எரேமியா 32

32 ¹யூதாவின் ராஜாவாகிய சிதேக்கியாவின் பத்தாம் வருஷத்திலும், நேபுகாத்நேச்சாரின் பதினெட்டாம் வருஷத்திலும், எங்கள் பிதாவினிடத்திலிருந்து எரேமியாவுக்கு உண்டான வார்த்தை. ²அக்காலத்திலே பாபிலோனுடைய சேனை எருசலேமை முற்றிக்கை போட்டிருந்தது; தீர்க்கதரிசியாகிய எரேமியா யூதாவின் ராஜாவுடைய அரமனையிலிருந்த காவற்கூடத்தின் முற்றத்தில் அடைக்கப்பட்டிருந்தான்.

³யூதாவின் ராஜாவாகிய சிதேக்கியா அவனைச் சிறையில் அடைத்திருந்தான்; அவன்: “நீ ஏன் தீர்க்கதரிசனம் சொல்லி, ‘எங்கள் பிதா சொல்லுகிறது இதுவே: இதோ, நான் இந்த நகரத்தைப் பாபிலோன் ராஜாவின் கையில் ஒப்புக்கொடுக்கப்போகிறேன், அவன் அதைப் பிடிப்பான்;

⁴யூதாவின் ராஜாவாகிய சிதேக்கியா கல்தேயரின் கைக்குத் தப்பிப்போகமாட்டான்; அவன் நிச்சயமாய்ப் பாபிலோன் ராஜாவின் கையில் ஒப்புக்கொடுக்கப்படுவான்; அவனோடே வாய்க்கு வாய் பேசி, கண்ணுக்குக் கண் காண்பான். ⁵அவன் சிதேக்கியாவைப் பாபிலோனுக்குக் கொண்டுபோவான்; நான் அவனைச் சந்திக்கும்வரைக்கும் அவன் அங்கே இருப்பான் என்று எங்கள் பிதா சொல்லுகிறார்; நீங்கள் கல்தேயரோடே யுத்தம்பண்ணினாலும் உங்களுக்குக் கைகூடிவராது’ என்று சொல்லுகிறாய்?” என்றான்.

⁶அப்பொழுது எரேமியா சொன்னது: “எங்கள் பிதாவின் வார்த்தை எனக்கு உண்டாகி:

⁷இதோ, உன் சிறியதகப்பனாகிய சல்லூமின் குமாரன் அனாமெயேல் உன்னிடத்தில் வந்து: ஆனதோத்திலிருக்கிற என் வயலை நீ வாங்கிக்கொள்; அதை மீட்டுக்கொள்ளும் உரிமை உனக்கு உண்டு என்று சொல்லுவான் என்றார்.

⁸எங்கள் பிதா சொன்னபடியே, என் சிறியதகப்பன் குமாரனாகிய அனாமெயேல் காவற்கூடத்தின் முற்றத்தில் என்னிடத்தில் வந்து: பென்யமீன் தேசத்திலுள்ள ஆனதோத்திலிருக்கிற என் வயலை நீ வாங்கிக்கொள்; சுதந்தரிக்கும் உரிமையும் மீட்டுக்கொள்ளும் உரிமையும் உனக்கு உண்டு; அதை உனக்காக வாங்கிக்கொள் என்று சொன்னான்; அப்பொழுது இது எங்கள் பிதாவின் வார்த்தை என்று அறிந்துகொண்டேன்.

⁹ஆகையால் நான் ஆனதோத்திலிருக்கிற அந்த வயலை என் சிறியதகப்பன் குமாரனாகிய அனாமெயேலின் கையிலே வாங்கி, ஏறக்குறைய ஏழு அவுன்ஸ் வெள்ளியை அவனுக்கு நிறுத்துக்கொடுத்தேன். ¹⁰நான் சாதனத்தில் கையெழுத்துப்போட்டு, அதை முத்திரையிட்டு, சாட்சிகளை வரவழைத்து, தராசிலே பணத்தை நிறுத்தேன். ¹¹பின்பு நான், விதிமுறைகளும் நிபந்தனைகளும் கொண்ட, முத்திரையிடப்பட்ட கிரயச்சாதனத்தையும், திறந்திருந்த சாதனத்தையும் எடுத்து, ¹²அந்தக் கிரயச்சாதனத்தை, என் சிறியதகப்பன் குமாரனாகிய அனாமெயேலுக்கு முன்பாகவும், கிரயச்சாதனத்தில் கையெழுத்துப்போட்ட சாட்சிகளுக்கு முன்பாகவும், காவற்கூடத்தின் முற்றத்தில் உட்கார்ந்திருந்த எல்லா யூதருக்கும் முன்பாகவும், மகாசெயாவின் குமாரனாகிய நேரியாவின் மகன் பாருகிடத்தில் கொடுத்து,

¹³அவர்களுக்கு முன்பாக நான் பாருகுக்குக் கட்டளையிட்டுச் சொன்னது:

¹⁴“பரலோக சேனைகளின் பிதாவும் இஸ்ரவேலின் எங்கள் பிதாவுமானவர் சொல்லுகிறது இதுவே: முத்திரையிடப்பட்ட இந்தக் கிரயச்சாதனத்தையும், திறந்திருக்கிற இந்தச் சாதனத்தையும் எடுத்து, அவைகள் அநேகநாள் நிலைத்திருக்கும்படி ஒரு மண்பாண்டத்தில் வைக்கவேண்டும். ¹⁵ஏனெனில் பரலோக சேனைகளின் பிதாவும் இஸ்ரவேலின் எங்கள் பிதாவுமானவர் சொல்லுகிறது: இந்த தேசத்தில் வீடுகளும், வயல்களும், திராட்சத்தோட்டங்களும் இன்னும் வாங்கப்படும்” என்றேன்.

எரேமியாவின் ஜெபம்: உமக்கு அரிதானது ஒன்றுமில்லை

¹⁶நேரியாவின் குமாரனாகிய பாருகிடத்தில் அந்தக் கிரயச்சாதனத்தைக் கொடுத்தபின்பு, நான் எங்கள் பிதாவை நோக்கி விண்ணப்பம்பண்ணி: ¹⁷“ஆ, ஆண்டவராகிய பிதாவே! இதோ, தேவரீர் உம்முடைய மகா பலத்தினாலும், நீட்டப்பட்ட உம்முடைய புயத்தினாலும் வானத்தையும் பூமியையும் உண்டாக்கினீர்; உமக்கு அரிதான காரியம் ஒன்றுமில்லை. ¹⁸நீர் ஆயிரம்பேருக்கு உறுதியான அன்பைக் காண்பித்து, பிதாக்களுடைய அக்கிரமத்தை அவர்களுக்குப்பின் வரும் அவர்கள் பிள்ளைகளின் மடியிலே சரிக்கட்டுகிறவர்; மகத்துவமும் வல்லமையுமுள்ள பிதாவே, பரலோக சேனைகளின் பிதா என்பது அவருடைய நாமம். ¹⁹ஆலோசனையில் பெரியவரும், செயலில் வல்லவருமானவரே; மனுஷருடைய எல்லா வழிகளின்மேலும் உம்முடைய கண்கள் திறந்திருக்கிறது; அவனவனுடைய வழிகளுக்குத்தக்கதாகவும், அவனவனுடைய செய்கைகளின் பலனுக்குத்தக்கதாகவும் அவனவனுக்குப் பலனளிக்கிறீர். ²⁰நீர் எகிப்து தேசத்தில் அடையாளங்களையும் அற்புதங்களையும் செய்தீர்; இந்நாள்வரைக்கும் இஸ்ரவேலிலும் மனுஷர் நடுவிலும் அப்படியே செய்து, இந்நாளில் இருக்கிறபடி உமக்கு ஒரு நாமத்தை உண்டாக்கினீர். ²¹நீர் உம்முடைய ஜனமாகிய இஸ்ரவேலை அடையாளங்களோடும், அற்புதங்களோடும், பலத்த கையோடும், நீட்டப்பட்ட புயத்தோடும், மகா பயங்கரத்தோடும் எகிப்து தேசத்திலிருந்து புறப்படப்பண்ணி, ²²அவர்களுடைய பிதாக்களுக்குக் கொடுப்பேன் என்று நீர் ஆணையிட்ட, பாலும் தேனும் ஓடுகிற இந்த தேசத்தை அவர்களுக்குக் கொடுத்தீர். ²³அவர்கள் அதில் பிரவேசித்து அதைச் சுதந்தரித்துக்கொண்டார்கள்; ஆனாலும் அவர்கள் உம்முடைய சத்தத்துக்குக் கீழ்ப்படியாமலும், உம்முடைய பிரமாணத்தில் நடவாமலும் போனார்கள்; அவர்கள் செய்யும்படி நீர் கட்டளையிட்ட எதையும் அவர்கள் செய்யவில்லை; ஆகையால் இந்த ஆபத்தையெல்லாம் அவர்கள்மேல் வரப்பண்ணினீர். ²⁴இதோ, இந்த நகரத்தைப் பிடிக்கும்படிக்கு முற்றிக்கைமேடுகள் அதின் அருகில் வந்திருக்கிறது; பட்டயத்தினாலும், பஞ்சத்தினாலும், கொள்ளைநோயினாலும் இந்த நகரம் அதற்கு விரோதமாய் யுத்தம்பண்ணுகிற கல்தேயரின் கையில் ஒப்புக்கொடுக்கப்பட்டது; நீர் சொன்னது நிறைவேறிற்று; அதைத் தேவரீர் காண்கிறீர். ²⁵ஆனாலும் ஆண்டவராகிய பிதாவே, தேவரீர் என்னை நோக்கி: ‘நீ பணங்கொடுத்து அந்த வயலை வாங்கி, சாட்சிகளை வைத்துக்கொள்’ என்று சொன்னீரே; இந்த நகரமோ கல்தேயரின் கையில் ஒப்புக்கொடுக்கப்பட்டதே” என்றேன்.

²⁶அப்பொழுது எங்கள் பிதாவின் வார்த்தை எரேமியாவுக்கு உண்டாகி:

²⁷“இதோ, நான் மாம்சமான யாவருக்கும் பிதா; எனக்கு அரிதான காரியம் ஏதாவது உண்டோ? ²⁸ஆகையால் எங்கள் பிதா சொல்லுகிறது: இதோ, நான் இந்த நகரத்தைக் கல்தேயரின் கையிலும், பாபிலோன் ராஜாவாகிய நேபுகாத்நேச்சாரின் கையிலும் ஒப்புக்கொடுக்கிறேன்; அவன் அதைப் பிடிப்பான். ²⁹இந்த நகரத்துக்கு விரோதமாய் யுத்தம்பண்ணுகிற கல்தேயர் வந்து, இந்த நகரத்தை அக்கினியால் கொளுத்திச் சுட்டெரிப்பார்கள்; எந்த வீடுகளின் மேல்தட்டுகளில் ஜனங்கள் பாகாலுக்குத் தூபங்காட்டி, அந்நிய தேவர்களுக்குப் பானபலிகளை வார்த்து என்னைக் கோபமூட்டினார்களோ, அந்த வீடுகளையும் சுட்டெரிப்பார்கள்.

³⁰“இஸ்ரவேல் புத்திரரும் யூதா புத்திரரும் தங்கள் சிறுவயதுமுதல் என் பார்வைக்குப் பொல்லாப்பையேயன்றி வேறொன்றையும் செய்யவில்லை; இஸ்ரவேலர் தங்கள் கைகளின் செய்கைகளால் என்னைக் கோபமூட்டினதேயன்றி வேறொன்றையும் செய்யவில்லை என்று எங்கள் பிதா சொல்லுகிறார்.

³¹“இந்த நகரம் கட்டப்பட்ட நாள்முதல் இந்நாள்வரைக்கும் எனக்குக் கோபமும் உக்கிரமும் மூட்டுகிறதாயிருந்தது; ஆகையால் நான் அதை என் முகத்துக்கு முன்னின்று அகற்றிப்போடுவேன். ³²இஸ்ரவேல் புத்திரரும் யூதா புத்திரரும் என்னைக் கோபமூட்டும்படி செய்த எல்லாப் பொல்லாப்பின் நிமித்தமே இப்படிச் செய்வேன்; அவர்களும், அவர்களுடைய ராஜாக்களும், பிரபுக்களும், ஆசாரியர்களும், தீர்க்கதரிசிகளும், யூதாவின் மனுஷரும், எருசலேமின் குடிகளுமே அப்படிச் செய்தார்கள். ³³அவர்கள் என்னை நோக்கி முகத்தை அல்ல, முதுகைக் காட்டினார்கள்; நான் ஏற்கனவே எழுந்து மறுபடியும் மறுபடியும் அவர்களுக்குப் போதித்தும், அவர்கள் புத்தியை ஏற்றுக்கொள்ளவும் கேட்கவும் மனதில்லாதிருந்தார்கள். ³⁴என் நாமம் தரிக்கப்பட்ட ஆலயத்தைத் தீட்டுப்படுத்தும்படிக்கு, அதிலே தங்கள் அருவருப்புகளை வைத்தார்கள். ³⁵அவர்கள் தங்கள் குமாரரையும் தங்கள் குமாரத்திகளையும் மோளோகுக்குப் பலியிடும்படி இன்னோமுடைய குமாரனின் பள்ளத்தாக்கிலே பாகாலின் மேடைகளைக் கட்டினார்கள்; இந்த அருவருப்பைச் செய்து யூதாவைப் பாவஞ்செய்யப்பண்ணும்படி நான் அவர்களுக்குக் கட்டளையிடவும் இல்லை, அது என் மனதிலே தோன்றவும் இல்லை.”

அவர்கள் என் பிள்ளைகளாயிருப்பார்கள்; நான் அவர்களுடைய பிதாவாயிருப்பேன்

³⁶“இப்பொழுதும், பட்டயத்தினாலும், பஞ்சத்தினாலும், கொள்ளைநோயினாலும் பாபிலோன் ராஜாவின் கையில் ஒப்புக்கொடுக்கப்பட்டது என்று நீங்கள் சொல்லுகிற இந்த நகரத்தைக்குறித்து இஸ்ரவேலின் எங்கள் பிதா சொல்லுகிறது இதுவே:

³⁷“இதோ, நான் என் கோபத்திலும், என் உக்கிரத்திலும், மகா எரிச்சலிலும் அவர்களைத் துரத்திவிட்ட எல்லா தேசங்களிலுமிருந்து அவர்களைச் சேர்த்து, இவ்விடத்திற்குத் திரும்பப்பண்ணி, அவர்களைச் சுகமாய்க் குடியிருக்கப்பண்ணுவேன். ³⁸அவர்கள் என் பிள்ளைகளாயிருப்பார்கள், நான் அவர்களுடைய பிதாவாயிருப்பேன். ³⁹அவர்களுக்கும் அவர்களுக்குப்பின் வரும் அவர்கள் பிள்ளைகளுக்கும் நன்மையுண்டாகும்படி, அவர்கள் எந்நாளும் எனக்குப் பயந்திருக்கும்படிக்கு, நான் அவர்களுக்கு ஒரே இருதயத்தையும் ஒரே வழியையும் கொடுப்பேன். ⁴⁰நான் அவர்களுக்கு நன்மைசெய்யும்படி அவர்களை விட்டுப் பின்வாங்காதிருக்கும் நித்திய உடன்படிக்கையை அவர்களோடே பண்ணி, அவர்கள் என்னைவிட்டு அகலாதபடிக்கு எனக்குப் பயப்படும் பயத்தை அவர்கள் இருதயத்திலே வைப்பேன். ⁴¹நான் அவர்களுக்கு நன்மைசெய்ய அவர்கள்பேரில் மகிழ்ச்சியாயிருந்து, என் முழு இருதயத்தோடும் என் முழு ஆத்துமாவோடும் அவர்களை உண்மையாய் இந்த தேசத்திலே நாட்டுவேன்.”

⁴²ஏனெனில் எங்கள் பிதா சொல்லுகிறது: “நான் இந்த ஜனத்தின்மேல் இந்த மகா ஆபத்தையெல்லாம் வரப்பண்ணினதுபோல, நான் அவர்களுக்கு வாக்குத்தத்தம்பண்ணுகிற நன்மையையெல்லாம் அவர்கள்மேல் வரப்பண்ணுவேன். ⁴³மனுஷனும் மிருகமும் இல்லாமல் பாழாய்க் கிடக்கிறதென்றும், கல்தேயரின் கையில் ஒப்புக்கொடுக்கப்பட்டதென்றும் நீங்கள் சொல்லுகிற இந்த தேசத்தில் வயல்கள் வாங்கப்படும். ⁴⁴பென்யமீன் தேசத்திலும், எருசலேமின் சுற்றுப்புறங்களிலும், யூதாவின் பட்டணங்களிலும், மலைநாட்டுப் பட்டணங்களிலும், பள்ளத்தாக்குப் பட்டணங்களிலும், தென்திசைப் பட்டணங்களிலும் மனுஷர் வயல்களைப் பணங்கொடுத்து வாங்கி, சாதனங்களில் எழுதி, முத்திரையிட்டு, சாட்சிகளை வைப்பார்கள்; ஏனெனில் நான் அவர்களுடைய சிறையிருப்பைத் திருப்புவேன் என்று எங்கள் பிதா சொல்லுகிறார்.”