Jeremiah 34

34 ¹Babylonwui awunga Nebuchadnezzar kala awui raimi saikora, kala ana mung wungram saikora eina mibing saikorana Jerusalem eina chiwui keinung saikorali ngarara tharan, ithumwui Avāwui eina Jeremiahli rāhāng tui chi hina:

²Israelwui ithumwui Avāna hithāda hānga: Vālu, Judahwui awunga Zedekiahli hānglu, alila hānglu: ithumwui Avāna hānga: Yanglu, keinung hi Babylonwui awungawui pāngli ina horsangmira; ana chi mei eina chuira. ³Nana awui pāng eina mayāmshokmara, kha kachangkhat tukkhuida awui pāngli horsangmira. Nawui mik eina Babylonwui awungawui mik theira, awui khamorna nawui khamorli khamatuina, kala nava Babylonli vāra.

⁴Chithālala, O Judahwui awunga Zedekiah, nawui Avāwui tui nganālu: ithumwui Avāna hānga, nava raighai eina mathimara.

⁵Nava chingri kahai eina thira. Nawui mangāli okkhai awungabing, navā ngarāwui vang nganamkaphā thao riktāda thāda, chithāda sāda athumna nawui vang chi riktāra, kala 'Iyavo, Proho!' da nali chapngachāra. Ina hi hānghaira, da nawui Avāna hānga.

⁶Chieina Jeremiah marānna Jerusalemli Judahwui awunga Zedekiahli hi tui saikora hānga, ⁷chitharan Babylonwui awungawui raimina Jerusalem kala Judahwui katai keinung saikorali ngarara; kaja Judahli katai raipan sākahai keinungbing chi Lachish eina Azekahna.

Avāna Sākhayang Kadharali Bichar Sāra

⁸Awunga Zedekiahna Jerusalemli mibing saikorali ngasoda tuingashit akha sāda, athumli ningkhān phongshok kahaiwui thili, ithumwui Avāwui eina Jeremiahli rāhāng tui chi hina: ⁹khipānakha awui achinā Judahnao akhali rao masāngasak khavai, mi kachiva̱na awui Hebrew raopa kala raopava̱li ningkhān ngasakra. ¹⁰Tuingashit azang kahai wungnaobing kala mibing saikorana nganāda, mi kachiva̱na awui raopa kala raopava̱li ningkhān ngasakhaowa, athumli rao thada longra matukmana; athumna nganāda ningkhān ngasakhaowa. ¹¹Chiwui thili athumna ngalanhaolaga, ningkhān ngasakhao raopa kala raopava̱li khuiluishithaowa, kala athumli tandi eina raonao sāngasakluishithaowa.

¹²Chieina ithumwui Avāwui tui china Jeremiahli rāhānga:

¹³Israelwui ithumwui Avāna hithāda hānga: "Egypt ngalei, narkahai shimwui eina athumli thānshok kahai zimiksho, ina khalatta navā ngarāli ngasoda tuingashit akha sāda hithāda hānga: ¹⁴zingkum shini tangda tharan, mi kachiva̱na nali yorkasang kala zingkum tharuk otram ngatha̱ kahai awui Hebrew achināli ningkhān ngasakra; ali chiholu. Kha navā ngarāna ili manganāmana, kala khanā manganātitkhuimana. ¹⁵Nathum naolak eina ngalanda iwui mangāli khamashung khangarong ot sai, mi kachiva̱na awui khongnainaoli ningkhān phongshokta, iwui ming eina phok kahai shimli iwui mangāli tuingashit akha sai. ¹⁶Kha nathum ngalanluishitlaga iwui ming makhao ngasakhaira: nathum kachiva̱na ningkhān eina vāki khavai ningkhān ngasakhao raopa kala raopava̱li khuiluishithaowa, athumli tandi eina raonao sāngasakluishithaowa."

¹⁷Chieina ithumwui Avāna hānga: "Nathumna mi kachiva̱na awui achinā kala khongnainaoli ningkhān phongshok khavai ili manganāmana. Chieina, da nathumwui Avāna hānga, ina raighai, kazātkashi, kala chāmreili nathumli ningkhān phongshokmira; okathuiwui wungram saikorali nathumli ngachee-ngachā sākhavai sāngasakra. ¹⁸Iwui tuingashit kai kahai, iwui mangāli sākahai tuingashit tui chi maningtong maleila khalei mibing chi, athumna kaikhani sātāda amarimrim ngachaili yaokupa kahai seinao chi thāda ina horsangmira. ^a a v18 Khare kachāng tuingashit sākhavai atamli, tuingashit sākasābingna sā taithat kahaiwui kaikhani ngachaili zata, chieina tuingashit chi kaiakha chithā runchāng chi khalattatungli shokranu da hangchinga. ¹⁹Judah eina Jerusalemwui wungnaobing, konungwui otva̱bing, pāngmonbing, kala seinaowui amarimrim ngachaili yaokup kahai ngalei chiwui mi saikora— ²⁰Athumli athumwui yangkashebingwui pāngli, athumwui manglā khuikida kasābingwui pāngli ina horsangmira. Athumwui kathingun chi yongkazata vānaowui kala okathuiwui ramsāwui kashakazā ngasāra. ²¹Judahwui awunga Zedekiah kala awui wungnaobingli, athumwui yangkashebingwui pāngli, athumwui manglā khuikida kasābingwui pāngli, kala nathumwui eina thuikahai Babylon awungawui raimibingwui pāngli ina horsangmira. ²²Ina hukhum mira, da nathumwui Avāna hānga, kala athumli keinung hili hanmira; athumna hi ngararra, yuihaida, mei eina thottāra. Kala ina Judahwui keinungbing chi mi maokkathui ramcho sāngasakra."