1 Kọrinti 12

12 ¹Ní báyìí, ní ti àwọn ẹ̀bùn tí í ṣe ti ẹ̀mí, ẹ̀yin arákùnrin àti arábìnrin, èmi kò fẹ́ kí ẹ wà ní àìmọ̀. ²Ẹ mọ̀ pé nígbà tí ẹ kò tí ì mọ Baba, a ṣì yín lọ́nà sí àwọn òrìṣà odi, ní ọ̀nàkọ̀nà tí a fi ṣì yín lọ. ³Nítorí náà mo fẹ́ kí ẹ mọ̀ pé: kò sí ẹni tí ó ń sọ̀rọ̀ nípa Ẹ̀mí Mímọ́ tí yóò wí pé, “Ègún ni fún Jesu,” bẹ́ẹ̀ ni kò sí ẹni tí ó lè wí pé, “Jesu ni Olúwa,” bí kò ṣe nípa Ẹ̀mí Mímọ́.

⁴Ní báyìí, oríṣiríṣi ẹ̀bùn ló wà, ṣùgbọ́n Ẹ̀mí kan náà ni. ⁵Oríṣiríṣi iṣẹ́ ìsìn sì wà, ṣùgbọ́n Olúwa kan náà ni. ⁶Oríṣiríṣi iṣẹ́ sì wà, ṣùgbọ́n Baba kan náà ni ó ń ṣe gbogbo rẹ̀ nínú gbogbo ènìyàn. ^a a v6 Níhìn-ín, Paulu dárúkọ gbogbo Ẹni mẹ́tẹ̀ẹ̀ta papọ̀ — Ẹ̀mí kan náà, Olúwa Jesu kan náà, àti Baba kan náà — tí ọ̀kọ̀ọ̀kan wọn ń ṣiṣẹ́ nínú ìdílé àwọn ẹ̀bùn kan náà. ⁷A fún ẹnìkọ̀ọ̀kan ní ìfihàn Ẹ̀mí Mímọ́ fún àǹfààní gbogbo ènìyàn. ⁸Ẹ̀mí fún ẹnìkan ní ọ̀rọ̀ ọgbọ́n, fún ẹlòmíràn ní ọ̀rọ̀ ìmọ̀, nípa Ẹ̀mí kan náà, ⁹fún ẹlòmíràn ní ìgbàgbọ́ nípa Ẹ̀mí kan náà, fún ẹlòmíràn ní àwọn ẹ̀bùn ìwòsàn nípa Ẹ̀mí kan ṣoṣo, ¹⁰fún ẹlòmíràn ní ṣíṣe iṣẹ́ ìyanu, fún ẹlòmíràn ní àsọtẹ́lẹ̀, fún ẹlòmíràn ní ìyàtọ̀ àwọn ẹ̀mí, fún ẹlòmíràn ní oríṣiríṣi èdè, fún ẹlòmíràn ní ìtumọ̀ àwọn èdè. ¹¹Ẹ̀mí kan náà ni ó ń ṣe gbogbo ìwọ̀nyí, tí ó ń fún ẹnìkọ̀ọ̀kan lọ́tọ̀ọ̀tọ̀ bí ó ti pinnu.

Ara Kan, Ẹ̀yà Púpọ̀

¹²Nítorí ara jẹ́ ọ̀kan, síbẹ̀ ó ní ẹ̀yà púpọ̀, gbogbo ẹ̀yà rẹ̀ púpọ̀ sì jẹ́ ara kan—bẹ́ẹ̀ ni ó rí fún Kristi. ¹³Nítorí a ti batisí gbogbo wa nínú Ẹ̀mí kan sínú ara kan—ìbà jẹ́ Júù tàbí Giriki, ẹrú tàbí òmìnira—a sì fún gbogbo wa ní Ẹ̀mí kan láti mu.

¹⁴Nítorí ara kò ní ẹ̀yà kan ṣoṣo bí kò ṣe púpọ̀. ¹⁵Bí ẹsẹ̀ bá wí pé, “Nítorí tí èmi kì í ṣe ọwọ́, èmi kì í ṣe ẹ̀yà ara,”—síbẹ̀ ó jẹ́ ẹ̀yà ara. ¹⁶Bí etí bá sì wí pé, “Nítorí tí èmi kì í ṣe ojú, èmi kì í ṣe ẹ̀yà ara,” síbẹ̀ ó jẹ́ ẹ̀yà ara. ¹⁷Bí gbogbo ara bá jẹ́ ojú, níbo ni gbígbọ́ yóò wà? Bí gbogbo rẹ̀ bá jẹ́ etí, níbo ni gbígbóòórùn yóò wà? ¹⁸Ṣùgbọ́n gẹ́gẹ́ bí ó ti rí, Baba wa ti gbé ọ̀kọ̀ọ̀kan àwọn ẹ̀yà náà sí inú ara, gẹ́gẹ́ bí ó ti wù ú. ¹⁹Bí gbogbo rẹ̀ bá jẹ́ ẹ̀yà kan ṣoṣo, níbo ni ara yóò wà? ²⁰Gẹ́gẹ́ bí ó ti rí, ẹ̀yà púpọ̀ ló wà, síbẹ̀ ara kan ni. ²¹Ojú kò lè wí fún ọwọ́ pé, “Èmi kò nílò rẹ,” bẹ́ẹ̀ ni orí kò lè wí fún àwọn ẹsẹ̀ pé, “Èmi kò nílò yín.” ²²Ní òdì kejì, àwọn ẹ̀yà ara tí ó dàbí aláìlera jù ni a kò lè ṣe láìní. ²³Àwọn ẹ̀yà ara tí a rò pé kò ní ọlá tó, àwọn náà ni a fi ọlá tí ó pọ̀jù wọ̀; àwọn ẹ̀yà wa tí kò yẹ fún ìfihàn ni a sì ń tọ́jú pẹ̀lú ìtìjú tí ó pọ̀jù, ²⁴èyí tí àwọn ẹ̀yà wa tí ó yẹ fún ìfihàn kò nílò. Ṣùgbọ́n Baba wa ti ṣọ̀kan ara náà papọ̀, ó sì fún ẹ̀yà tí ó ṣe aláìní ní ọlá tí ó pọ̀jù, ²⁵kí ara má bàa ní ìyapa, àti kí àwọn ẹ̀yà rẹ̀ lè máa bìkítà fún ara wọn bákan náà. ²⁶Bí ẹ̀yà kan bá jìyà, gbogbo wọn ni ó jìyà papọ̀; bí a bá bọ̀wọ̀ fún ẹ̀yà kan, gbogbo wọn ni ó yọ̀ papọ̀.

²⁷Ní báyìí, ẹ̀yin ni ara Kristi, ẹnìkọ̀ọ̀kan yín sì jẹ́ ẹ̀yà rẹ̀. ²⁸Nínú ìjọ, Baba wa yan àwọn aposteli ní àkọ́kọ́, àwọn wòlíì ní ìkejì, àwọn olùkọ́ ní ìkẹta, lẹ́yìn náà iṣẹ́ ìyanu, lẹ́yìn náà àwọn ẹ̀bùn ìwòsàn, ìrànlọ́wọ́, ìṣàkóso, àti oríṣiríṣi èdè. ²⁹Gbogbo wọn ha jẹ́ aposteli bí? Gbogbo wọn ha jẹ́ wòlíì bí? Gbogbo wọn ha jẹ́ olùkọ́ bí? Gbogbo wọn ha ń ṣe iṣẹ́ ìyanu bí? ³⁰Gbogbo wọn ha ní àwọn ẹ̀bùn ìwòsàn bí? Gbogbo wọn ha ń fọ èdè bí? Gbogbo wọn ha ń túmọ̀ bí? ³¹Ṣùgbọ́n ẹ máa fi ìtara wá àwọn ẹ̀bùn tí ó tóbi jù. Èmi yóò sì fi ọ̀nà tí ó tayọ hàn yín.