Avāwui Kharai kala Hanmiluishitwui Ngashit
Khamayonawui karotli leichingda, Jeremiahna ithumwui Avāwui eina kakhane tui akha shā: ili ngakaolu, ina ngahānkāra. Ngasungkhangaiwui eina sakazamkahai ngāchonbingli shakazā ngalāva̱wui khon shāluira, Davidwui eina khangaronga Aphāng akha mungra, kala zimiksho eina zingkhomwui tuingashitna chi khamashung ngasakmi.
33 1Jeremiah arui mayon khavai yāngkhupli phātop sānghaisailakha, ithumwui Avāwui tui chi ali kakhane rāhānga: 2Ithumwui Avā, ngalei kasaa, chi sākhuida sākā ngasak khavai sākhui kaje, ithumwui Avā kahoa china hithāda hānga:
3Ili ngakaolu, chithākha ina nali ngahānkāra, kala nana matheikasa ot haklak kala ngathum kahai otbing chi ina nali hāngmira.
4Shairon kala raighai chi ngāk khavai horkahai, keinung hiwui shimbing kala Judahwui awungabingwui shimbing chiwui pongli Israelwui ithumwui Avāna hithāda hānga:
5Athumna Chaldeanaobingli ngarar khavai kharā, kha shimbing hi iwui malungkhavāt kala malung kasāli sāthat kahai mibingwui kathingun eina chipem khavaimāng; kaja athumwui makhayā otmāng saikorawui vang ina keinung hiwui eina imai ngathumhaira. 6Yanglu, ina keinung hili raimi kala phasākaphā khuirāmira; ina iwui mibingli raimida, athumli nganantāp okthui kala ning katong chi chitheimira. 7Ina Judahwui lan kala Israelwui lan hanmiluishitra, kala athumli khare thāda sakāluishitra. 8Ina athumna iwuili morei sā kahai khayonkhamāng saikorawui eina athumli tharngasakra, kala athumna iwuili morei sāda ngakaishi kahai khayonkhamāng saikora pheomira. 9Okathuiwui miyur saikorana ina athumwui vang sā kaphā saikora shāra, kala athumwui mangāli keinung hi iwui vang mathānthup, masot, kala tekhamateiwui ming sāra. Ina keinung hili khuirāmi kaphā kala nganantāp saikorawui vang athumna khaya̱da nganukra.
10Ithumwui Avāna hithāda hānga: Nathumna 'ruinganai, mi kala sā maleila' da hokaje apam hili, Judahwui keinungbingli kala Jerusalemwui chānreili, mi maleila, kapamabing maleila, sā maleila ngachakyāng kahai apamli, latluida, 11mathānthupwui akhon kala ringkaphāwui akhon, mākakhāmawui akhon kala khām kahaiva̱wui akhon, ithumwui Avā shimli ningkashiwui kachigat khuiunga mibingwui akhon, 'Saikorawui Avāli ningshilu, kaja ana kaphāna; awui makhangachei leikashi katang mavaimana' da kahāngwui akhon shāra. Kaja ina ngalei chiwui lan khare thāda hanmiluishitra, da ithumwui Avāna hānga.
12Saikorawui Avāna hithāda hānga: Latluida, mi kala sā maleila ruinganai apam hili kala chiwui keinungbing saikorali, yaokahomabingna athumwui yao chi seizātpamli ngayaipi ngasakmira. 13Kaphungramwui keinungbingli, Shephelahli, Negebli, Benjaminwui ngaleili, Jerusalem kuimareida, kala Judahwui keinungbingli, yaobing chi athum mashing shānkhui kaje awui pāng azingli latluida ngaruivāra, da ithumwui Avāna hānga. a a v13 Shephelah: Judahwui khavaknao shongwui aze phungreiram, sailungphup kaphungram kala twiza kongpheiwui tampāk angachaili khalei.
14Yanglu, Israelwui shimkhur kala Judahwui shimkhurli ina sā kahai kaphā ngashit chi ina ungshungmira kaji atam chi rārāli, da ithumwui Avāna hānga. 15Chitharan kala atam chili, Davidwui vang ina khangaronga Aphāng akha shokngasakra, kala ana ngalei hili mashun kala khamashung khangarong eina bichar sāmira. b b v15 Aphāng: Davidwui thot eina rāki kaji ngashit kahai khangaronga awungawui vang Khristawui ming. 16Chitharan Judah huikhuira kala Jerusalem ning nganungkhung eina pānra. Kala ali kaho kaji ming chi hina: 'Ithumwui Avā chi ithumwui khamashung khangarongna.'
17Kaja ithumwui Avāna hithāda hānga: Israelwui shimlakwui wungpamkhongli kapama mi akhala Davidna katang mavātmara. 18Levi pāngmonbingli iwui mangāli rikkatā kachigat pha̱khavai, tharāzāt kachigat riktā khavai, kala pha̱kaphayā chigat khavai mi katang mavaila mavatmilakmara.
19Ithumwui Avāwui tui china Jeremiahli rāhānga:
20Ithumwui Avāna hithāda hānga: Kalikha nathumna ngashunli iwui tuingashit kala ngayāli iwui tuingashit sākhaishap ngasakakha, chieina ngashun kala ngayā athumwui atam chāda marāluimara, 21chithāda iwui rao Davidli iwui tuingashit, kala ili otram ngatha̱ Levi pāngmonbingli iwui tuingashit chila sākhaishapra, kala awui wungpamkhongli mungkhavai anao akhala maleimara. 22Kazingli khalei sirā mashing shānshapmara, kala shamadruwui situi tamshapmara thāda, chithāda ina iwui rao Davidwui ara̱-azā kala ili otram ngatha̱ Levinaobingli mataisangmira.
23Ithumwui Avāwui tui china Jeremiahli rāhānga:
24Hi mibingna khi hānga kaji na matheimalā? 'Ithumwui Avāna kapangkhui shimkhur khani chi ana horhaira.' Athumna iwui mibingli yangkharinghaowa, chieina athumwui mangāli yur akha ngasakluimara. 25Ithumwui Avāna hithāda hānga: Kalikha ina ngashun kala ngayāli iwui tuingashit, kala kazingram kala okathuiwui shommi kahai shiyan-chikan masākahaiakha, 26chithāda ina Jacobwui ara̱-azā kala iwui rao Davidwui ara̱-azā horhaora, kala Abraham, Isaac, kala Jacobwui ara̱-azāli mungkhavai khamungabing awui ara̱-azā eina makhuiluimara. Kha ina athumwui lan hanmiluira, kala athumli lumashanmira.
