ኣቦታትና ዝነገሩና

ንሓለቓ ዘመርቲ። ናይ ደቂ ቆሬ መዝሙረ ጥበብ።

እቲ ህዝቢ ነቲ ኣቦታቶም ዝነገርዎም ዓወት ይደግም፥ ሽዑ ምስ እዋኖም የወዳድሮ፦ ተሳዒሮም፥ ተዘሚቶም፥ ብሓሳር ተሸይጦም፥ ኣብ ማእኸል ኣህዛብ መመሰሊ ኾይኖም — ኪዳን ከይጠለሙ ኸለዉ ድማ፥ ይምጕቱ። እቲ ፀሎት ነቦኦም “ስለምንታይ ትድቅስ?” ብምሕታት ይውዳእ።

ምዕራፍ 44።

ኦ ኣቦና፥ ብኣእዛንና ሰሚዕና ኢና፤ ኣቦታትና ነቲ ብመዓልቶም፥ ብቐደም ዘመን ዝገበርካዮ ግብሪ ነጊሮምና። ብኢድካ ነህዛብ ሰጐግካዮም፥ ንኣቦታትና ግና ተኸልካዮም፤ ንህዝብታት ጨፍለቕካዮም፥ ንኣቦታትና ግና ኣናገፍካዮም። ንሳቶም ንምድሪ ብሰይፎም ኣይወረስዋን እዮም እሞ፥ ናይ ባዕሎም ቅልፅም ከዓ ኣየድሓኖምን፤ ስለ ዝፈተኻዮም የማነይቲ ኢድካን ቅልፅምካን ብርሃን ገፅካ እዩ ነይሩ።

ኦ ኣቦና፥ ንስኻ ንጉሰይ ኢኻ፤ ንያእቆብ ዓወት ኣዝዝ። ብኣኻ ንፀላእትና ንደፍኦም፤ ብስምካ ነቶም ዝትንስኡና ንረግፆም። ኣብ ቀስተይ ኣይእመንን እየ እሞ፥ ሰይፈይ ከዓ ኣየድሕነንን እዩ። ንስኻ ግና ካብ ፀላእትና ኣድሓንካና፥ ነቶም ዝፀልኡና ኸዓ ኣሕፈርካዮም። ምሉእ መዓልቲ ብኣቦና ተጀሃርና፥ ንስምካውን ንዘለኣለም ከነመስግኖ ኢና። ^a

ሕዚ ግና ነዓቕካና ኣሕፈርካናውን፥ ምስ ሰራዊትናውን ኣይትወፅእን ኢኻ። ካብ ቅድሚ ፀላኢ ንድሕሪት ክንምለስ ትገብረና፥ እቶም ዝፀልኡና ኸዓ ከም ዝደለይዎ ይዘምቱና። ከም ዝብላዕ ኣባጊዕ ኣሕሊፍካ ሃብካና፥ ኣብ ማእኸል ኣህዛብ ከዓ በተንካና። ንህዝብኻ ብሓሳር ሸጥካዮም፥ ካብ ሽያጦም ከዓ ዋጋ ኣይረኸብካን። ንጐረባብትና መፅረፊ ትገብረና፥ ኣብ ከባቢና ንዘለዉ ኸዓ መላገፂ መናዓቒን ገበርካና። ኣብ ማእኸል ኣህዛብ መመሰሊ ትገብረና፥ እቶም ኣህዛብ ርእሶም ዝንቕንቑልና ህዝቢ ኢና። ውርደተይ ምሉእ መዓልቲ ኣብ ቅድመይ ኣሎ፥ ሕፍረት ከዓ ገፀይ ከደኖ፥ ብድምፂ እቲ ዝፀርፍን ዘላግፅን፥ ብቕድሚ እቲ ሕነ ዝፈዲ ፀላኢ።

እዝ ዅሉ ናባና መፀ፥ ንኣኻ ግና ኣይረሳዕናካን፥ ንኺዳንካውን ኣይጠለምናዮን። ልብና ንድሕሪት ኣይተመለሰን፥ ስጓምናውን ካብ መንገድኻ ኣይወፀን፥ ኣብ መሕደሪ ወኻሩ ጨፍሊቕካና፥ ብዓሚቝ ፀልማት ከዓ ከዲንካና እኳ እንተ ኾንካ። ንስም ኣቦና ረሲዕና፥ ወይ ኢድና ናብ ባዕዲ ኣምላኽ ዘርጊሕና እንተ ንኸውን ኔርና፥ ኣቦና ነዙይ ኣይምፈለጦንዶ ኔሩ? ንሱ ምስጢር ልቢ ይፈልጥ እዩ እሞ። ምእንታኻ ኢልና ምሉእ መዓልቲ ንቕተል ኣለና፤ ከም ዝሕረዳ ኣባጊዕ ተቘፂርና ኣለና። ^b

ተበራበር! ኦ ጐይታ ኣቦ፥ ስለምንታይ ትድቅስ? ተስእ፤ ንዘለኣለም ኣይትደርብየና። ስለምንታይ ገፅካ ትሰውር፥ መከራና ግፍዕናን ከዓ ትርስዕ? ነፍስና ናብ መሬት ለጠቕ በለት እሞ፤ ስጋና ኣብ ምድሪ ተፀግዐ። ተንስእ፥ ርድኣና! ምእንቲ ምሕረትካ ኢልካ ኣድሕነና።