Mbuta mu kati dya mama
Makabu moosu mana bisi sosa—ndinga, kubikula, nzayilu, lukwikilu luna lwisi ningisa myongu, ata kuhana byosu—makondi mfunu konda lungongu. Lungongu lwisi sipha mbundu, lwisiku lunda mukanda wa mambu ma mbi, amana lwisi luta makabu mu kuzinga, mana makála yi tsuka tangwa twamona luse yi luse.
13 1Yuka ni yizonza mu ndinga za batu yi za banzyo, kaasi konda lungongu, yenina hanga ngongi yisi dila ngolu, hanga kibende kisi dila. 2Yuka ni yenina yi hamu dya kubikula, yi kubakula maswekamu moosu yi nzayilu yosu, yi kukala yi lukwikilu lwosu lwa kufwana mu kuningisa myongu, kaasi konda lungongu, yeku kima. 3Yuka ni yihana byosu bina yenina byawu, yi kulambula lutu lwama ndangu yaditsikisa, kaasi konda lungongu, yisiku tambula ndandu keti kimosi.
4Lungongu lwisi sipha mbundu, lungongu lwenina yi khenda. Lwisiku kala yi kiphala, lwisiku ditsikisa, lwisiku kala yi lulendu. 5Lwisiku songila mambu ma tsoni, lwisiku sanda ndandu ya lwawu-meni, lwisiku bwila khabu, lwisiku lunda mukanda wa mambu ma mbi. 6Lungongu lwisiku kala yi kyesi mu kukonda kwa masonga, kaasi lwisi sangwala yi kyedika. 7Lwisi tanina kosu tangwa, lwisi kwikila kosu tangwa, lwisi sila kivuvu kosu tangwa, lwisi kwamina kosu tangwa.
8Lungongu lwisi disalwoku mu kimakulu. Kaasi mbikutulu zakála yi tsuka, ndinga zafwa, yi nzayilu yakála yi tsuka. 9Mukuma tuzayi ndambu, amana tubikula ndambu, 10Kaasi tangwa kulungila kwakwísa, kina kya ndambu kisi disa. 11Tangwa yakála mwana, yázonza hanga mwana, yabánza hanga mwana, yázenga mabanza hanga mwana. Tangwa yákituka mbuta, yásisa mambu ma kimwana. 12Mukuma buthwena tumona kifwani kina kyasweka mu kiphelu, kaasi muna tangwa dina, ha munwa munwa. Buthwena yizayi ndambu, kaasi muna tangwa dina yakázaya byosu, bwosu meni yizayakana kyosu. 13Amana buthwena mama matatu manangina: lukwikilu, kivuvu, yi lungongu. Kaasi mu kati dya mama, lungongu lwenina lwa mbuta.
