-alọghachi, o rụtụrụ aka nʼagụụ ya, ihe otiti ya na enweghị ebe obibi ya, ma chetara ha na ọ mụrụ ha nʼoziọma, ya mere o ji ede dịka nna.

Isi 4.

Werenụ anyị dịka ndị ozi Kraịst na ndị nlekọta ihe omimi Nna anyị. Ọzọkwa, ihe a na-achọ nʼaka ndị nlekọta bụ ka a chọta ha ndị kwesịrị ntụkwasị obi. Ma ọ bụrụ m ihe nta ma unu kpee m ikpe, maọbụ ụlọikpe mmadụ ọbụla kpee m. Ọbụladị mụ onwe m anaghị ekpe onwe m ikpe. Amaghị m ihe ọjọọ ọbụla megide onwe m, ma nke a apụghị ime ka aka m dị ọcha. Onye na-ekpe m ikpe bụ Onyenwe anyị Jisọs. Ya mere, unu ekpela ikpe tupu oge eruo, tupu Onyenwe anyị Jisọs abịa. Ọ ga-eme ka ihe zoro ezo nʼọchịchịrị pụta ìhè, meekwa ka ebumnobi dị nʼobi ndị mmadụ pụta ìhè. Mgbe ahụ, onye ọbụla ga-anata otuto nʼaka Nna anyị.

Ụmụnna m, ihe ndị a ka m jiri mụ onwe m na Apọlọs maka ọdịmma unu, ka unu wee site nʼaka anyị mụta ka unu ghara ịgafe ihe e dere ede, ka onye ọbụla gharakwa ịfụli onwe ya elu, na-akwanyere otu onye ùgwù karịa ibe ya. Nʼihi na onye mere ka ị dị iche? Gịnị ka i nwere nke ị na-anataghị? Ọ bụrụ na i natara ya, gịnị mere i ji anya isi dịka a ga-asị na i nataghị ya?

Ugbua unu enweelarị ihe niile unu chọrọ! Unu abaala ọgaranya! Na-enweghị anyị, unu amalitela ịchị dịka eze—a sị na unu na-achị nʼezie, ka anyị na unu wee soro chịakwa! Nʼihi na echere m na Nna anyị mere ka anyị bụ ndị ozi bụrụ ndị ikpeazụ, dịka ndị a mara ikpe ọnwụ, ebe anyị ghọọla ihe nlegharị anya nʼebe ụwa, ndị mmụọ ozi, na mmadụ nọ. Anyị bụ ndị nzuzu nʼihi Kraịst, ma unu bụ ndị maara ihe nʼime Kraịst. Anyị bụ ndị na-adịghị ike, unu bụ ndị dị ike. A na-asọpụrụ unu, ma a na-eleda anyị anya. Ruo elekere a, agụụ na-agụ anyị, akpịrị na-akpọ anyị nkụ, anyị na-eyi akwa nyakwa nyakwa, a na-eti anyị ihe, anyị enweghịkwa ebe obibi. Anyị ji aka anyị na-adọgbu onwe anyị nʼọrụ. Mgbe a na-akparị anyị, anyị na-agọzi; mgbe a na-akpagbu anyị, anyị na-anagide ya. Mgbe a na-ekwutọ anyị, anyị na-eji obiọma aza. Anyị aghọọla ihe mkpofu nke ụwa, na ihe arụ nke mmadụ niile, ruo taa.

Anaghị m ede ihe ndị a iji mee unu ihere, kama ka m dọọ unu aka ná ntị dịka ụmụ m ndị m hụrụ nʼanya. Ọ bụ ezie na unu nwere ọtụtụ ndị nduzi nʼime Kraịst nke a na-apụghị ịgụta ọnụ, unu enweghị ọtụtụ nna—nʼihi na mụ onwe m mụrụ unu nʼime Kraịst Jisọs site nʼoziọma. ^a Ya mere, ana m arịọ unu, bụrụnụ ndị na-eṅomi m. Ọ bụ ya mere m jiri zigara unu Timoti, nwa m m hụrụ nʼanya, onye kwesịrị ntụkwasị obi nʼime Onyenwe anyị—ọ ga-echetara unu ụzọ m nʼime Kraịst Jisọs, dịka m si ezi ihe nʼebe niile, nʼime chọọchị ọbụla. Ụfọdụ na-afụli onwe ha elu, dịka a ga-asị na m agaghị abịakwute unu. Ma aga m abịakwute unu nʼoge na-adịghị anya, ọ bụrụ na Onyenwe anyị Jisọs kwere, achọpụta m, ọ bụghị okwu ọnụ nke ndị a na-afụli onwe ha elu, kama ike ha. Nʼihi na alaeze Nna anyị abụghị okwu ọnụ, kama ọ bụ ike. Gịnị ka unu chọrọ? M jiri mkpara bịakwute unu, ka m jiri ịhụnanya na mmụọ dị nwayọọ bịa?