ውህብቶታት ኣቦ ብሓደ መንፈስ

ውህብቶታት ብደረጃ ይስርዑ ኣለዉ። ጳውሎስ፥ ንዅሎም እቲ ሓደ መንፈስን ጐይታን ኣቦን ከም ዝሰርሖም ኣረጋገፀ፤ ኣካል ድማ ነቶም ዘይረኣዩ ኣባላቱ ኣዝዩ ይደልዮም። ኣቦና ንነፍሲ ወከፍ ኣባል ከምቲ ዝደለዮ ኣብ ቦታኡ ኣንበሮ፥ ስለዙይ ሓደ እኳ ‘ኣየድልየንን ኢኻ’ ክብል ኣይኽእልን።

ምዕራፍ 12።

ኣቱም ኣሕዋተይ፥ ብዛዕባ መንፈሳዊ ውህብቶታት ዘይትፈልጡ ክትኮኑ ኣይደልን እየ። ንኣቦ ዘይትፈልጡ ዝነበርኩም ከለኹም፥ ከምቲ ዝተመራሕኹምዎ ናብ በሃማት ጣዖታት ተስሒብኩም ከም ዝተመራሕኹም ትፈልጡ ኢኹም። ስለዙይ ክትፈልጡ እደሊ ኣለኹ፦ ብመንፈስ ቅዱስ ዝዛረብ ሓደኳ “ኢየሱስ ርጉም ይኹን” ኣይብልን፤ ብዘይ መንፈስ ቅዱስ ድማ “ኢየሱስ ጐይታ እዩ” ክብል ዝኽእል ሓደኳ የለን።

እተፈላለዩ ውህብቶታት ኣለዉ፥ መንፈስ ግና ሓደ እዩ። እተፈላለየ ኣገልግሎትውን ኣሎ፥ ጐይታ ግና ሓደ እዩ። እተፈላለየ ግብሪውን ኣሎ፥ ኣብ ኵሉ ሰብ ነዝ ዅሉ ዝሰርሕ ግና ሓደ ኣቦ እዩ። ^a ንነፍሲ ወከፍ ድማ ንሓባራዊ ረብሓ፥ ምግላፅ መንፈስ ቅዱስ ይውሃቦ። ንሓደ ብመንፈስ ቃል ጥበብ ይውሃቦ፤ ንኻልእ ድማ በቲ ሓደ መንፈስ ቃል ፍልጠት ይውሃቦ፤ ንኻልእ በቲ ሓደ መንፈስ እምነት፥ ንኻልእ ድማ በቲ ሓደ መንፈስ ውህብቶ ምሕዋይ ይውሃቦ፤ ንኻልእ ተኣምራት ምግባር፥ ንኻልእ ትንቢት፥ ንኻልእ ንመናፍስቲ ምፍልላይ፥ ንኻልእ ዓይነት ቋንቋታት፥ ንኻልእ ድማ ምፍታሕ ቋንቋታት ይውሃቦ። ነዝ ዅሉ ዝሰርሕ ግና እቲ ሓደ መንፈስ እዩ፤ ከምቲ ዝደለዮ ድማ ንነፍሲ ወከፍ ፈላልዩ ይህብ።

ሓደ ኣካል፥ ብዙሓት ኣባላት

ከምቲ ኣካል ሓደ ኾይኑ ብዙሓት ኣባላት ዘለውዎ፥ ኵሎም ኣባላት እቲ ኣካል ድማ ብዙሓት ክነሶም ሓደ ኣካል ዝኾኑ፥ ክርስቶስ ድማ ከምኡ እዩ። ንሕና ኵላትና ኣይሁድ ኮነ ግሪካውያን፥ ባሮት ኮነ ናፃ፥ ብሓደ መንፈስ ናብ ሓደ ኣካል ተጠሚቕና ኢና፤ ኵላትና ድማ ሓደ መንፈስ ክንሰቲ ተዋሂብና።

እቲ ኣካል ካብ ብዙሓት ኣባላት ደኣ እዩ ዝቖውም እምበር፥ ካብ ሓደ ኣባል ኣይኮነን። እግሪ፥ “ኢድ ስለ ዘይኮንኩ፥ ካብቲ ኣካል ኣይኮንኩን” እንተ በለ፥ በዙይ ካብቲ ኣካል ዘይኸውን ኣይኮነን። እዝኒ ድማ፥ “ዓይኒ ስለ ዘይኮንኩ፥ ካብቲ ኣካል ኣይኮንኩን” እንተ በለ፥ በዙይ ካብቲ ኣካል ዘይኸውን ኣይኮነን። እቲ ኵሉ ኣካል ዓይኒ እንተ ዝኸውን፥ ምስማዕ ኣበይ ምሃለወ? ኵሉ እዝኒ እንተ ዝኸውንከ፥ ምጭናው ኣበይ ምሃለወ? ሕዚ ግና ኣቦና ንነፍሲ ወከፍ ካብቶም ኣባላት፥ ከምቲ ዝደለዮ ኣብቲ ኣካል ኣንበሮ። ኵሉ ሓደ ኣባል እንተ ዝኸውን፥ እቲ ኣካል ኣበይ ምሃለወ? ሕዚ ግና ብዙሓት ኣባላት ኣለዉ፥ ኣካል ግና ሓደ እዩ። ዓይኒ ንኢድ፥ “ኣየድልየንን ኢኻ” ክትብል ኣይትኽእልን፤ ርእሲ ድማ ንኣእጋር፥ “ኣየድልየንን ኢኹም” ክብል ኣይክእልን። ብኣንፃሩ ደኣ፥ እቶም ድኹማት ዝመስሉ ኣባላት ኣካል፥ ኣዝዮም ኣገደስቲ እዮም። ነቶም ዘይክቡራት ኢልና እንሓስቦም ኣባላት ኣካል፥ ብዝበለፀ ክብሪ ንኸድኖም፤ ነቶም ዘይግሃዱ ኣባላትና ድማ ብዝበለፀ ሕፍረት ንሕዞም፤ እቶም ዝግሃዱ ኣባላትና ግና እዙይ ኣየድልዮምን። ኣቦና ግና ነቲ ጐደሎ ዝኾነ ኣባል ዝለዓለ ክብሪ ሂቡ፥ ነቲ ኣካል ኣዋሃሃዶ፤ ኣብቲ ኣካል ምፍልላይ ምእንቲ ኸይህሉ፥ ኣባላቱ ድማ ንሓድሕዶም ማዕረ ምእንቲ ኽግደሱ እዩ። ሓደ ኣባል እንተ ተሳቐየ፥ ኵሎም ኣባላት ሓቢሮም ይሳቐዩ፤ ሓደ ኣባል እንተ ተኸብረ ድማ፥ ኵሎም ሓቢሮም ይሕጐሱ።

እምበኣር ንስኻትኩም ኣካል ክርስቶስ ኢኹም፤ ነፍሲ ወከፍኩም ድማ ኣባላቱ ኢኹም። ኣቦና ድማ ኣብ ቤተ ክርስቲያን፥ ቀዳማይ ሃዋርያት፥ ካልኣይ ነቢያት፥ ሳልሳይ መምህራን፥ ደሓር ተኣምራት፥ ደሓር ውህብቶ ምሕዋይ፥ ምትሕጋዝ፥ ምምሕዳር፥ ዝተፈላለየ ቋንቋታትን ሸመ። ኵሎም ሃዋርያትዶ እዮም? ኵሎም ነቢያትዶ እዮም? ኵሎም መምህራንዶ እዮም? ኵሎም ተኣምራትዶ ይገብሩ? ኵሎም ውህብቶ ምሕዋይዶ ኣለዎም? ኵሎም ብቋንቋታትዶ ይዛረቡ? ኵሎም ይትርጉሙዶ? ነቶም ዝዓበዩ ውህብቶታት ግና ህቀኑ። ኣነ ድማ ካብ ኵሉ ዝበልፅ መገዲ ከርእየኩም እየ።