Èyí tí ó tóbi jù nínú wọn
Gbogbo ẹ̀bùn tí wọ́n ń bá ara wọn díje lé lórí — èdè àjèjì, àsọtẹ́lẹ̀, ìmọ̀, ìgbàgbọ́ tí ń ṣí òkè nídìí, àní fífi ohun gbogbo tọrẹ — kò jámọ́ nǹkan kan láìsí ìfẹ́. Ìfẹ́ a máa mú sùúrù, kì í ka àṣìṣe sí ni lọ́rùn, ó sì ń wà pẹ́ ju àwọn ẹ̀bùn lọ, tí yóò dópin nígbà tí a bá rí ojú korojú.
13 1Bí mo bá ń fi èdè àwọn ènìyàn àti ti àwọn angẹli sọ̀rọ̀, ṣùgbọ́n tí èmi kò ní ìfẹ́, èmi dàbí idẹ tí ń dún, àti símbálì tí ń kọlu. 2Bí mo bá lè sọ àsọtẹ́lẹ̀, tí mo sì mọ gbogbo ohun ìkọ̀kọ̀ àti gbogbo ìmọ̀, tí mo sì ní gbogbo ìgbàgbọ́ tó láti ṣí àwọn òkè ńlá nídìí, ṣùgbọ́n tí èmi kò ní ìfẹ́, èmi kò jẹ́ ohunkóhun. 3Bí mo bá fi gbogbo ohun tí mo ní tọrẹ, bí mo bá sì fi ara mi lélẹ̀ kí èmi lè ní ìfọ́nnu, ṣùgbọ́n tí èmi kò ní ìfẹ́, kò sí èrè kankan tí mo rí.
4Ìfẹ́ ní sùúrù, ìfẹ́ ṣe inú rere. Kì í ṣe ìlara, kì í ṣe ìfọ́nnu, kì í gbéraga. 5Kì í hùwà àìtọ́, kì í wá ohun ti ara rẹ̀, kì í bínú kíákíá, kì í pa àkọsílẹ̀ ibi mọ́. 6Ìfẹ́ kì í yọ̀ nínú àìṣedéédéé, ṣùgbọ́n ó ń bá òtítọ́ yọ̀. 7Ó ń dáàbò bo ohun gbogbo nígbà gbogbo, ó ń gbàgbọ́ nígbà gbogbo, ó ní ìrètí nígbà gbogbo, ó ń fi sùúrù dúró nígbà gbogbo.
8Ìfẹ́ kì í kùnà láé. Ṣùgbọ́n àwọn àsọtẹ́lẹ̀ yóò dópin, àwọn èdè yóò dákẹ́, ìmọ̀ pẹ̀lú yóò dópin. 9Nítorí apá kan ni àwa mọ̀, apá kan sì ni àwa ń sọ àsọtẹ́lẹ̀, 10ṣùgbọ́n nígbà tí èyí tí ó pé bá dé, apá kan náà yóò parẹ́. 11Nígbà tí mo wà ní ọmọdé, mo ń sọ̀rọ̀ bí ọmọdé, mo ń ronú bí ọmọdé, mo ń rò bí ọmọdé. Nígbà tí mo di àgbà, mo fi àwọn ohun ọmọdé sílẹ̀. 12Nítorí nísinsìnyí àwa ń rí àwòrán rírú nínú dígí; ṣùgbọ́n nígbà náà, a ó rí ojúkojú. Nísinsìnyí apá kan ni mo mọ̀; ṣùgbọ́n nígbà náà, èmi yóò mọ̀ ní kíkún, gẹ́gẹ́ bí a ti mọ̀ mí ní kíkún. 13Ní báyìí, nǹkan mẹ́ta wọ̀nyí wà ní dídúró: ìgbàgbọ́, ìrètí, àti ìfẹ́. Ṣùgbọ́n èyí tí ó tóbi jù nínú wọn ni ìfẹ́.
