Jeremiah 32

32 ¹Judahwui awunga Zedekiahli mungda kathara kum, Nebuchadnezzarwui mungda tharāda kachishat kum, ithumwui Avāwui tui china Jeremiahli rāhānga: ²Atam chitharan Babylonwui raimibingna Jerusalemli kuinamda leilakha, marān Jeremiahna Judahwui awungawui keinungli khalei raikānwui yāngkhupli phātop sangda leisai.

³Kaja Judahwui awunga Zedekiahna ali phātop sanghailaga hānga, "Khisāda nana marānmida hānga, 'Ithumwui Avāna hithāda hānga: Yanglu, ina keinung hili Babylonwui awungawui pāngli horsangmira, kala ana chi yuira;

⁴"Judahwui awunga Zedekiahna Chaldeanaobingwui eina mayāmshokmara; ali kachangkhata Babylonwui awungawui pāngli horsangmihaora, kala ana awuili khamor eina khamor matuira, kala mik eina mik theiserra. ⁵Ana Zedekiahli Babylonli khuiungra, kala ina ali fathuiranglakha eina tangda chili pamra, da ithumwui Avāna hānga. Nathumna Chaldeanaobingli ngararlala, chi maungshungmara.'"

⁶Kala Jeremiahna hānga, "Ithumwui Avāwui tui china ili rāhānga:

⁷Yanglu, nawui avāgato Shallumwui naomayara Hanamelna nali hāng khavai rārāli: Anathothli khalei iwui lam chi alolu, kaja chi alo khavai ngatangkhuiwui ngalei nawuina."

⁸Chieina ithumwui Avāna kahāng thāda, iwui achinā Hanamel china raikānwui yāngkhupli ili rāsamphanga, kala ili hānga, 'Benjaminwui ngaleili khalei Anathothli iwui lam chi alolu, kaja shimluiwui ngalei nawuina, kala ngatangkhuila nawuina; chi alolu.' Chieina hi ithumwui Avāwui tui chi kaji ina thei.

⁹Chieina ina iwui achinā Hanamelwui eina Anathothli khalei lam chi alokhui, kala lupā ounce shini shākha khān tamda ali miya. ¹⁰Ina lairikli shoi sālaga chi seali sāhai, kala shākhibingli hokhui, kala lupā chi khānli khāntamda mi. ¹¹Chieina ina lo kahaiwui lairik seali kasā chi, chiwui shiyan-chikan eina ngasoda, kala lairik shohai chila khuida, ¹²Iwui achinā Hanamelwui mangāli, chi shoi sākahai shākhibingwui mangāli, kala raikānwui yāngkhupli pamda khalei Judahwui mibing saikorawui mangāli, ina lo kahaiwui lairik chi Mahseiahwui nao Neriahwui naomayara Baruchli mihaowa.

¹³Kala athumwui mangāli ina Baruchli kasoda hānga:

¹⁴"Saikorawui Avā, Israelwui ithumwui Avāna hithāda hānga: Lo kahaiwui lairik seali kasā chi kala lairik shohai chi, lairik khanini hi khuilu, kala atam katāda pampham khavai leikhon ham akhali sanglu. ¹⁵Kaja saikorawui Avā, Israelwui ithumwui Avāna hithāda hānga: Ngalei hili khalei shim, lam, kala drakhā yāmguibing latluida alora."

Jeremiahwui Seihā Kasā: Nawui Vang Khikha Saknā Kahai Maleimana

¹⁶Lo kahaiwui lairik chi Neriahwui naomayara Baruchli mi kahaiwui thili, ina ithumwui Avāli seihā sai: ¹⁷"Iyavo, O Proho Avā! Na khalatta nawui pangshap reikhamatai eina kala nawui pāngthei katingda kazing eina ngalei chi sai; nawui vang khikha saknā kahai maleimana. ¹⁸Na thingthingli lukhamashan chitheimi, kha avāva̱ ngarāwui khayonkhamāng chi athumwui thili naongarāwui ngalemli tandi khame, O reikhamatai, pangshapa Avā, saikorawui Avā da awui mingna. ¹⁹Hāngkachitheili reikhamatai, otsakli pangshapa, nawui mik miwui naongarāwui shongfa saikorali khaya lei, mi kachiva̱li awui shongfa athishurda, awui otsakwui athei athishurda sāman mira. ²⁰Na Egypt ngaleili machut kala matakhak kahai ot sāchithei, kala aja zimiksho eina tangda Israelli kala miwui naongarā ngachaili sāchithei; aja khalei thāda nakhalattawui vang ming sākhui. ²¹Na nawui mi Israelli machut, matakhak kahai ot, kapanga pāng, pāngthei katingda, kala khangachee khangachā eina ngasoda Egypt ngaleiwui eina thānshoka. ²²Athumwui avā ngarāli mira da na khangashit sākahai, seina̱ eina khuira̱ khalonga ngalei hi na athumli miya. ²³Athumna vāzangda khuiya, kha nawui kahāng manganāmana lah nawui ain athishurda mazatmana; nana athumli sākhavai kaso kahai saikora, athumna masāmana horhaowa. Chiwui vang nana hi kalāshāt saikora athumwuitungli thānshoka. ²⁴Rampho keinung chi yui khavai rāshunghaira; raighai, chāmrei, kala kazātkashiwui vang, keinung hili ngararkida Chaldeanaobingwui pāngli horsangmihaira. Nana kahāng kahai chi shokhaira, kala nana theihaira. ²⁵Chithālala, O Proho Avā, keinung chi Chaldeanaobingwui pāngli horsangmihaira chitharanla, nana ili ‘Lam chi lupā eina lolu, kala shākhibing holu’ da hānga."

²⁶Chieina ithumwui Avāwui tui chi Jeremiahli rāhānga:

²⁷"Iya phasā khavai saikorawui Avāna. Iwui vang saknā kahai ot khikha leimala? ²⁸Chithāda ithumwui Avāna hānga: Ina keinung hi Chaldeanaobingwui pāngli, Babylonwui awunga Nebuchadnezzarwui pāngli horsangmira, kala ana chi yuira. ²⁹Keinung hili ngararkida Chaldeanaobing rāra, kala keinung hi mei eina thottāmihaora, kala mibingna shimtungli Baalli kachigat riktāda vare khangatei ngarāli mangkachigat heirorda ili malungvāt ngasak kahai shimbing chila mei eina thottāmihaora.

³⁰"Israel eina Judahwui mibingna nganuilakhawui eina thuida iwui miktāli makaphā ot chimāng sai; Israelna athumwui pāngwui ot eina ili malungvāt ngasak chimāng sai, da ithumwui Avāna hānga.

³¹"Keinung hi sākahai ngayāwui eina thuida ara eina tangda ili malungvāt kala sāshāt ngasakhaira, chiwui vang ina chi iwui mikyanwui eina khuithuira, ³²Israel eina Judahwui mibing, athumwui awungabing, wungnaobing, pāngmonbing, marānbing, Judahwui mibing, kala Jerusalemli kapāna mibingna ili malungvāt ngasak khavai sākahai makaphā ot saikorawui vangna. ³³Athumna ili mai maningla khanuk ngareimi. Ina athumli latlui latluida tamchitheihailala, athumna nganā khavai lah hāngkhamachin khuisang khavai mamayāmana. ³⁴Athumna iwui ming eina hokahai shimli, chi masākhamāng khavai, athumwui ningkakachai otbing kapangkhuiya. ³⁵Athumna athumwui naomayara kala ngalāva̱bing Molechli pha̱phayā khavai Hinnomwui naomayarawui tampākli Baalwui kajujuipam sākhui. Athumna ningkakachai ot hi sāda Judahli morei sāngasak khavai chi ina makakaso, iwui ningla maleisālak kaji otna."

Athumna Iwui Naongarā Ngasāra; Ina Athumwui Avā Ngasāra

³⁶"Ara nathumna 'Raighai eina, chāmrei eina, kala kazātkashi eina Babylonwui awungawui pāngli horsangmi kahaina' da kahāng keinung hiwui pongli Israelwui ithumwui Avāna hithāda hānga:

³⁷"Iwui malungkhavāt, iwui malungkathui, kala malung kasā kachungkha eina ina athumli bani kahai ram saikorawui eina athumli kazipkhuira, kala apam hili khuiungluishitra, kala athumli ning tāphup eina okthui ngasakra. ³⁸Athumna iwui naongarā ngasāra, kala Ina athumwui Avā ngasāra. ³⁹Athumwui kaphāwui vang kala athum thili leida khalei athumwui naongarāwui vang, atam kachida ili khangachee khavai ina athumli ning akha kala apong akha mira. ⁴⁰Ina athumli katang makhavai tuingashit akha sāra, athumli kaphā sāki kaji chi katang matāmeimara; iwui khangachee athumwui ningli sangmira, chieina athum iwui eina matāmeimara. ⁴¹Ina athumwuitungli mathānra, athumli mathāmeida, kala iwui wuklung tonga kala iwui manglā tonga eina kachangkhat eina apam hili athumli lingra."

⁴²Kaja ithumwui Avāna hithāda hānga: "Ina mibing hiwuitungli kalākashi kachungkha hi saikora khuikharā thāda, chithāda ina athumwuitungli iwui hangmiserhai kaphā saikora khuirāra. ⁴³Nathumna 'Chaldeanaobingwui pāngli horsangda mila sāla makhalei ngachakyānghaira' da kahāng ngalei hili lam lokakhuira. ⁴⁴Benjamin ngaleili, Jerusalemli kuimareida khalei ngaleibingli, Judahwui keinungbingli, kaphungramli, angakoli, kala Negebli lairik kapida, sa̱phinda, kala shākhi khuida lam lupāsā eina lokakhuira, kaja ina athumwui shimlui hanmiluishitra, da ithumwui Avāna hānga."