1 Wakorintho 13

13 ¹Nikinena kwa lugha za wanadamu na za malaika, lakini sina upendo, nimekuwa kama shaba iliayo au upatu uvumao. ²Nami nikiwa na kipawa cha unabii, na kufahamu siri zote na maarifa yote, na nikiwa na imani yote hata kuweza kuhamisha milima, lakini sina upendo, mimi si kitu. ³Tena nikitoa mali zangu zote kuwalisha maskini, na nikiutoa mwili wangu ili nijisifu, lakini sina upendo, hainifaidii kitu.

⁴Upendo huvumilia, upendo hufadhili. Upendo hauhusudu, upendo hautakabari, haujivuni. ⁵Haukosi adabu, hautafuti mambo yake wenyewe, hauchukizwi upesi, hauweki hesabu ya mabaya. ⁶Upendo haufurahii udhalimu, bali hufurahi pamoja na kweli. ⁷Upendo huvumilia yote, huamini yote, hutumaini yote, hustahimili yote.

⁸Upendo haupungui neno wakati wo wote. Lakini unabii utakoma, na lugha zitakoma, na maarifa yatakoma. ⁹Kwa maana twajua kwa sehemu, na twafanya unabii kwa sehemu, ¹⁰lakini ukamilifu utakapokuja, kile kilicho cha sehemu kitatoweka. ¹¹Nilipokuwa mtoto, nalisema kama mtoto, nalifikiri kama mtoto, nalitafakari kama mtoto. Nilipokuwa mtu mzima, naliyaacha mambo ya kitoto. ¹²Kwa maana wakati huu twaona kwa kioo, kwa jinsi ya fumbo; lakini wakati ule tutaona uso kwa uso. Wakati huu nafahamu kwa sehemu; lakini wakati ule nitajua kama mimi ninavyojulikana kikamilifu. ¹³Basi sasa yanadumu haya matatu: imani, tumaini, na upendo; lakini lililo kuu miongoni mwa haya ni upendo.