Aramati a Hitho cia Ithe witũ

Andũ a Korinitho maratuĩra atũmwo ao ciira o ta andũ a indo magĩthima aini. Paũlũ oiga atĩ itua rĩrĩa rĩbataire no kũgoocwo nĩ Ithe witũ rĩrĩa Mwathani agaacooka, akoonania ng'aragu yake, kũhũũrwo gwake na gũtũũra atarĩ na mũciĩ, na akamaririkania atĩ nĩamaciarire thĩinĩ wa Ũhoro ũrĩa Mwega, kwoguo aramaandĩkĩra ta ithe.

Gĩcunjĩ 4.

Mũtũtuĩre tũrĩ ndungata cia Kristũ, na aramati a hitho cia Ithe witũ. Na makĩria, ũndũ ũrĩa ũbataranĩtie harĩ aramati nĩ atĩ moonekane marĩ ehokeku. No harĩ niĩ ti ũndũ mũnene, o na mũngĩndũĩra ciira kana igooti rĩa andũ rĩndũĩre. O na niĩ mwene ndiĩtuĩragĩra ciira. Ndirĩ ũndũ njũũĩ wa kũnjũkĩrĩra, no ũndũ ũcio ndũngĩtũma nduĩke ndiĩhĩtie. Ũrĩa ũndũĩragĩra ciira nĩ Mwathani witũ Jesũ. Nĩ ũndũ ũcio mũtikaciirithanie ihinda rĩtanakinya, Mwathani witũ Jesũ ataneeyũka. We nĩakaruta ũtheri-inĩ maũndũ marĩa mahithe nduma-inĩ, na aguũrie meciiria ma ngoro. Hĩndĩ ĩyo o mũndũ nĩakaamũkĩra ngaatho kuuma kũrĩ Ithe witũ.

Ariũ na aarĩ a Ithe witũ, maũndũ maya nĩ ndĩmahũthĩrĩte harĩ niĩ mwene na Apolo nĩ ũndũ wanyu, nĩ geetha mwĩrute na ithuĩ mũtikanakĩre ũrĩa kwandĩkĩtwo, na mũtikeyoonie, mũkĩenda ũmwe gũkĩra ũrĩa ũngĩ. Amu nũũ ũgũtũmaga wee ũtuĩke wa mwanya? Nĩ kĩĩ ũrĩ nakĩo ũteheirwo? Angĩkorwo nĩwaheirwo, nĩ kĩĩ ũreeraha taarĩ ũteheirwo?

Rĩu nĩmũiganĩire kĩrĩa gĩothe mũkwenda! Rĩu nĩmũtuĩkĩte itonga! Mũtegũtũhũthĩra nĩmwambĩrĩirie gũthamaka—naarĩ korwo nĩ ma nĩmũrathamaka, nĩ geetha o na ithuĩ tũthamake hamwe na inyuĩ! Amu ndĩreciiria atĩ Ithe witũ nĩatũigĩte ithuĩ atũmwo thuutha mũno, taarĩ andũ matuĩrĩirwo gũkua, tondũ nĩtũtuĩkĩte kĩndũ gĩa kwĩrorerwo nĩ gũkũ thĩ, nĩ araika, na andũ. Ithuĩ tũrĩ irimũ nĩ ũndũ wa Kristũ, no inyuĩ mũrĩ oogĩ thĩinĩ wa Kristũ. Ithuĩ tũrĩ anyamaru, inyuĩ mũrĩ na hinya. Inyuĩ nĩmũtĩĩtwo, ithuĩ nĩtũnyararĩtwo. Nginya ithaa rĩĩrĩ nĩtũhũũtaga, tũkanyoota maaĩ, tũkehumba matangari, tũkahũũrwo, na tũtirĩ mĩciĩ. Nĩtũrutaga wĩra na hinya na mooko maitũ ene. Rĩrĩa twarumwo, nĩtũraathimaga; rĩrĩa twanyariirwo, nĩtũkiragĩrĩria. Rĩrĩa twacambio, nĩtũcookagia na ũhooreri. Nĩtũtuĩkĩte ta mahuti ma gũkũ thĩ, na gĩko kĩa andũ oothe, nginya ũmũthĩ.

Ndirĩ ndĩmwandĩkĩra maũndũ maya nĩguo ndĩmũconorithie, no nĩ geetha ndĩmũtaare taarĩ ciana ciakwa nyendete. O na mũngĩkorwo mũrĩ na atongoria ngiri na ngiri thĩinĩ wa Kristũ, mũtirĩ na maithe maingĩ—nĩ niĩ ndaamũciarire thĩinĩ wa Kristũ Jesũ nĩ ũndũ wa Ũhoro-ũrĩa-Mwega. ^a Nĩ ũndũ ũcio nĩndamũthaitha, mwĩgerekanie na niĩ. Nĩkĩo ndaamũtũmĩire Timotheo, mwana wakwa nyendete na mwĩhokeku thĩinĩ wa Mwathani—we nĩakamũririkania mĩthiĩre yakwa thĩinĩ wa Kristũ Jesũ, o ta ũrĩa ndutanaga kũndũ guothe, kanitha-inĩ o wothe. Amwe nĩmeyoonetie, taarĩ niĩ ndigũũka kũrĩ inyuĩ. No nĩ ngũũka kũrĩ inyuĩ o narua, Mwathani witũ Jesũ angĩĩtĩkĩra, na menye, ti mĩario ya andũ aya eyooni, no hinya wao. Amu ũthamaki wa Ithe witũ ti ũhoro wa mĩario no nĩ wa hinya. Nĩ kĩĩ mũkwenda? Njũke na rũthanju, kana njũke na wendo na roho wa ũhooreri?