Jeremiah 32 FHB Father's Heart Bible™

32 ¹Judah laga raja Zedekiah laga dos number bochor te, Nebuchadnezzar laga athauro bochor te, amar Pitri laga kotha Jeremiah ke ahise. ²Hei somoi te Babylon laga sena khan Jerusalem ke gheri loi thakise, aru bhabobadi Jeremiah ke Judah laga raja laga rajmohol te thaka pohora khan laga angan te bondh kori rakhise.

³Kilemane Judah laga raja Zedekiah pora tar ke bondhi ghor te rakhidise aru koise, “Tumi kele bhabobani kori kene koi ase, ‘Amar Pitri pora eneka koi ase: Sabi, Moi eitu sohor ke Babylon laga raja laga hath te di dibo, aru tai eitu ke dhori lobo;’”

⁴“‘Judah laga raja Zedekiah tu Babylon manuh khan pora bachi najabo; tai nishchoi Babylon laga raja laga hath te di dibo, aru tai logot mukh-a-mukh kotha kobo, aru tar ke suku-a-suku dikhibo.’” ⁵“‘Tai Zedekiah ke Babylon te loi jabo, aru ta te tai thakibo jitia tak Moi tar phale nasabo, amar Pitri pora koi ase. Tumikhan Babylon manuh khan logot lorai korile bhi, tumikhan najitibo.’”

⁶Aru Jeremiah pora koise, “Amar Pitri laga kotha moi logot te ahise:”

⁷“Sabi, tumar kaka Shallum laga chokra Hanamel tu tumi ke kobole ahi ase: ‘Anathoth te thaka moi laga kheti tu kinibi, kilemane eitu kinibole mukti kora adhikar tumar ase.’”

⁸Titia moi laga kaka laga chokra Hanamel tu, amar Pitri pora kowa nisena, pohora khan laga angan te moi logot te ahise, aru moi ke koise, ‘Benjamin desh laga Anathoth te thaka moi laga kheti tu kinibi, kilemane uttoradhikar laga adhikar tumar ase, aru mukti kora adhikar bhi tumar ase; eitu kinibi.’ Titia moi jani loise eitu amar Pitri laga kotha asele.

⁹Titia moi, moi laga kaka laga chokra Hanamel pora Anathoth te thaka kheti tu kinise, aru chandi saat ounce nisena tuli dise. ¹⁰Moi dolil te sign kori dise aru chihna lagai dise, sakhi khan ke matise, aru poisa tu tola te tulise. ¹¹Titia moi chihna lagai diya kini luwa laga dolil tu, tar niyom aru sharto logote, aru khula thaka nokol tu loise, ¹²Moi kini luwa laga dolil tu, moi laga kaka laga chokra Hanamel laga age te, aru etu te sign kora sakhi khan laga age te, aru pohora khan laga angan te boi thaka sob Judah manuh khan laga age te, Mahseiah laga nati, Neriah laga chokra Baruch ke dise.

¹³Aru tarkhan laga age te moi Baruch ke hukum di koise:

¹⁴“Sorgo laga sena khan laga Pitri, Israel laga amar Pitri pora eneka koi ase: Eitu dolil khan—chihna lagai diya kini luwa laga dolil aru khula dolil tu—loi lobi aru bisi din tak thakibole eitu khan ke mati laga jola te rakhi dibi.” ¹⁵“Kilemane sorgo laga sena khan laga Pitri, Israel laga amar Pitri pora eneka koi ase: Eitu desh te ghor khan, kheti khan, aru angur bagan khan aru ekbar kini lobo.”

Jeremiah laga prathana: Apuni nimite eku bhi tan nahoi

¹⁶Neriah laga chokra Baruch ke kini luwa laga dolil tu di diya pichete, moi amar Pitri logot te prathana korise: ¹⁷“Ah, He Maalik Pitri! Apuni nijor pora Apuni laga dangor shakti aru Apuni laga tani diya hath pora sorgo aru prithibi ke bonaise; Apuni nimite eku bhi tan nahoi.” ¹⁸“Apuni hajar hajar manuh ke biswasi morom dikhai, kintu ama-baba khan laga golti tu tarkhan laga pichete tarkhan laga bacha khan laga kol te wapas di diye—He dangor, shaktiman Pitri, sorgo laga sena khan laga Pitri he Tar nam ase.” ¹⁹“Salah te dangor, kaam te shaktiman, Apuni laga suku manuh khan laga sob rasta uporte khula ase, aru sob manuh ke tar rasta hisab te, tar kaam laga phol hisab te wapas di diye.” ²⁰“Apuni Egypt te chihna aru asurit kaam khan korise, aru aji tak Israel te aru manuh khan majote korise, aru Apuni nijor karne ekta nam bonaise, jineka aji ase.” ²¹“Apuni, Apuni laga manuh Israel ke chihna khan, asurit kaam khan, mojbut hath, tani diya hath, aru dangor bhoi pora Egypt desh pora bahar te anise.” ²²“Apuni tarkhan ke eitu desh dise, juntu Apuni tarkhan laga purbo-purush khan ke dibole kosom khaise—gakhir aru mou boi thaka ekta desh.” ²³“Tarkhan bhitor te ghusi kene eitu loise, kintu Apuni laga awaaj mani lua nai aru Apuni laga niyom te bhi bera nai; Apuni tarkhan ke koribole hukum diya sob tarkhan nakori chari dise. Etu karne Apuni eitu sob dukh tarkhan uporte anise.” ²⁴“Sohor ke dhori lobole ghera-dora laga bandh khan sohor tak punchise; taroar, akaal, aru mohamari karne, eitu ke birodh te lorai kora Babylon manuh khan laga hath te eitu di dise. Apuni ki koise eitu hoi jaise—Apuni eitu dikhi ase.” ²⁵“Hoile bhi Apuni, He Maalik Pitri, moi ke koise, ‘Poisa di kene kheti tu kinibi, aru sakhi khan ke matibi’—jodiru sohor tu Babylon manuh khan laga hath te di dise.”

²⁶Titia amar Pitri laga kotha Jeremiah ke ahise:

²⁷“Moi sob gau-mangso laga Pitri ase. Moi nimite kiba tan ase naki?” ²⁸“Etu karne amar Pitri pora eneka koi ase: Moi eitu sohor ke Babylon manuh khan laga hath te, Babylon laga raja Nebuchadnezzar laga hath te di di ase, aru tai eitu ke dhori lobo.” ²⁹“Eitu sohor ke hamla kora Babylon manuh khan ahibo, aru jui pora eitu ke julai dibo, aru manuh khan pora juntu ghor laga sopa khan uporte Baal ke bolidan julai dise aru dusra isor khan ke paani laga bolidan dhali kene Moi ke khong uthai dise, hei ghor khan ke bhi julai dibo.”

³⁰“Israel aru Judah laga manuh khan tarkhan laga jawan homoi pora Moi laga suku age te biya kaam chari kene aru eku kora nai; Israel pora tarkhan laga hath laga kaam pora Moi ke khong uthua chari kene aru eku kora nai, amar Pitri pora koi ase.”

³¹“Eitu sohor bona diya din pora etiya tak Moi laga khong aru gusa uthai dise, etu karne Moi eitu ke Moi laga suku age pora hatai dibo,” ³²“Israel aru Judah laga manuh khan pora Moi ke khong uthabole kora sob biya kaam karne—tarkhan, tarkhan laga raja khan, cholawta khan, purohit khan, bhabobadi khan, Judah laga manuh khan, aru Jerusalem te thaka manuh khan.” ³³“Tarkhan Moi phale tarkhan laga pith ghurai dise, mukh nohoi. Moi tarkhan ke bar bar sikhai dile bhi, tarkhan huni bole mana korise aru thik kora loi bole bhi mana korise.” ³⁴“Tarkhan, Moi laga nam pora mata ghor ke letera kori bole, tarkhan laga ghin laga jinis khan hei ghor te sthapit korise.” ³⁵“Tarkhan Ben-Hinnom laga upotyika te Baal laga uncha jaga khan bonaise, aru tarkhan laga chokra aru chukri khan ke Molech ke bolidan dise—Moi kitia bhi hukum diya nai aru mon te bhi bhaba nai, ki tarkhan eitu ghin laga kaam koribo aru Judah ke paap koribole dibo.”

Tarkhan Moi laga bacha khan hobo; Moi tarkhan laga Pitri hobo

³⁶“Etiya, taroar, akaal, aru mohamari pora Babylon laga raja laga hath te di dise koi kene tumikhan kowa eitu sohor laga bisfparte Israel laga amar Pitri pora eneka koi ase:”

³⁷“Moi laga khong, Moi laga gusa, aru dangor khong pora juntu desh khan te Moi tarkhan ke khedai dise, hei sob desh pora Moi tarkhan ke joma koribo, aru eitu jaga te wapas anibo, aru tarkhan ke surakshit pora thakibole dibo.” ³⁸“Tarkhan Moi laga bacha khan hobo, aru Moi tarkhan laga Pitri hobo.” ³⁹“Moi tarkhan ke ekta mon, ekta rasta dibo, titia tarkhan hodai Moi ke bhoi koribo—tarkhan laga bhal karne aru tarkhan laga pichete tarkhan laga bacha khan laga bhal karne.” ⁴⁰“Moi tarkhan logot ekta ananta vachan banabo, aru tarkhan ke bhal kora pora Moi kitia bhi naghuribo; Moi Moi laga bhoi tarkhan laga mon te rakhibo, titia tarkhan Moi pora kitia bhi naghuribo.” ⁴¹“Moi tarkhan uporte khushi koribo, aru tarkhan ke bhal koribo, aru Moi laga pura mon aru pura jivon pora Moi hosa pora tarkhan ke eitu desh te rupabo.”

⁴²Kilemane amar Pitri pora eneka koi ase: “Jineka Moi eitu manuh khan uporte eitu sob dangor dukh anise, tineka Moi tarkhan ke vachan di thaka sob bhal jinis tarkhan uporte anibo.” ⁴³“Manuh bhi nai aru janwar bhi nai, Babylon manuh khan laga hath te di diya, khali jaga koi kene tumikhan kowa eitu desh te kheti khan kini lobo.” ⁴⁴“Manuh khan chandi di kene kheti khan kinibo, aru dolil khan likhibo, chihna lagabo, aru sakhi khan thakibo—Benjamin laga desh te, Jerusalem laga usorte, Judah laga sohor khan te, pahar desh te, niche laga desh te, aru Negev te—kilemane Moi tarkhan ke bondi pora wapas anibo, amar Pitri pora koi ase.”