1 ቆሮንቶስ 12

12 ¹ወንድሞችና እኅቶች ሆይ፤ ስለ መንፈሳዊ ስጦታዎች ሳታውቁ እንድትቀሩ አልፈልግም። ²አብን ሳታውቁ በነበራችሁ ጊዜ፣ በተመራችሁበት መንገድ ሁሉ ወደ ዲዳ ጣዖታት እየተመራችሁ ትስቱ እንደ ነበር ታውቃላችሁ። ³ስለዚህ እንድታውቁ እፈልጋለሁ፤ በመንፈስ ቅዱስ የሚናገር ማንም፣ “ኢየሱስ የተረገመ ነው” አይልም፤ በመንፈስ ቅዱስ ካልሆነ በቀር ማንም፣ “ኢየሱስ ጌታ ነው” ሊል አይችልም።

⁴የስጦታዎች ልዩ ልዩ ዐይነት አለ፤ መንፈስ ግን ያው ነው። ⁵የአገልግሎትም ልዩ ልዩ ዐይነት አለ፤ ጌታ ግን ያው ነው። ⁶ልዩ ልዩ አሠራሮችም አሉ፤ ነገር ግን በሁሉም ሰው ውስጥ ይህን ሁሉ የሚሠራ ያው አብ ነው። ^a a v6 እዚህ ጳውሎስ ሦስቱን አካላት በአንድነት ይጠቅሳል፦ ያው መንፈስ፣ ያው ጌታ ኢየሱስ፣ ያውም አብ፤ እያንዳንዳቸው በአንዱ የስጦታዎች ቤተ ሰብ ውስጥ የሚሠሩ ናቸው። ⁷ለእያንዳንዱ ሰው ለጋራ ጥቅም የመንፈስ ቅዱስ መገለጥ ይሰጠዋል። ⁸ለአንዱ በመንፈስ የጥበብ ቃል ይሰጠዋል፤ ለሌላው በዚያው መንፈስ የዕውቀት ቃል ይሰጠዋል፤ ⁹ለሌላው በዚያው መንፈስ እምነት፣ ለሌላው በአንዱ መንፈስ የመፈወስ ስጦታ ይሰጠዋል፤ ¹⁰ለሌላው ተአምራትን ማድረግ፣ ለሌላው ትንቢት መናገር፣ ለሌላው መናፍስትን መለየት፣ ለሌላው ልዩ ልዩ ልሳኖችን መናገር፣ ለሌላው የልሳኖች ፍች ይሰጠዋል። ¹¹ይህን ሁሉ የሚሠራ አንዱ ያው መንፈስ ነው፤ እርሱም እንደ ፈቀደ ለእያንዳንዱ ለብቻው ያካፍላል።

አንድ አካል፣ ብዙ ብልቶች

¹²አካል አንድ ሆኖ ብዙ ብልቶች አሉት፤ ብዙዎቹ ብልቶቹም ሁሉ አንድ አካልን ይመሠርታሉ፤ ክርስቶስም እንዲሁ ነው። ¹³አይሁድ ብንሆን የግሪክ ሰዎች፣ ባሪያዎች ብንሆን ነጻ ሰዎች፣ ሁላችን በአንዱ መንፈስ ወደ አንድ አካል ተጠምቀናል፤ ሁላችንም አንዱን መንፈስ እንድንጠጣ ተሰጥቶናል።

¹⁴አካል ከብዙ ብልቶች እንጂ ከአንድ ብልት የተገነባ አይደለምና። ¹⁵እግር፣ “እጅ ስላልሆንሁ የአካል ክፍል አይደለሁም” ቢል፣ ስለዚህ የአካል ክፍል መሆኑ አይቀርም። ¹⁶ጆሮም፣ “ዐይን ስላልሆንሁ የአካል ክፍል አይደለሁም” ቢል፣ ስለዚህ የአካል ክፍል መሆኑ አይቀርም። ¹⁷መላው አካል ዐይን ቢሆን ኖሮ፣ መስማት የት በሆነ? ሁሉ ጆሮ ቢሆን ኖሮ፣ ማሽተት የት በሆነ? ¹⁸አሁን ግን አባታችን እንደ ፈቀደ እያንዳንዱን ብልት በአካሉ ውስጥ አኖረ። ¹⁹ሁሉ አንድ ብልት ብቻ ቢሆን ኖሮ፣ አካሉ የት በሆነ? ²⁰አሁን ግን ብዙ ብልቶች አሉ፤ አካሉ ግን አንድ ነው። ²¹ዐይን እጅን፣ “አንተ አታስፈልገኝም” ሊለው አይችልም፤ ራስም እግሮችን፣ “አታስፈልጉኝም” ሊላቸው አይችልም። ²²እንዲያውም ይልቁን ደካማ የሚመስሉ የአካል ብልቶች እጅግ አስፈላጊዎች ናቸው። ²³ክብር የሚያንሳቸው የምንላቸውን የአካል ብልቶች የበለጠ ክብር እናለብሳቸዋለን፤ የማናምርባቸውንም ብልቶቻችን በበለጠ ጨዋነት እንይዛቸዋለን፤ ²⁴የምናምርባቸው ብልቶቻችን ግን ይህ አያስፈልጋቸውም። ነገር ግን አባታችን ጕድለት ላለበት ብልት የበለጠ ክብር በመስጠት አካሉን አገጣጠመው፤ ²⁵ይኸውም በአካል ውስጥ መለያየት እንዳይኖር፣ ብልቶቹም እርስ በርሳቸው በእኩል እንዲተሳሰቡ ነው። ²⁶አንድ ብልት ቢሠቃይ፣ ሁሉም ብልቶች አብረው ይሠቃያሉ፤ አንድ ብልት ቢከበር፣ ሁሉም አብረው ደስ ይላቸዋል።

²⁷እናንተም የክርስቶስ አካል ናችሁ፤ እያንዳንዳችሁም ብልቶቹ ናችሁ። ²⁸አባታችን በቤተ ክርስቲያን ውስጥ መጀመሪያ ሐዋርያትን፣ ሁለተኛ ነቢያትን፣ ሦስተኛ አስተማሪዎችን፣ ቀጥሎም ተአምራትን፣ ከዚያም የመፈወስ ስጦታዎችን፣ የመርዳትን፣ የማስተዳደርን፣ ልዩ ልዩ ልሳኖችንም ሾመ። ²⁹ሁሉ ሐዋርያት ናቸውን? ሁሉ ነቢያት ናቸውን? ሁሉ አስተማሪዎች ናቸውን? ሁሉ ተአምራትን ያደርጋሉን? ³⁰ሁሉ የመፈወስ ስጦታ አላቸውን? ሁሉ በልሳኖች ይናገራሉን? ሁሉ ይተረጕማሉን? ³¹ይልቁንም ታላላቆቹን ስጦታዎች በብርቱ ፈልጉ። እኔም ከሁሉ የሚበልጠውን መንገድ አሳያችኋለሁ።