1 Wakorintho 14

14 ¹Fuatieni upendo, na kutamani sana karama za rohoni, lakini hasa mpate kutoa unabii. ²Anenaye kwa lugha hasemi na watu, bali na Baba yetu—kwa maana hakuna mtu amfahamuye—bali kwa Roho anena siri. ³Bali yeye atoaye unabii, huwaambia watu maneno ya kuwajenga, na kuwatia moyo, na kuwafariji. ⁴Anenaye kwa lugha hujijenga nafsi yake; bali atoaye unabii huijenga kanisa. ⁵Nataka ninyi nyote mnene kwa lugha, lakini zaidi mtoe unabii. Yeye atoaye unabii ni mkuu kuliko yeye anenaye kwa lugha, isipokuwa afasiri, ili kanisa lipate kujengwa.

⁶Basi, ndugu zangu, nikija kwenu nikinena kwa lugha, nitawafaa nini, nisipowaambia kwa njia ya ufunuo, au maarifa, au unabii, au mafundisho? ⁷Hata vitu visivyo na uhai vitoavyo sauti—kama filimbi au kinubi—kama havitoi tofauti ya sauti, jinsi gani mtu atakavyojua kilichopigwa? ⁸Na tarumbeta ikitoa sauti isiyodhihirika, ni nani atakayejiweka tayari kwa vita? ⁹Kadhalika na ninyi: msipotamka kwa ulimi maneno yaliyo dhahiri, jinsi gani mtu atakavyojua yaliyonenwa? Kwa maana mtakuwa mkinena hewani tu. ¹⁰Zipo lugha za namna nyingi ulimwenguni, bila shaka; wala hakuna hata moja isiyo na maana. ¹¹Basi nisipoijua maana ya sauti, nitakuwa mgeni kwa yeye anenaye, naye anenaye atakuwa mgeni kwangu. ¹²Kadhalika na ninyi: kwa kuwa mnatamani sana karama za rohoni, tafuteni kuzidi katika kulijenga kanisa. ¹³Kwa sababu hiyo yeye anenaye kwa lugha na aombe apate kuifasiri. ¹⁴Kwa maana nikiomba kwa lugha, roho yangu huomba, lakini akili yangu haina matunda.

¹⁵Basi nifanyeje? Nitaomba kwa roho, tena nitaomba kwa akili pia; nitaimba kwa roho, tena nitaimba kwa akili pia. ¹⁶Kwa maana ukibariki kwa roho, yeye aketiye mahali pa mgeni atasemaje "Amina" juu ya shukrani yako, kwa kuwa hajui usemalo? ¹⁷Wewe wafanya vyema kutoa shukrani, lakini yule mwingine hajengwi. ¹⁸Namshukuru Baba yetu kwamba mimi nanena kwa lugha kuliko ninyi nyote. ¹⁹Lakini katika kanisa napenda kunena maneno matano kwa akili yangu, nipate kuwafundisha wengine pia, kuliko maneno kumi elfu kwa lugha.

²⁰Ndugu zangu, msiwe watoto katika kufikiri. Kuweni watoto wachanga katika uovu, bali kuweni watu wazima katika kufikiri.

²¹Katika Torati imeandikwa: "Kwa watu wa lugha ngeni na kwa midomo ya wageni nitasema na watu hawa, wala hata hivyo hawatanisikiliza," asema Baba yetu.

²²Basi lugha ni ishara, si kwa waaminio, bali kwa wasioamini; bali unabii ni ishara, si kwa wasioamini, bali kwa waaminio. ²³Basi, kanisa lote likikusanyika pamoja, na wote wakinena kwa lugha, na wakiingia watu wasiojua au wasioamini, je! hawatasema kwamba mna wazimu? ²⁴Lakini wote wakitoa unabii, akiingia mtu asiyeamini au asiyejua, hushitakiwa na wote, huhukumiwa na wote, ²⁵siri za moyo wake hufunuliwa; hivyo huanguka kifudifudi na kumsujudia Baba yetu, akikiri kwamba Baba yetu yumo kati yenu kweli kweli.

Ibada kwa Utaratibu Unaostahili

²⁶Basi ni nini, ndugu zangu? Mnapokutana, kila mmoja ana wimbo, ana mafundisho, ana ufunuo, ana lugha, ana tafsiri. Mambo yote na yatendeke kwa kusudi la kujenga. ²⁷Kama mtu akinena kwa lugha, wanene wawili au watatu kwa uchache, kila mmoja kwa zamu, na mmoja na afasiri. ²⁸Ila kama hakuna mfasiri, na anyamaze kimya katika kanisa, ajinene mwenyewe na kwa Baba yetu. ²⁹Manabii na wanene wawili au watatu, na wengine na wapime kwa uangalifu yaliyonenwa. ³⁰Lakini mtu mwingine aketiye akipata ufunuo, yule wa kwanza na anyamaze. ³¹Kwa maana ninyi nyote mwaweza kutoa unabii mmoja mmoja, ili wote wapate kujifunza, na wote watiwe moyo, ³²nazo roho za manabii huwatii manabii. ³³Kwa maana Baba yetu si Mungu wa machafuko, bali wa amani, kama ilivyo katika makanisa yote ya watakatifu. ³⁴Wanawake na wakae kimya katika makanisa; kwa maana hawana ruhusa kunena, bali watii, kama vile Torati isemavyo. ^a a v34 Baadhi ya nakala huweka mistari 34-35 baada ya mstari wa 40. ³⁵Nao wakitaka kujifunza neno lo lote, na wawaulize waume zao wenyewe nyumbani; kwa maana ni aibu mwanamke kunena katika kanisa. ³⁶Au je! neno la Baba yetu lilianzia kwenu? Au liliwafikia ninyi peke yenu? ³⁷Mtu akijiona kuwa ni nabii au ni mtu wa rohoni, na aitambue kwamba mambo ninayowaandikia ni amri ya Bwana. ³⁸Lakini mtu akiyapuuza haya, naye mwenyewe atapuuzwa.

³⁹Basi, ndugu zangu, takeni sana kutoa unabii, wala msikataze kunena kwa lugha. ⁴⁰Lakini mambo yote na yatendeke kwa uzuri na kwa utaratibu.