1 ቆሮንቶስ 9

9 ¹ነጻ አይደለሁምን? ሐዋርያ አይደለሁምን? ጌታችንን ኢየሱስን አላየሁትምን? በጌታ የሠራሁት ሥራ እናንተ አይደላችሁምን? ²ለሌሎች ሐዋርያ ባልሆንም እንኳ፣ ለእናንተ በርግጥ ሐዋርያ ነኝ፤ እናንተ በጌታ የሐዋርያነቴ ማኅተም ናችሁና።

³ለሚመረምሩኝ ሰዎች የማቀርበው መልሴ ይህ ነው፦ ⁴የመብላትና የመጠጣት መብት የለንምን? ⁵እንደ ሌሎቹ ሐዋርያት፣ እንደ ጌታ ወንድሞችና እንደ ኬፋ፣ አማኝ ሚስት ይዘን የመዞር መብት የለንምን? ⁶ወይስ ለኑሮ ከመሥራት የመታቀብ መብት የሌለን እኔና በርናባስ ብቻ ነን? ⁷በገዛ ገንዘቡ ወታደር ሆኖ የሚያገለግል ማን ነው? የወይን አትክልት ተክሎ ከፍሬው የማይበላ ማን ነው? ወይስ መንጋ ጠብቆ ከወተቱ የማይጠጣ ማን ነው?

⁸ይህን የምለው በሰው ሥልጣን ብቻ ነውን? ሕጉስ ይህንኑ አይልምን? ⁹የሙሴ ሕግ፣ “እህል የሚያበራየውን በሬ አፉን አትሰር” ይላልና። አባታችን የሚያስበው ስለ በሬዎች ነውን? ¹⁰ወይስ ይህን ሁሉ የሚናገረው ስለ እኛ ነውን? አዎን፣ ይህ የተጻፈው ስለ እኛ ነው፤ የሚያርሰው በተስፋ ሊያርስ፣ የሚያበራየውም ከፍሬው የመካፈል ተስፋ ኖሮት ሊያበራይ ይገባል። ¹¹በእናንተ መንፈሳዊ ዘር ከዘራን፣ ከእናንተ ሥጋዊ ነገር ማጨዳችን ታላቅ ነገር ነውን? ¹²ሌሎች በእናንተ ላይ ይህ መብት ካላቸው፣ እኛማ ይበልጥ አይገባንምን? ነገር ግን በዚህ መብት አልተጠቀምንም፤ ከዚህ ይልቅ የክርስቶስን ወንጌል እንዳናደናቅፍ ሁሉን እንታገሣለን።

¹³በቤተ መቅደስ የሚያገለግሉ ከቤተ መቅደስ እንደሚመገቡ፣ በመሠዊያው የሚያገለግሉም ከመሠዊያው መባ እንደሚካፈሉ አታውቁምን? ¹⁴እንዲሁም ወንጌልን የሚሰብኩ ከወንጌል እንዲተዳደሩ ጌታ አዝዞአል። ¹⁵እኔ ግን ከእነዚህ መብቶች በአንዱም አልተጠቀምሁም፤ ይህንም የምጽፈው እነዚህ ለእኔ እንዲደረጉልኝ ለመጠየቅ አይደለም። ማንም ትምክህቴን ከንቱ ከሚያደርግብኝ ይልቅ ብሞት ይሻለኛል። ¹⁶ወንጌልን መስበኬ የምመካበት ምክንያት አይሆንልኝም፤ ይህን ማድረግ ግድ ሆኖብኛልና። ወንጌልን ባልሰብክ ወዮልኝ! ¹⁷ይህን በፈቃዴ ባደርገው ዋጋ አለኝና፤ ባለ ፈቃዴ ባደርገውም አደራ ተጥሎብኛል። ¹⁸እንግዲያውስ ዋጋዬ ምንድን ነው? ወንጌልን ስሰብክ በወንጌል ያለኝን መብት ሳልጠቀም ወንጌልን በነጻ ማቅረቤ ነው።

¹⁹ከሁሉ ነጻ ብሆንም፣ ይበልጥ ብዙዎችን ለማትረፍ ራሴን ለሁሉ ባሪያ አደረግሁ። ²⁰አይሁድን ለማትረፍ ለአይሁድ እንደ አይሁዳዊ ሆንሁ። ከሕግ በታች ያሉትን ለማትረፍ፣ ራሴ ከሕግ በታች ባልሆንም እንኳ፣ ከሕግ በታች ላሉት ከሕግ በታች እንዳለ ሰው ሆንሁ። ²¹ከሕግ ውጭ ያሉትን ለማትረፍ፣ (ከአባታችን ሕግ ውጭ ሳልሆን፣ ነገር ግን በክርስቶስ ሕግ ውስጥ ሆኜ) ከሕግ ውጭ ላሉት ከሕግ ውጭ እንዳለ ሆንሁ። ²²ደካሞችን ለማትረፍ ለደካሞች ደካማ ሆንሁ። በሁሉ መንገድ አንዳንዶችን ለማዳን ለሰው ሁሉ ሁሉን ሆንሁ። ²³ይህን ሁሉ የማደርገው ስለ ወንጌል ነው፤ ይህም በበረከቱ እንድካፈል ነው።

²⁴በእሽቅድምድም የሚሮጡ ሁሉ እንደሚሮጡ፣ ነገር ግን ሽልማቱን የሚያገኘው አንዱ ብቻ እንደ ሆነ አታውቁምን? እናንተም ታገኙ ዘንድ ሩጡ። ²⁵የሚወዳደር ሁሉ የሚጠፋ አክሊል ለማግኘት በነገር ሁሉ ራሱን ይገዛል፤ የእኛ ግን አይጠፋም። ²⁶ስለዚህ እኔ ዓላማ እንደሌለው አልሮጥም፤ ነፋስን እንደሚመታ ሰውም ጡጫዬን በከንቱ አላሳርፍም። ²⁷ነገር ግን ለሌሎች ከሰበክሁ በኋላ እኔ ራሴ የተጣልሁ እንዳልሆን ሰውነቴን እየጎሰምሁ አስገዛዋለሁ።