Hibingwui Ngachaili Reimeikap
Ngararum khala ngasak kachida — tui kathang, prophecy, theikhavai, kaphung sākashai shitsanna, ngasakta kachida ngasak kahaila — leishina maleikha kha maleiya. Leishina chi khangmasoa, kaharvā kaphok malaira, kala ngasakbing ngāchaihai, mangā kala mangā ngayaokhavaili ngāchaihai.
13 1Ina mikumo kala kazingraobingwui tuiyur matuilala, leikashi maleiakha, ina kakhong kāntā akha, kala kakhong kortar akha kathāna. 2Ina phongkhami sāshaprala, mashun tui saikora kala awor saikora theishingkhuilala, kala kaphungbing phurashaprai shitkasang saikora leilala, kha leikashi maleiakha, ina khikha maningmana. 3Iwui khalalei saikora mihailala, kala lāngsopai khavai iphasā horsangda, leikashi maleiakha, ina khikha tongkazā masamphangmana.
4Leikashi khāngkathei, leikashi ning kāna. Chi mayuishimana, malangsomana, kala langkaso maleimana. 5Chi khayak otsak masāmana, khalattawui vang maphāmana, malung mathuimana, kala khayonkhamāng chi maphaningchingmana. 6Leikashi makhamashungli ningyāng maungmana, kha khamashungli ringphāra. 7Chi atam kachida phāriya, atam kachida shitsanga, atam kachida kachihān leiya, atam kachida khāngkashapa.
8Leikashi chi katang makhavaimana. Kha phongkhamibing chi khavaira, tuiyur chi ngasāmhaora, kala awor chi khavaira. 9Kaja ithumna kaikhamāng theiya, kala kaikhamāng phongmira, 10kha tākam kahai chi kharā tharan, kaikhamāng leikahai chi thengserhaora. 11Ina naoshinao ngasāda leilakha, naoshinao kathāda matuiya, naoshinao kathāda phaninga, naoshinao kathāda ngaphat-ngayāt sai. Ina mayarnao ngasākahai tharan, naoshinaowui khangachā saikora chi nothāhaowa. 12Kaja arui ithumna ka̱lāra̱ngayotli matharzā azak akha theiya; chitharan, mai eina mai theinaora. Arui ina kaikhamāng theiya; chitharan ina thaklāk eina theimi kahai thāda, inala thaklāk eina theira. 13Kala arui shitkasang, kachihān, kala leikashi, hi kathum leichingra. Kha hibingwui ngachaili reimeikap chi leikashina.
