Lililo Kuu Miongoni mwa Haya
Kila karama wanayoshindania—lugha, unabii, maarifa, imani iondoayo milima, hata kutoa kila kitu alicho nacho—haifai kitu pasipo upendo. Upendo huvumilia, hauweki kumbukumbu ya mabaya, nao hudumu kuliko karama, ambazo zitakoma tutakapoona uso kwa uso.
13 1Nikinena kwa lugha za wanadamu na za malaika, lakini sina upendo, nimekuwa kama shaba iliayo au upatu uvumao. 2Nami nikiwa na kipawa cha unabii, na kufahamu siri zote na maarifa yote, na nikiwa na imani yote hata kuweza kuhamisha milima, lakini sina upendo, mimi si kitu. 3Tena nikitoa mali zangu zote kuwalisha maskini, na nikiutoa mwili wangu ili nijisifu, lakini sina upendo, hainifaidii kitu.
4Upendo huvumilia, upendo hufadhili. Upendo hauhusudu, upendo hautakabari, haujivuni. 5Haukosi adabu, hautafuti mambo yake wenyewe, hauchukizwi upesi, hauweki hesabu ya mabaya. 6Upendo haufurahii udhalimu, bali hufurahi pamoja na kweli. 7Upendo huvumilia yote, huamini yote, hutumaini yote, hustahimili yote.
8Upendo haupungui neno wakati wo wote. Lakini unabii utakoma, na lugha zitakoma, na maarifa yatakoma. 9Kwa maana twajua kwa sehemu, na twafanya unabii kwa sehemu, 10lakini ukamilifu utakapokuja, kile kilicho cha sehemu kitatoweka. 11Nilipokuwa mtoto, nalisema kama mtoto, nalifikiri kama mtoto, nalitafakari kama mtoto. Nilipokuwa mtu mzima, naliyaacha mambo ya kitoto. 12Kwa maana wakati huu twaona kwa kioo, kwa jinsi ya fumbo; lakini wakati ule tutaona uso kwa uso. Wakati huu nafahamu kwa sehemu; lakini wakati ule nitajua kama mimi ninavyojulikana kikamilifu. 13Basi sasa yanadumu haya matatu: imani, tumaini, na upendo; lakini lililo kuu miongoni mwa haya ni upendo.
