1 کرنتھیوں 13

13 ¹اگر میں اِنسانوں اور فرشتوں کی زبانیں بولوں، لیکن محبت نہ رکھوں، تو میں محض ٹھنٹھناتا پیتل اور جھنجھناتی جھانجھ ہوں۔ ²اور اگر مجھے نبوّت کرنے کی توفیق ہو، اور میں تمام بھیدوں اور تمام علم کو سمجھوں، اور مجھے اِتنا اِیمان حاصل ہو کہ پہاڑوں کو ہٹا دوں، لیکن محبت نہ رکھوں، تو میں کچھ بھی نہیں۔ ³اور اگر میں اپنا سارا مال بانٹ دوں، اور اپنا بدن سپرد کر دوں تاکہ فخر کروں، لیکن محبت نہ رکھوں، تو مجھے کچھ فائدہ نہیں۔

⁴محبت صبر کرتی ہے، محبت مہربان ہے۔ وہ حسد نہیں کرتی، فخر نہیں کرتی، مغرور نہیں ہوتی۔ ⁵وہ بے اَدب نہیں، اپنی بہتری نہیں چاہتی، جھنجھلاتی نہیں، بدی کا حساب نہیں رکھتی۔ ⁶محبت ناراستی سے خوش نہیں ہوتی، بلکہ سچائی کے ساتھ خوشی مناتی ہے۔ ⁷وہ سب کچھ سہہ لیتی ہے، ہر بات پر اِعتبار کرتی ہے، ہر بات کی اُمید رکھتی ہے، ہر حال میں ثابت قدم رہتی ہے۔

⁸محبت کبھی زائل نہیں ہوتی۔ لیکن نبوّتیں ختم ہو جائیں گی، زبانیں تھم جائیں گی، اور علم مِٹ جائے گا۔ ⁹کیونکہ ہمارا علم ادھورا ہے اور ہماری نبوّت ادھوری ہے، ¹⁰لیکن جب کمال آئے گا، تو جو ادھورا ہے وہ جاتا رہے گا۔ ¹¹جب میں بچہ تھا، تو بچے کی طرح بولتا تھا، بچے کی طرح سوچتا تھا، بچے کی طرح سمجھتا تھا۔ لیکن جب میں مرد ہوا، تو میں نے بچپن کی باتیں ترک کر دیں۔ ¹²کیونکہ اب ہم آئینے میں دھندلا عکس دیکھتے ہیں؛ لیکن اُس وقت رُوبرُو دیکھیں گے۔ اب میرا علم ادھورا ہے؛ لیکن اُس وقت میں پورے طور پر جان لوں گا، جیسے میں پورے طور پر جانا گیا ہوں۔ ¹³اور اب یہ تینوں قائم رہتی ہیں: اِیمان، اُمید اور محبت۔ لیکن اِن میں سب سے بڑی محبت ہے۔